Read Nguna Togoa Etafe North ESEKIEL 29 Bible Online

ESEKIEL 29 - Nguna Togoa Etafe North bible

ESEKIEL 29

¹Doko natau kerualima sikai, atelagi kerualima kakana, nakup̃a kerualima sikai tamate dua, navasaana ki Yehovah e umai paki nau, po naga,

²Naatam̃oli natuna, p̃a lawo ki naraem̃a dip̃a Faraoh nawota ni Ityipt, po peanoasai dip̃a e, go dip̃a Ityipt mamau:

³P̃a vasa po naga, Yehovah Sup̃e e noa dapala nea, e naga, P̃a leo, kinau a mari dip̃a ko, Faraoh nawota ni Ityipt, drakon warua waina ku one m̃aleoputo ni noaisara kakam̃a maga, waina ku naga, Noaisara aginau e pei tea aginau, go kinau a dum̃agu mari a naga ega vei aginau.

⁴Kinau aga wo doropusi tagau maga doko nasim̃a maga, go aga wo mari naika maga ni noaisara maga euga vuluti naunam̃a maga; go aga wo pua dakati ko m̃elu dua ki m̃aleoputo ni noaisara maga, nimu ma naika maga mamau puti ni noaisara anigo maga, waina eu puluti naunam̃a maga.

⁵Go aga wo nadi ki‐go paki masop̃alo pano, nimu ma naika maga mamau puti ni noaisara anigo maga: p̃a wo dowo one napega welewelea; p̃a wo da pei tea saisaikiana kite ovakiana mau: kinau a pitua ki‐go p̃a vei navinaga agi nalo mauri maga ni maramana, go agi manu maga ni namalopa.

⁶Go naatatoko maga mamau puti ni Ityipt euga wo atae naga kinau a pei Yehovah, nalakena nara eu pei tiko sikai ni napati nau agi nasum̃a ni Israel.

⁷Ragi waina eu puati soki ko, ku makoto doko nam̃elearuda, po pua p̃orae napauda maga: go ragi waina eu ovi ako, ku makoto, po mari nawareda maga eu duruuru.

⁸Nalakena tea wanogoe Yehovah Sup̃e e noa dapala nea, e naga, P̃a leo, kinau aga wo mari lova sikai ega va parati ki‐go, go aga wo daelua naatam̃oli go nalo tuavati m̃elu dua ki‐go pano.

⁹Go navanua ni Ityipt ega wo pei maso maladi sikai, go tokora makaka sikai; go euga wo atae naga kinau a pei Yehovah: nalakena e naga, Noaisara e pei tea aginau, go kinau a mari a.

¹⁰Nalakena tea wanogoe p̃a leo, kinau a mari dip̃a ko, go dip̃a noaisara anigo maga, go aga wo mari navanua ni Ityipt ega wo pei tokora makaka sikai go maso maladi sikai, pae Mikdol paki Saiene pano pa pa liliu kokoi ni Ethiopia.

¹¹Te nam̃ele sikai ni naatam̃oli ega wo da surata duaduru asa mau, go te nam̃ele sikai ni nalo tuavati ega wo da surata duaduru asa mau, go naatam̃oli ega wo dika asa natau rualima pati.

¹²Go aga wo mari navanua ni Ityipt ega wo pei maso maladi sikai m̃aleoputo ni navanua maga waina eu pei maso maladi doko, go natokoana kakana maga m̃aleoputo ni natokoana maga waina eu makaka one, euga wo pei maso maladi sikai doko natau rualima pati: go aga wo daperavera ki naka ni Ityipt m̃aleoputo ni nalauna maga, go aga wo sapura ki da usuraki navanua maga.

¹³Nalakena Yehovah Sup̃e e noa dapala nea, e naga, Ragi ni nanopuana ni natau rualima pati, kinau aga wo piragi saisai ki naka ni Ityipt m̃elu dua ki narei maga waina eu pei tea taperaverakiana usuraki ara:

¹⁴Go aga wo moro piragi liliua ki naviragi‐lua‐pavakotoana ni Ityipt, go aga wo mari ra euga liliu paki navanua ni Pathros, paki navanua atatoko adeada; go doko tokora wanogoe euga wo pei namarakiana vakitano sikai.

¹⁵Ega wo pei tea vakitano mau ni namarakiana maga; go ega wo da moro dum̃ana dape a pakilagi liu nalauna maga mau: go aga wo mari ra euga wo pisa maau dapala waina euga wo da moro maramara dap̃au nalauna maga mau.

¹⁶Go ega wo da moro pei navavatuana ni nasum̃a ni Israel mau, doko do mari namarinaleotageleana ega vei tea midoaki‐parati‐kiana, ragi waina eu maradoa paki da raki nasilaeana: go euga wo atae naga kinau a pei Yehovah Sup̃e.

¹⁷Go e pakilina natau rualima dua tamate larua, doko atelagi vea kakana, nakup̃a vea ni atelagi, naga navasaana ki Yehovah e umai paki nau,

¹⁸po naga, Naatam̃oli natuna, Nebukadnessar nawota ni Babelon e mari naatam̃oli ni navakalo aneana maga eu p̃osiwosi kasua dip̃a Tair: sara nap̃auda eu pei tea mariana eu m̃asua, go sara napauda eu maratirati: ma e da dape te namoriana pae Tair mau, nara ma naatam̃oli ni navakalo aneana maga, nalo ni nawosiana waina e p̃osiwosi asa dip̃a e:

¹⁹Nalakena tea wanogoe Yehovah Sup̃e e noa dapala nea, e naga, P̃a leo, aga wo pitua ki navanua ni Ityipt paki Nebukadnessar nawota ni Babelon; go nae ega wo piragi lua pavakoto taua ni naatam̃oli kakana maga, po dape pavakoto asa, po puti lua pavakoto asa; go ega wo pei namoriana agi naatam̃oli ni navakalo aneana maga.

²⁰Kinau a dua e navanua ni Ityipt e pei navitua‐dip̃aana aneana nalo ni nawosiana aneana, nalakena eu maginau p̃osiwosi asa, Yehovah Sup̃e e noa e.

²¹Doko naaleatia wanogoe aga wo mari napati ni nap̃au ni nasum̃a ni Israel ega wo siria, go aga wo p̃olagati nawokam̃a m̃aleoputo kakada; go euga wo atae naga kinau a pei Yehovah.