Read Nguna Togoa Etafe North ESEKIEL 36 Bible Online

ESEKIEL 36 - Nguna Togoa Etafe North bible

ESEKIEL 36

¹Go nigo, naatamoli natuna, p̃a veanoasai paki tava maga ni Israel, p̃a naga, nimu tava maga ni Israel, kuga rogo navasaana ki yehovah.

²Yehovah Sup̃e e noa dapala nea, e naga, nalakena tea kokona e pasa dip̃a mu, e naga Aha! Go e moro naga tokora vakilagi maga ni tuai eu pei tea veaniana anigida, tu peani ra.

³Nalakena tea wanogoe p̃a veanoasai, po naga,Yehovah Sup̃e e noa dapala nea, e naga, nalakena eu mari ko ku pei maso maladi doko, po pasi puludoa ki mu daliviri, naga p̃a vei tea veaniana sikai agi nalauna p̃ota maga, go ku pei tea tape takatiana paki nagole ni tea vasa maga, po pei tea vasasaikana ki narei:

⁴Nalakena tea wariogoe, nimu tava maga ni Israel, kuga rogo navasaana ki Yehovah Sup̃e; Yehovah Sup̃e e noa dapala nea paki tava warua maga go paki tava sula maga, paki nap̃ap̃a noaisara maga, go paki nap̃aloa maga, paki maso maladi makaka maga go paki natokoana maga waina eu pei tea toropusiana doko,waina eu po pei tea vutilua pavakotoanasikai go tea vasadoana sikai ki nalauna p̃ota maga waina eu doko daliviri:

⁵Nalakena tea wanogoe Yehovah Sup̃e e noa dapala nea, e naga, doko navivitinuana ni natotowokasuaana aginau, a pasa dip̃a nalauna p̃ota maga, go dip̃a Edom mamau, waina eu dum̃ada noa ki nalaelaeaana ni nap̃op̃oda mamau, go ki nakokoaana ni naatada, naga navanua aginau e pei tea veaniana sikai, naga euga veani a po puti lua pavakoto asa:

⁶Nalakena tea wanogoe, p̃a veanoasai nalo ni navanua ni Israel, go p̃a noa ki tava maga sula maga, ki nap̃ap̃a noaisara maga go ki nap̃aloa maga, p̃a naga Yehovah Sup̃e e noa dapala nea, e naga, kuga leo, kinau a pasa natotowokasuana aginau go namaritausuana aginau, nalakena ku sua navasapinoana ni tea ni nalauna p̃ota

⁷Nalakena tea wanogoe Yehovah Sup̃e e noa dapala nea, e naga kinau a sike nam̃elearugu, doko do naga, tea ni nalauna p̃ota maga waina eu doko dalivirigoroko nara euga wo dum̃ada sua navasapinoana adeada.

⁸Ma nimu tava maga ni Israel, kuga wo siria ki aramu, po dau ki nawamu agi narei aginau Israel nalakena eu pei maladigi naga euga umai.

⁹Nalakena kuga leo kinau a sikoti mu, go aga wo maradoa paki mu, go kuga wo pei tea kiliana, po pei tea lawoana.

¹⁰Go aga wo mari naatam̃oli euga laapa kiamu, nasum̃a ni Israel mamau nogo, tea mamau puti kakana: go naatam̃oli ega moro doko natokoana maga, go tokora makaka maga euga wo moro pei tea tavagipiriana:

¹¹Go aga wo mari naatamoli go nalo tuavati euga wo laapa kiamu: go euga wo pakawora po laapa: go aga wo mari mu kuga wo doko dapala ku doko ragi vea animu maga,po mari p̃ia paki mu liu sala vea animu maga: go kuga wo atae naga kinau a pei Yehovah.

¹²Go aga wo mari naatamoli maga euga surata ako, narei aginau Israel nogo; go euga wo peani ko, go p̃a wo pei tea veani piolikiana adeada, go p̃a wo da moro mari puoli ki natuda maga ki namateana mau.

¹³Yehovah Sup̃e e noa dapala nea, e naga, nalakena eu noa kigo, eu naga, nigo ku dinomi naatam̃oli maga,go ku mari puoli ki nalauna anigo natuda maga ki namateana.

¹⁴Nalakena tea wanogoe p̃a wo da moro dinomi naatam̃oli maga mau, kite mari puoli ki nalauna mau.

¹⁵Yehovah Sup̃e e noa e; Go aga wo da moro suasua ki tea ni nalauna p̃ota maga naga euga moro pasa pinoa ki mu mau, go p̃a wo da moro sua navasadaoananki narei maga mau, po da moro mari nalauna anigo ega tapilagona mau, Yehovah Sup̃e e noa e.

¹⁶Go navasaana Yehovah e moro umai paki nau, po naga.

¹⁷Naatam̃oli natuna, ragi waina nasum̃a ni Israel eu doko navanua adeada doko, eu mari a e pei tea mamaragokiana ki napua adeada go ki natomariana adeada maga: napua adeada naraegu e pei tea mamaragokiana, dakiusi nagoroi sikai doko atelagi aneana.

¹⁸Nalakena tea wanogoe a daki namaritasuana aginau paki da nalakena nada waina nara eu daki nia navanua,go nalakena eu mari ae pei tea mamaragokiana ki nasup̃e adeada maga:

¹⁹Go a daperaveranki da m̃aleoputo ni nalauna maga, go eu pei tea sapurakiana usuraki navanua maga: a pasap̃otae ra pataka ni napua adeada, go pataka ni natomariana adeada maga.

