Read Nguna Togoa Etafe North ESEKIEL 31 Bible Online

ESEKIEL 31 - Nguna Togoa Etafe North bible

ESEKIEL 31

¹Go e pakilina natau kerualima sikai tamate sikai, doko atelagi ketolu kakana nakup̃a vea ni atelagi, naga navasaana ki Yehova e umai paki nau,

²Po naga, Naatam̃oli natuna, p̃a noaki Faraoh nawota ni Ityipt, go ki taua warua ni naatam̃oli aneana maga, Nakasuaana anigo e doko, Koro pitotowo ma sei doko nawaruaana anigo?

³P̃a leo, kinau a naga ku gakiusi nakau sidar sikai ni lebanon, Waina arana maga eu p̃ia pa, eu melugoro mala ni nakau, Go eu parau pakilagi liu, go namasauana e doko maleoputo ni napopouru maga.

⁴Noai maga eu paka melumelu ki nia, Epua e mari a e pisou pakilag, Noaisara kakana maga eu sara daliviri tokora waina e pei tea lawoana asa, Doko dipaki lua nap̃ap̃a noai kakana maga eu sara paki nakau maga mamau puti ni mala ni nakau

⁵Nalakena tea wanogoe, E pakilagi liu nakau maga mamauputi ni mala ni nakau, Arana maga eu laapa, go nasirina maga eu parau

⁶Manu maga ni namalopa eu mari vete adeada arana maga; Go etano ki arana maga nalo tuavati ni namalasi eu pisola; Go nalauna warua maga mamauputi eu doko meluna doko

⁷Go e pei tea leomatakiana. Nawaruaana kakana doko navarauana ni arana maga: Nalakena nakoaana maga eu koakoa pakitano paki noai laapa.

⁸Sidar maga ni roara ki Sup̃e eu da dakiusia mau. Nakau paine arada maga eu da pataka sikai ma arana maga mau. Go nakau plene nasirida maga eu da dakiusi nasirina maga mau. Nakau maga ni roara ki Sup̃e te sikai kakada e da dakusi a mau nalo ni naleomatakiana kakana.

⁹Kinau a mari a e pei tea leomatakiana nalakena nalapaana ni arana maga. Go sara nakau maga ni Eden, waina eu doko roara ki Sup̃e.

¹⁰Nalakena tea wanogoe Yehovah Sup̃e e noa dapala nea, e naga, nalakena e dumana sike a pakilagi po lawo ki namasauaana e doko m̃aleoputo ni nap̃op̃oru maga, go nap̃op̃ona e pei tea tapeana pakilagi nalakena navaraupakilagana kakana.

¹¹Nalakena tea wanogoe kinau aga wo pitua ki nia paki namelearu ni tea kasua ni nalauna maga. Go nae ega wo mari paki nia ega vataka ni nasigsigleoana aneana.Kinau a kopai lua e pano.

¹²Tea ni nalauna p̃ota maga, tea mataukiana warua liu ni nalauna maga eu dae kotovi a. Po doropusi a e doko nasirina maga eu dowo tava maga go sara nap̃aloa maga. Go arana maga eu daperavera doko sar nap̃ap̃a noaisara maga ni navanua, go narei mamau puti ni maramana eu m̃elu dua ki meluna po pano

¹³Manu maga mamau puti ni namalopa euga wo lawo doko tea sapuraki one kakana maga, go nalo tuavati maga mamau puti ni vanua euga natano m̃elu ni arana maga.

¹⁴Go nalakena tea mamauputi wanogoe sara nakau visarasara maga waina eu doko nadigi ni noai maga, te sikai kakada ega wo da moro dum̃ana sike a pakilagi mau, kite dum̃ana lawo ki namasauaana m̃aleoputo ni nap̃op̃ouru maga mau, go nakau maga waina eu munu noai te sikai kakada ega wo da moro pakilagi pa paratiki ki da mau. Nalakena eu mamauputi pei tea vituakiana paki namateana, doko m̃aleoputo naatam̃oli natuda maga sikoti tea maga waina eu siwo paki m̃orutano pano.

¹⁵Yehovah Sup̃e e noa dapala nea e naga, Doko naaleatia waina e siwo paki sheol pano, kinau a mari epua lalagaarova nalo kakana: Kinau a p̃onotigoro noaisara kakana maga noai warua maga eu dap̃a garagara a mari Lebanon e lalagaarova nalo kakana go sara nakau maga ni m̃ala ni nakau makuuku nalakena nalo kakana

¹⁶A mari nalauna maga eu duruuru nasaruruana ni narowoana kakana, ragi waina a nadi ki nia pakitano paki Sheol sikoti tea maga ni Eden, tea matadoaana maga go tea wia liu maga ni Lebanon tea mamau puti waina eu munu noai eu pei tea vakavakaleana doko p̃okasi.

¹⁷Go sara nalauna maga waina eu doko meluna sala vea nara ma eu siwo paki Sheol pano puñusi tea maga waina eu pei atugiana ki lova.

¹⁸Nakau maga ni Eden seve tea kakada e dakiusi ko nalo ni nasamasamaniana go nalo ni nawaruaana? Ma, p̃a wo pei tea viragiana pakitano paki p̃okasi nimu ma nakau maga ni Eden kuga mamau tokora wanogoe p̃a wo maturu m̃aleoputo ni tea maga eu da pei tea tovadaviviana mau, sikoti tea maga waina eu pei tea atugiana ki lova.Tea wanogoe e pei Faraoh go taua warua ni naatamoli aneana maga, Yehovah Sup̃e e noa e.