Read Nguna Togoa Etafe North ESEKIEL 34 Bible Online

ESEKIEL 34 - Nguna Togoa Etafe North bible

ESEKIEL 34

¹Go navasaana ki Yehovah e umai paki nau po naga,

²Naatamoli natuna pa veanoasai dip̃a tea leo paratiki maga ni Israel, pa veanoasai, po noa ki da, paki tea leoparatiki maga wanogoe p̃a naga, Yehovah Sup̃e e noa dapala nea e naga Ai ki tea leo paratiki maga ni Israel waina eu do dum̃ada paganira. Tea leo paratiki maga euga wo da peani shiip maga mau kite?

³Nimu ku gani nam̃aladua, go ku dum̃amu sugoro mu ki wul, ku mari punue tea m̃anopunopu maga. Ma ku da pagani shiip maga mau.

⁴Tea waina e manainai ku da dua e nakasuaana mau, go ku da mari pauri tea waina e sasana mau, go ku da pivisi tea vei wowori maga mau, go ku da piragi lilua ki tea waina e pei tea kopasiluaana pano mau, go ku da laaga tea waina e sasap̃o puoli mau. Ma ku maramara dap̃au ra ki namarikasuaana go ki nasuatoroana.

⁵Go eu daperavera nalakena tea leo parati ki da e dika, go eu po pei navinaga agi nalo tuavati maga mamau puti ni namalasi, go eu daperavera.

⁶Shiip anginau maga eu surata sasap̃o usuraki tava warua maga go doko sara tava vakilagi maga, shiip aginau maga eu daperavera usuraki narae ni maramana mamau go tea waina e leoususi ra kite leo laaga ara e dika.

⁷Nalakaena tea wanogoe tea leoparatiki maga, kuga rogo navasaana ki Yehovah, kinau a mauri.

⁸Yehovah Sup̃e e noa e, go nalakena shiip aginau maga eu po pei tea kati p̃oraeana sikai go shiip aginau eu po pei navinaga agi nalo tuavati maga mamau puti ni namalasi, nalakena tea leo parati ki da e dika, go nalakena tea leoparatiki aginau maga eu da leo laaga shiip aginau maga mau, ma tea leoparatiki maga eu dum̃ada pagani ra po da pagani shiip aginau maga mau.

⁹Nalakena tea wanogoe nimu tea leoparatiki maga kuga rogo navasaana aginau.

¹⁰Yehovah Sup̃e e noa dapala nea e naga kuga leo kinau a mari dip̃a tea leo paratiki maga, go aga wo datagovi shiip aginau maga paki nam̃elearuda, po mari ra euga ta moro pagani shiip maga mau, go tea leoparatiki maga euga wo da moro dum̃ara paganira mau, go aga wo pulua shiip aginau maga m̃elu dua ki nawokada naga euga da moro pei navinaga adeada mau.

¹¹Nalakena Yehovah Sup̃e e noa dapala nea, e naga, kuga leo kinau aga wo dum̃agu leousiusi shiip aginau maga po leo laaga ara.

¹²Dapala waina tea leoparatiki sikai e leo laaga navata aneana ragi waina eu daperavera, dapala nogoe kinau ma aga wo leo laaga shiip aginau maga go aga wo pualua lua ra m̃elu dua ki sara tokora maga waina eu pei tea taperaverakiana ara naaleatia sikai ni napoporu maga go no namaligo wono.

¹³Go aga wo piragi lua ra m̃elu dua ki narei maga, po piragi saisai ki da m̃elu dua ki navanua maga, go aga wo piragi ra umai paki navanua adeada, go aga wo pagani ra tava maga ni Israel, nadigi ni nap̃ap̃a noaisara maga, go tokora wia liu maga mamau puti ni navanua.

¹⁴Go aga wo pagani ra doko napega wia,go loga adeada ega wo doko tava vakilagi maga ni Israel: tokora wanogoe euga wo one natano asa doko loga wia sikai, go euga wo ganikani malo kanikani m̃anopunopu sikai doko tava maga ni Israel.