²⁰Go ragi waina eu paki nalauna maga,tokora waina eu paki asa pano eu mari nagisagu tapu e pei tea moli; nalakena naatam̃oli maga eu noa nalo kakada, eu naga, tea maga waia eu pei narei ki Yehovah,ma eu pei tea kopasiluana m̃elu dua ki navanua adeada pano.

²¹Ma kinau a midoa ki nasigisagu tapu, waina nasum̃a ni Israel eu mari m̃oli ki nia m̃aleoputo ni nalauna maga, tokora waina eu paki ara pano.

²²Nalakena tea wanogoe p̃a noa ki nasum̃a ni Israel, p̃a naga, Yehovah Sup̃e e noa dapala nea, e naga kinau a da mari tea waia nalakena nimu nasum̃a ni Israel o, ma nalakena nagisagu tapu, waina nimu ku mari moli ki nia m̃aleoputo ni nalauna maga, tokora waina ku paki ara pano.

²³Go aga wo dapugoro nagisagu waina e p̃arua, waina e pei tea mariana e pei tea m̃oli usuraki nalauna maga, e p̃arua Pa natuna, ragi waina nimu ku mari m̃oli ki nia m̃aleoputo kakada; gonalauna maga euga wo atae naga kinau a pei Yehovah, Yehovah Sup̃e e noa e, ragi waina aga wo pei tea tapugoroana dokoako namatada.

²⁴Nalakena aga wo piragi lua mu pa dua ki m̃aleoputo ni nalauna maga,po piragi saisai ki mu m̃elu dua ki navanua maga mamauputi, po piragi mu umai paki navanua animu.

²⁵GO aga wo meseura ki noia tautau paki mu, go kuga wo tautau: aga wo mari mu kuga tautau pa dua ki tea mamaragokiana mamau animu, go pa dua ki nasup̃e animu maga mamauputi.

²⁶Go aga wo dua mu p̃op̃o vau sikai, go aga wo doropusi naatana vau sikai ega toko nap̃alaumu: go aga wo dape lua p̃op̃o ni vatu m̃elu dua ki nap̃okasimu go aga wo dua mu p̃op̃o sikai ni nap̃okasi.

²⁷Go aga wo doropusinaatagu ega toko nap̃alaumu, po mari mu kuga surata pae natawonakiana aginau maga, go kuga wo pavaigoro navasap̃otaeana aginau maga po mari pataka da.

²⁸Go kuga wo doko navanua waina a dua tamamu maga asa; go kuga wo pei narei aginau, go kinau aga wo pei Sup̃e animu.

²⁹Go aga wo mauti pauri mu m̃elu dua ki tea mamaragokiana animu maga mamau puti: go aga wo soso korn umai, go aga wo mari a ega wo p̃arua, po da dorpusi navitoloana ega toko mu mau.

³⁰Go aga wo mari nakau ega tau p̃arua naga kuga ta moro sua nadodoaoana ni navitoloana m̃aleoputo ni nalauna maga mau.

³¹Ragi wanogoe kuga wo moro midoa ki napua sa animu maga, go natomariana animu maga waina eu p̃ia mau; go kuga wo dum̃amu mamarago ki mu namatamu, nalakena namarinaleotageleana animu maga go nalakena tea mamaragokiana animu maga.

³²E da pei nalakena nimu naga aga mari a mau, Yehovah Sup̃e e noa e, ega vei tea ataeana paki mu: kuga matamaliere po pinovinoi nalakena napua animu maga nasum̃a ni Israel o.

³³Yehovah Sup̃e e noa dapala nea e naga, doko naleatia waina aga wo mari dautau ki mu m̃elu dua ki namarinaleotageleana animu maga mamau puti, aga wo mari naatamoli ega moro doko natokoana maga,go tokora makaka maga euga wo moro pei tea tavagipiriana.

³⁴Go navanua waina e pei maso maladi ega wo pei kiliana, ega ta moro pei maso maladi dokonamata ni tea maga waina eu surata liu sa mau.

³⁵Go euga wo naga, navanua waia waina e pei maso maladi doko e po dakiusi roara ni Eden; go natokoana makaka go maso maladi go sapuraki one maga, eu po pei tea p̃aakagoroana, go naatam̃oli e doko ara.

³⁶Ragi wanogoe nalauna maga waina eu pei tea toropusiana doko dalivirigoro mu, euga wo atae naga kinau Yehovah, kinau a davagi piri tea sapuraki one maga, po lalawo tokora waina e pei maso maladi doko: kinau Yehovah a pasa asa, go kinau aga wo mari a.

³⁷Yehovah Sup̃e e noa dapala nea, e naga, go aga wo suasua ki nasum̃a ni Israel naga euga vusuusu paki nau nalo kakana, naga aga madeada mari a: aga wo mari naatam̃oli adeada maga euga wo disu po laapa dakiusi navata sikai

³⁸Dapala navata raki naviriana, dapala navata ni Yerusalem doko nasaisaiana tatutakiana kakana maga; dapala nogoe natokoana makaka maga euga wo pei tea vakavuroana ki navata maga ni naatam̃oli: go euga wo atae naga kinau a pei Yehovah. Naata ni Yehovah.