Read Nguna Togoa Etafe North ESEKIEL 28 Bible Online

ESEKIEL 28 - Nguna Togoa Etafe North bible

ESEKIEL 28

¹Navasaana ki Yehovah e moro umai paki nau,

²po naga, Naatam̃oli natuna, p̃a noa ki tea maraki ni Tair, p̃a naga, Yehovah Sup̃e e noa dapala nea, e naga, Nalakena nap̃op̃om̃a e pakilagi, go nigo ku naga, Kinau a pei sup̃e sikai, kinau a dasake doko malo tasake ki sup̃e maga m̃aleoputo ni natasi maga; ma ku pei naatam̃oli sikai, ku da pei sup̃e sikai mau, ma ku dum̃am̃a midoa ki‐go naga ku manumatua dapala sup̃e sikai:

³P̃a leo, ku manumatua liu Daniel; te p̃aia sikai e da pei tea tasurukiana paki‐go mau:

⁴Pae namanumatuaana anigo go pae namidoaki‐atae‐ana anigo, ku dum̃am̃a manigo dalua nasogolapaana, go ku dum̃am̃a daua ki kold go silver nasum̃a maga ni naleo wia masauniana anigo maga:

⁵Pae namanumatuaana warua anigo go pae navakokotoana anigo, ku dum̃am̃a mari nasogolapaana anigo e disu po p̃arua, go nap̃op̃om̃a e pakilagi nalakena nasogolapaana anigo:

⁶Nalakena tea wanogoe Yehovah Sup̃e e noa dapala nea, e naga, Nalakena ku dum̃am̃a midoa ki‐go naga ku manumatua dapala sup̃e sikai:

⁷Nalakena tea wanogoe p̃a leo, aga wo mari tea ni nalauna p̃ota maga euga wo umai po mari dip̃a ko, tea matauki‐p̃arua‐kiana maga ni nalauna maga; go euga wo sai lua lova adeada maga po mari dip̃a naleom̃atakiana ni namanumatuaana anigo, po mari nasamasamaana anigo ega vei tea m̃oli.

⁸Euga wo disua ki‐go pakitano paki m̃orutano; go p̃a wo mate namateana ni tea atugiana maga, doko epua ni natasi maga.

⁹Go p̃a wo noa narae ni tea maga waina euga atugi ko, p̃a wo naga, Kinau a pei sup̃e sikai, kite? Ma nigo p̃a wo pei naatam̃oli sikai, p̃a wo da pei sup̃e sikai mau, doko nam̃elearu ni tea maga waina euga atugi ko.

¹⁰P̃a wo mate namateana ni tea tika ni natovadaviviana, doko nam̃elearu ni tea ni nalauna p̃ota maga; nalakena kinau a pasa asa, Yehovah Sup̃e e noa e.

¹¹Go navasaana ki Yehovah e moro umai paki nau,

¹²po naga, Naatam̃oli natuna, p̃a sike nalalagaarovaana sikai nalo ni nawota ni Tair, go p̃a noa ki nia, p̃a naga, Yehovah Sup̃e e noa dapala nea, e naga, Sala vea ku pei tea vulusokiana ki nawialuaana, ku pura ki namanumatuaana, go ku pei tea wia lua doko naleom̃atakiana.

¹³Ku doko Eden, roara ki Sup̃e; sara vatu wia masauniana maga eu pei tea kovagoro anigo, sardius, topas, go daimond, berul, natap̃alakisi, yasper, safir, emerald, karbunkel, go kold: tabret anigo maga go lokore anigo maga eu pei tea wosiwosikiana doko ako; eu pei tea marim̃ata‐kiana sua doko naaleatia waina nigo ku pei tea mari‐dawona‐kiana asa.

¹⁴Kerub vuvuraikiana sikai e pavaigoro ko, go kinau a lawo ki‐go ku doko tava tapu ki Sup̃e; ku surata papiliu m̃aleoputo ni nam̃elevara vavaga maga.

¹⁵Ku pei tea wia lua doko napua anigo maga pae naaleatia waina ku pei tea mari‐dawona‐kiana asa, pa pa paki ragi waina namarinaleotageleana e pei tea vap̃aiana doko ako.

¹⁶Doko nalapalapaana ni navakokotoana anigo, ku pei tea vakavuroana ki namaripavakotoana, go ku mari naleo sa: nalakena tea wanogoe kinau a nadi ki‐go dakiusi naleo m̃oli sikai m̃elu dua ki tava ki Sup̃e; go kerub vavaigoro e mari puoli ki‐go m̃elu dua ki m̃aleoputo ni nam̃elevara vavaga maga.

¹⁷Nap̃op̃om̃a e pei tea tapeana pakilagi nalakena naleom̃atakiana anigo; ku mari sa ki namanumatuaana anigo nalakena navakilagi‐liu‐ana anigo: kinau a nadi ki‐go paki natano, a mari ko ku doko lina narae ni nawota maga, naga euga leo punusi ko.

¹⁸Nalakena nalaapaana ni nasigisigileoana anigo maga, doko namarinaleotageleana ni navakokotoana anigo, ku mari tokora tapu aginau e pei tea m̃oli; nalakena tea wanogoe kinau a mari nakapu vavaga e dave m̃elu m̃aleoputo kakam̃a, go e gani puoli ki‐go, go a mari ko ku pei natano‐apu doko natano namata ni tea laapa waina eu leo punusi ko.

¹⁹Tea laapa ni nalauna maga waina eu atae ko euga wo saram̃akoto ako: ku po pei tea mataukiana sikai, ku pano puoli.

²⁰Go navasaana ki Yehovah e umai paki nau,

²¹po naga, Naatam̃oli natuna, p̃a lawo ki naraem̃a po leo paki Sidon,

²²po peanoasai dip̃a e, P̃a naga, Yehovah Sup̃e e noa dapala nea, e naga, P̃a leo, kinau a mari dip̃a ko, Sidon O; go aga wo pei tea samasamaniana m̃aleoputo kakam̃a: go euga wo atae naga kinau a pei Yehovah, ragi waina aga wo mari sua navasap̃otaeana maga doko asa, po mari natautauana aginau ega tokolina doko asa.

²³Nalakena aga wo dip̃aki lua paki asa nasasanaana sa, go nada ega wo doko napua maga ni natokoana kakana; go tea atugiana maga euga wo dowo m̃aleoputo kakana, ki lova waina e doko dip̃a e daliviri; go euga wo atae naga kinau a pei Yehovah.

²⁴Go tea maga waina eu doko daliviri nasum̃a ni Israel, waina eu midoaki p̃alo ki da, euga wo da moro pei tea vivitip̃a sikai waina ega mari dip̃a ra mau, kite namatagauta sikai waina ega mari ra euga rogokitesa asa mau; go euga wo atae naga kinau a pei Yehovah Sup̃e.

²⁵Yehovah Sup̃e e noa dapala nea, e naga, Ragi waina aga wo piragi saisai ki nasum̃a ni Israel m̃elu dua ki nalauna maga waina eu pei tea taperaverakiana usuraki ara, po mari natautauana aginau ega toko lina doko ara namata ni nalauna maga, ragi wanogoe euga wo doko navanua adeada doko, waina kinau a dua tea suasua aginau Yakob asa.

²⁶Go euga wo doko asa doko navavatuana; go euga wo davagi nasum̃a maga, po lawo roara maga ni vaine, go euga wo doko navavatuana doko; ragi waina aga wo mari navasap̃otaeana maga paki tea mamau puti waina eu midoaki p̃alo ki da doko dalivirigoro ra; go euga wo atae naga kinau a pei Yehovah Sup̃e adeada.