Read Nguna Togoa Etafe North ESEKIEL 3 Bible Online

ESEKIEL 3 - Nguna Togoa Etafe North bible

ESEKIEL 3

¹Go e noa ki nau, e naga, Naatam̃oli natuna, p̃a kani tea waina e pei tea vituakiana paki‐go; p̃a kani tusi lulukiana waia, go p̃a vano, p̃a vasa paki nasum̃a ni Israel.

²Go a maga, go e dua au tusi lulukiana wanogoe naga aga kani a.

³Go e noa ki nau, e naga, Naatam̃oli natuna, p̃a kani tusi lulukiana waia waina a dua ko asa, go namaritam̃a maga euga wo puka ki nia. Go a gani a; go e gagadi doko nawokagu dakiusi honi.

⁴Go e noa ki nau, e naga, Naatam̃oli natuna, p̃a vano punusi nasum̃a ni Israel, po pasa paki da navasaana aginau maga.

⁵Nalakena ku da pei tea tip̃aki‐lua‐ana pano punusi narei sikai ni navasaana p̃ota go ni masileo kasua sikai, ma ku pei tea tip̃akilua‐ana pano punusi nasum̃a ni Israel;

⁶Eu da pei narei laapa ni navasaana p̃ota go ni masileo kasua sikai, waina ku da dogo atae navasaana adeada maga mau. Nalakena a pe tip̃aki lua ko pano punusi tea tapalana maga, nara eu pe suasua daki dorogo paki‐go.

⁷Ma nasum̃a ni Israel euga wo da daki dorogo paki‐go mau; nalakena euga wo da daki dorogo paki nau mau: nalakena nasum̃a mamau ni Israel eu pei rae kasua sikai go p̃op̃o kasua sikai.

⁸P̃a leo, kinau a mari namatam̃a ero kasua dip̃a namatada, go naraem̃a e kasua dip̃a naraeda.

⁹Kinau a mari naraem̃a e kasua dapala daimond, waina e kasua do liu vatu ni nakapu: nara eu pei nasum̃a vei p̃auluulu sikai, ma p̃a ta matau ki da mau, kite m̃anaunau naraeda mau.

¹⁰Go e moro noa ki nau, e naga, Naatam̃oli natuna, sara navasaana aginau maga waina aga noa ki‐go asa, p̃a midoa ki parati ki nia nap̃op̃om̃a, go nadaligam̃a eroga rogo soki ra.

¹¹Go p̃a vano, po punusi tea ni naviragilua‐pavakotoana narei anigo natuna maga, go p̃a vasa paki da, po noa ki da, p̃a naga, Yehovah Sup̃e e noa dapala nea; eu pe suasua daki dorogo, kite eu pe ta suasua asa mau.

¹²Go naatana e dape au sake, go a dogo nadaleo ni nasaruruana warua sikai natakugu, waina e naga, Nasamasamaana ni Yehovah ega vei tea vasap̃iakiana nasum̃a‐tokoana aneana.

¹³Go a dogo nasaruruana ni nalivaru ni nalo mauri maga wanogoe waina eu dum̃ada kisidogo ra, go nasaruruana ni tea taliepu maga nap̃irikiada, e pei nadaleo ni nasaruruana warua liu.

¹⁴Go naatana e dape au sake po dape au pano: go a pano nakokonaana, navitinuana ni naatagu; go nam̃elearu ni Yehovah e kasua doko au.

¹⁵Go a umai paki Tel‐abib punusi tea maga ni naviragilua‐pavakotoana, waina eu doko nadigi ni noaisara Kebar, paki tokora waina eu m̃enaki atatoko asa; go a doko tokora wanogoe m̃aleoputo kakada doko naaleatia larua, a saram̃akoto.

¹⁶Go e pakilina ragi waina naaleatia larua eu nopu, naga navasaana ki Yehovah e puvua umai doko au, po naga,

¹⁷Naatam̃oli natuna, kinau a mari ko ku pei naatam̃oli vavaigoro sikai agi nasum̃a ni Israel: nalakena tea wanogoe p̃a rogo navasaana m̃elu nawokagu, go p̃a tapavanau ra pae nagisagu.

¹⁸Kinau a pe noa ki tea sigisigileo, a pe naga, P̃a wo mate lomau; go nigo ku pe ta dapavanau sa mau, kite pasa naga p̃a tapavanau tea sigisigileo naga ega m̃elu dua ki napua sa aneana, naga ega mauti namauriana aneana; naatam̃oli sigisigileo wanogoe e pe wo mate namarinaleotageleana aneana; ma nadana aga wo datago asa paki nam̃elearum̃a.

¹⁹Ma ku pe tapavanau tea sigisigileo, go nae e pe ta maradoa pa dua ki nasigisigileoana aneana mau, kite pa dua ki napua sa aneana, e pe wo mate namarinaleotageleana aneana; ma nigo ku pualua naatam̃a.

²⁰Go waina naatam̃oli leana sikai e pe maradoa pa dua ki namarinaleoleanaana aneana, po mari namarinaleotageleana, go kinau a pe nadi ki tea tapilagonaana sikai naraena, nae e pe wo mate: nalakena nigo ku da dapavanau sa mau, nae ega wo mate namarinaleosaana aneana, go natomariana leana aneana maga waina e mari ra, euga wo da pei tea midoaki‐parati‐kiana mau; ma kinau aga wo datago nadana paki nam̃elearum̃a.

²¹Ma ku pe tapavanau naatam̃oli leana wanogoe naga tea leana ega ta mari te namarinaleosaana mau, go e pe ta mari naleo sa, e pe wo mauri lomau, nalakena e dogo soki natapavanauana; go nigo ku pualua naatam̃a.

²²Go nam̃elearu ni Yehovah e doko au doko tokora wanogoe; go e noa ki nau, e naga, P̃a tuleana, p̃a tave paki nap̃aloa pano, go aga wo pasa paki‐go tokora wanogoe.

²³Go a duleana, po dave paki nap̃aloa pano: go p̃a leo, nasamasamaana ni Yehovah e lawodu tokora wanogoe, dapala nasamasamaana waina a punusi a doko nadigi ni noaisara Kebar: go a dowo dap̃olosiwo.

²⁴Go naatana e puvua umai doko au, po sike lawo ki nau a duleana; go e pasa paki nau, po noa ki nau, e naga, P̃a vano, p̃a vaki ekopu ni nasum̃a anigo po kokoro namata kakana.

²⁵Ma nigo naatam̃oli natuna, p̃a leo, natali solisoki maga euga wo pei tea toropusiana ako, go euga wo solisoki ko, go p̃a wo da mariatae dave pano paki m̃aleoputo ni narei mau:

²⁶Go aga wo mari namenam̃a ega wo puluti nam̃agam̃a, go p̃a wo pusa, po da mariatae dapavanau ra mau: nalakena eu pei nasum̃a vei p̃auluulu sikai.

²⁷Ma ragi waina aga vasa paki‐go, aga wo p̃olagati nawokam̃a, go p̃a noa ki da, p̃a naga, Yehovah Sup̃e e noa dapala nea, go naata waina e masauna naga ega taki dorogo, ega taki dorogo; go tea waina e karai, ega karai: nalakena eu pei nasum̃a vei p̃auluulu sikai.