Read Nguna Togoa Etafe North ESEKIEL 30 Bible Online

ESEKIEL 30 - Nguna Togoa Etafe North bible

ESEKIEL 30

¹Go navasaana ki Yehovah e moro umai paki nau,

²po naga, Naatam̃oli natuna, p̃a veanoasai, po naga, Yehovah Sup̃e e noa dapala nea, e naga, Kuga lalagaarova, po naga, Awi ki naaleatia!

³Nalakena naaleatia e pei m̃aladigi, naaleatia ki Yehovah e pei m̃aladigi, ega wo pei naaleatia sikai ni napopouru maga; ragi sikai ni namarisakiana paki nalauna maga.

⁴Go lova sikai ega wo dowo paki Ityipt, go narogokitesaana ega wo doko Ethiopia, ragi waina tea atugiana maga euga wo dowo one Ityipt; go euga wo piragi lua pavakoto taua warua ni naatam̃oli kakana maga, go laketano kakana maga euga wo pevera.

⁵Ethiopia, go Put, go Lud, go naatam̃oli sarisari maga mamau puti, go Kub, go naka ni navanua ni navasasokiana aginau euga wo mamau puti dowo ki lova.

⁶Yehovah Sup̃e e noa dapala nea, e naga, Tea maga waina eu silae Ityipt nara ma euga wo dowo, go navakilagiana ni nakasuaana kakana ega wo pakitano: pae Mikdol pano pa pa liliu Saiene, euga wo dowo ki lova m̃aleoputo kakana, Yehovah Sup̃e e noa e.

⁷Go euga wo pei maso maladi doko m̃aleoputo ni navanua maga waina eu pei maso maladi, go natokoana kakana maga euga wo doko m̃aleoputo ni natokoana maga waina eu makaka one.

⁸Go euga wo atae naga kinau a pei Yehovah, ragi waina aga wo dokoni Ityipt ki nakapu, go tea silae kakana maga mamau puti euga wo mavunuvunu.

⁹Doko naaleatia wanogoe tea tautauana maga euga wo dave m̃elu dua ki naraegu pano doko rarua maga naga euga mari tea dodo‐p̃arop̃aro maga ni Ethiopia euga mataku; go narogokitesaana ega wo doko ara, dapala waina e doko naaleatia ni Ityipt; nalakena p̃a leo, e do umai.

¹⁰Yehovah Sup̃e e noa dapala nea, e naga, Kinau aga wo mari puoli ki taua warua ni naka ni Ityipt, pae nam̃elearu ni Nebukadnessar nawota ni Babelon.

¹¹Nara ma narei aneana, tea mataukiana maga ni nalauna maga, euga wo pei tea viragiana umai naga euga mari sa sa ki navanua; go euga wo sai lua lova adeada maga dip̃a Ityipt, po pakavuro navanua ki tea atugiana maga.

¹²Go aga wo mari noaisara maga euga wo dap̃a garagara, po pitua ki navanua paki nam̃elearu ni naatam̃oli sigisigileo maga; go aga wo mari navanua ega vei maso maladi doko, go tea mamau puti waina eu doko asa doko, pae nam̃elearu ni tea ni nalauna p̃ota maga: kinau Yehovah a pasa asa.

¹³Yehovah Sup̃e e noa dapala nea, e naga, Go aga wo mari puoli ki idolo maga, go aga wo mari nasup̃e maga euga makoto m̃elu dua ki Nof; go tea maraki sikai ega wo da moro m̃elu navanua ni Ityipt mau: go aga wo mari namatakuana sikai ega wo papule navanua ni Ityipt.

¹⁴Go aga wo mari Pathros ega wo pei maso maladi doko, go aga wo dokoni nakapu sikai doko Soan, go aga wo mari navasap̃otaeana aginau maga doko No.

¹⁵Go aga wo daki namaritausuana aginau paki Sin, tokora p̃aakagoroana ni Ityipt; go aga wo daelua taua warua ni naka ni No.

¹⁶Go aga wo dokoni nakapu sikai doko Ityipt; Sin ega wo dogokitesa p̃arua, go No ega wo pei tea mari‐p̃oraworaeana: go Nof ega wo pei tea riesokiana sara naaleatia.

¹⁷Natureai maga ni Aven go ni Pibeseth euga wo dowo ki lova: go natokoana maga wanogoe euga wo pei tea viragi‐luapavakotoana pano.

¹⁸Go doko Tehafnehes aleati ega wo dum̃ana sukasuka pano, ragi waina aga wo mari kotovi nakau ni nanoa maga ni Ityipt tokora wanogoe, ragi waina navakilagiana ni nakasuaana kakana ega wo marua ki nia: go nalo kakana, napopouru sikai ega wo kovagoro e, go natuna nagoroi maga euga wo pei tea viragilua‐pavakotoana pano.

¹⁹Ega tapala nogoe aga wo mari navasap̃otaeana aginau maga doko Ityipt: go euga wo atae naga kinau a pei Yehovah.

²⁰Go e pakilina natau kerualima sikai tamate sikai, doko atelagi vea kakana, nakup̃a kelarua ni atelagi, naga navasaana ki Yehovah e umai paki nau,

²¹po naga, Naatam̃oli natuna, kinau a po p̃ori kotovi naru ni Faraoh nawota ni Ityipt; go p̃a leo, e da pei tea vivisiana mau, naga ega moro p̃ia nalakena vivi sikai, dapala waina ega moro kasua naga ega moro puati lova.

²²Nalakena tea wanogoe Yehovah Sup̃e e noa dapala nea, e naga, P̃a leo, kinau a mari dip̃a Faraoh nawota ni Ityipt, go aga wo p̃ori kotovi naruna dua, tea waina e kasua doko, go kerua waina e pea makoto; go aga wo mari lova ega rowo m̃elu dua ki nam̃elearuna.

²³Go aga wo daperavera ki naka ni Ityipt m̃aleoputo ni nalauna maga, po sapura ki da usuraki navanua maga.

²⁴Go aga wo mari naru ni nawota ni Babelon eroga wo kasua, po doropusi lova aginau ega toko nam̃elearuna: ma aga wo p̃ori kotovi naru ni Faraoh, go nae ega wo gi naraena ki nagigiana maga ki naatam̃oli waina e pei wotu dapala waina ega mate asa.

²⁵Go aga wo mari naru ni nawota ni Babelon eroga wo kasua, go naru ni Faraoh eroga wo dowo pakitano; go euga wo atae naga kinau a pei Yehovah, ragi waina aga wo doropusi lova aginau ega toko nam̃elearu ni nawota ni Babelon, go nae ega wo sai ki nia dip̃a navanua ni Ityipt.

²⁶Go aga wo daperavera ki naka ni Ityipt m̃aleoputo ni nalauna maga, po sapura ki da usuraki navanua maga; go euga wo atae naga kinau a pei Yehovah.