Read Nguna Togoa Etafe North ESEKIEL 39 Bible Online

ESEKIEL 39 - Nguna Togoa Etafe North bible

ESEKIEL 39

¹Go nigo naatam̃oli natuna, p̃a veanoasai paki Coc, po naga Yehovah Sup̃e e noa dapala nea, e naga, Pa leo, kinau a mari dip̃a ko, Coc O, tea maraki ni Rosh, Meshek, go Tubal.

²Go aga wo mari ko p̃a liliu pano, po digo ko Pano, go aga wo mari ko p̃a sake pae namatap̃ago edaku maga ni north umai; go aga wo mari ko p̃a mari dip̃a tava maga ni Israel.

³Go aga wo p̃oka lua naasu anigo m̃elu dua ki nam̃elearum̃a ni mawiri, po mari nalua anigo maga euga rowo m̃elu dua ki nam̃elearum̃a ni matua.

⁴Pa wo dowo tava maga ni Israel, nigo go taua maga mamau puti anigo, go narei maga waina eu sikoti ko doko: aga wo pitua kigo paki manu katip̃orae visarasara maga, go paki nalo tuavati maga, naga p̃a vei tea kanidinomiana.

⁵P̃a wo dowo vanua welewela: nalakena kinau a pasa asa, Yehovah Supe e noa e.

⁶Go aga wo dip̃aki lua nakapu sikai dip̃a Macoc, go dip̃a tea maga waina eu dbko navavatuana doko naureure maga: go euga wo atae naga kinau a Pei Yehovah.

⁷Go aga wo mari nagisagu tapu ega vei tea ataeana m̃aleoputo ni narei aginau Israel; go aga wo da moro suasua mau naga nagisagu tapu ega vei tea mariana ega vei tea m̃oli: go nalauna maga euga wo atae naga kinau a pei Yehovah, Tea tapu ki Israel.

⁸P̃a leo, e do umai, go ega wo Pei tea vakavuroana, Yehovah Sup̃e e noa e; e pei naaleatia waina a pasa nalo kakana.

⁹Go tea maga waina eu doko natokoana maga ni Israel euga wo dave pano, go euga wo dokoni nalikau maga ni navakalo euga vei nakapu adeada maga, sila maga go nakokoro maga, naasu maga go nalua maga, go naio vuru maga go naio varau maga, go euga wo mari ra euga vei nakapu adeada natau ega larua.

¹⁰Dapala waina euga wo da p̃owota pae vanua mau, kite dae kotovi nakau sikai mala ni nakau mau; nalakena euga wo dokoni nalikau maga ni navakalo euga vei nakapu adeada maga: go euga wo puti lua pavakoto tea maga waina eu pea puti lua pavakoto ara, po dape pavakoto tea maga waina eu pea dape pavakoto ara, Yehovah Sup̃e e noa e.

¹¹Go ega wo Pakilina naaleatia wanogoe, naga aga wo dua Coc tokora rogoana sikai doko Israel ega vei matigona, nap̃aloa ki tea maga waina eu surata duagoto taleva ni elo sake ni natasi: go ega wo dugoro tea maga waina eu surata duagoto asa: go tokora wanogoe eriga wo ova ki Coc asa, nara ma taua mamau puti aneana: go euga wo soso e ki Nap̃aloa ni Hamon coc.

¹²Go atelagi larua nasum̃a ni Israel euga wo doko ova ki da, naga euga mari navanua ega tautau.

¹³Naatatoko maga mamau puti ni navanua euga wo ova ki da; go ega wo madeada pei nadodomadaganiana sikai naaleatia waina kinau aga wo pei tea samasamaniana asa, Yehovah Sup̃e e noa e.

¹⁴Go euga wo dap̃otawotae naatamoli maga waina euga surata usuraki navanua pitip̃atip̃a, naga euga ova ki tea maga waina eu surata duagoto, waina eu pei tea toropusiana doko narae ni navanua, naga euga mari a ega tautau: atelagi larua euga wo nopu, go euga wo leousiusi.