¹⁵Kinau aga wo dum̃agu pagani shiip aginau, go kinau aga wo mari ra euga one natano, Yehovah sup̃e e noa e.

¹⁶Aga wo leo laga tea waina e sasapo puoli, go aga wo moro piragi lilua ki tea waina epei tea kopasiluana pano, go aga wo pivisi tea waina e maworawora,go aga mari pauri tea waina e sasana: Go aga wo taparaki tea manopunopu go tea kasua, aga wo pagani ra ki navasapotaeana.

¹⁷Go nimu navata aginau o, Yehovah Supe e noa dapala nea nalo kakamu e naga, kuga leo, kinau aga wo pasapotae maleoputo ni shiip go ni shiip, go maleoputo ni shiip anoai maga go ni nainai anoai maga.

¹⁸E da pataka mu mau naga kuga kanikani malo kanikani wia, ma e one mu one naga kuga wo pa puludoa te a kaniana animu waina e dupele ki namelemu, kite? Go waina ku munu noai maarumaga ma e one mu one naga kuga wo pasi paipai loa ki tea waina e dupele ki namelemu kite?

¹⁹Go e one shiip aginau maga one naga euga kani tea waina nimu ku pa puludoa e ki namelemu, po munugi tea waina nimu ku pasi paipai loa ki nia ki namelemu kite?

²⁰Nalakena tea wanogoe Yehovah Supe e noa ki da, e naga kuga leo kinau aga wo dumagu paspotae namawota ni katel manopunopu go ni katel magura.

²¹Nalakena nimu ku die ra ki navidimu go ki napaum, po suai tea manainai maga ki napati ni napaumu, pa pa ku daperaveraki da paki sara tokora.

²²Nalakena tea wanogoe aga wo mauti pauri navata aginau, go euga wo da moro ei tea katiporaeana sikai mau: Go kinau aga wo pasapotae namawota ni shiip.

²³Go aga wo sike lawo ki tea leoparatiki sikai maau dapau ra, tea suasua aginau David, go nae ega wo pagani ra; nae ega wo pagani ra, go ega wo pei tea leoparati ki da.

²⁴Go kinau Yehovah aga wo pei Supe adeada, go tea suasua aginau David ega wo tea maraki doko maleoputo kakada; kinau Yehovah a noa e.

²⁵Go aga wo mari navasasokiana sikai ni natamateana paki da, go aga wo mari nalo tuavati sa maga euga melu dua ki navanua; go euga doko navavatuana doko maspalo po maturu doko mala ni nakau maga.

²⁶Go aga wo mari ra, nara ma tokora maga dalivirigoro tava aginau, euga vei nalakena ni navasamatakiana; go aga wo mari narikiti ega powo ragi kakana; narikiti maga ni navasamatakiana.

²⁷Go nakau ni vanua ega wo dau ki nawana, go natano ega wo pitua ki navinagana go euga wo doko damate doko navanua adeada; go euga wo atae naga kinau a pei Yehovah ragi waina aga wo mari kotovi tea walagoto maga ni nakau ni nanoa adeada, go ragi waina aga wo pualua ra melu dua ki namelearu ni tea maga waina eu mari ra eu pei naviti adeada.

²⁸Go euga wo da moro pei tea vutiluapavakotoana sikai ki tea ni nalauna pota maga mau, go nalo tuavati ni navanua ega wo da dinomi ra mau; ma euga wo doko pia dokogo tea waina ega vakamatakua ki da ega wo dika.

²⁹Go aga wo madeadasike lawo ki tiko ni navinaga, go euga wo da moro mavunvunu ki navitoloana navanua mau, kite pei tea dododaoana ki tea ni nalauna pota maga mau.

³⁰Go euga wo atae naga kinau Yehovah Supe adeada, a doko sikoti ra doko, go naga nara nasuma ni Israel, eu pei narei aginau, Yehovah Supe e noa e.

³¹Go nimu ku pei shiip aginau maga, shiip ni napega aginau, go kinau a pei Supe animu, Yehovah Supe e noa e.