¹⁵Go nara waina euga surata usuraki navanua, euga wo surata usuraki asa; go ragi waina te sikai kakada ega vunusi navatu sikai ni naataim̃oli, ega wo sike lawo ki navaivaiana sikai nap̃irikiana, pa pa tea ovaki maga euga wo ova ki nia nap̃aloa ni Hamon coc.

¹⁶Go Hamonah ega wo pei nagisa ni natokoana sikai. Dapala nogoe euga wo mari navanua ega tautau.

¹⁷Go nigo naatam̃oli natuna, Yehovah Sup̃e e noa dapala nea, e naga, p̃a vasa paki manu visarasara maga, go paki sara nalo tuavati ni navanua, po naga, kuga tum̃amu saisai ki mu, po umai; kuga saisai daliviri po umai paki naviriana aginau waina kinau aga wo manimu piri ara, naviriana warua sikai doko tava maga ni Israel, naga kuga kani nap̃okasi po munu nada.

¹⁸Kuga wo gani nap̃okasi ni tea kasua maga, po munu nada ni tea maraki maga ni maramana, ni shiip anoai maga, ni shiip natuna maga, go ni naninani maga, go ni kau anoai maga, waina eu mamau puti pei tea m̃anopunopu maga ni Bashan.

¹⁹Go kuga wo gani nap̃eletia pa pa kuga wo puka asa, po munu nada pa pa kuga wo matamaloku asa ni naviriana aginau waina aga wo manimu piri asa.

²⁰Go doko wede ni nakaniana aginau, kuga wo puka ki horse maga go ki tea sakesaake ara maga, ki naatamoli kasua maga, go ki naatamoli visarasara maga ni navakalo, Yehovah Sup̃e e noa e.

²¹Go aga wo lawo ki nasamasamaniana aginau ega toko m̃aleoputo ni nalauna maga, go nalauna maga mamau puti euga wo punusi navasap̃otaeana aginau waina a pakavuro e, go nam̃elearugu waina a nadi ki nia doko ara.

²²Go nasum̃a ni Israel euga wo atae naga kinau a pei Yehovah Supe adeada, pae naaleatia wanogoe pa pa ega tu mau du.

²³Go nalauna maga enga wo atae naga nasum̃a ni Israel e pei tea viragiluapavakotoana pae nalakena namarinaleotageleana adeada: nalakena eu dapiri dip̃a au, go kinau a dasuru ki naraegu pa dua ki da: go a pitua ki da paki namelearu ni tea kokona ki da maga, go eu dowo ki lova, tea mamau puti kakada.

²⁴Kinau a mari paki da pataka ni namariana sa adeada go pataka ni natapiriana adeada maga; go a dasuru ki naraegu pa dua ki da.

²⁵Nalakena tea wanogoe, Yehovah Sup̃e e noa dapala nea, e naga, Sala waia aga wo piragi liliua ki naviragiluapavakotoana ni Yakob, po maritadodomi nasum̃a mamau ni Israel; go aga wo dotowo kasua nalo ni nagisagu tapu.

²⁶Go euga wo dapetape namaliereana adeada, go natapiriana adeada maga mamau puti waina eu dapiri dip̃a au ara, ragi waina euga wo doko navavatuana doko navanua adeada, go te naata ega wo da mari ra namatakuana mau.

²⁷Ragi waina aga wo moro piragi liliua ki da m̃elu dua ki narei maga, po moro piragi saisai ki da m̃elu dua ki navanua maga ki tea kokona ki da maga, go ragi waina aga wo mari natapuana aginau ega wo doko kiada, doko namata ni nalauna laapa.

²⁸Go euga wo atae naga kinau a pei Yehovah Sup̃e adeada, nalakena kinau a mari ra eu pei tea viragiluapavakotoana pano m̃aleoputo ni nalauna maga, go a moro piragi saisai ki da paki navanua adeada; go aga wo da moro doropusi seara kakada euga toko tokora wanogoe doko mau.

²⁹Go aga wo da moro dasuru ki naraegu pa dua ki da mau: nalakena a daki kovai naatagu paki nasum̃a ni Israel, Yehovah Sup̃e e noa e.