Read Nguna Togoa Etafe North ESEKIEL 4 Bible Online

ESEKIEL 4 - Nguna Togoa Etafe North bible

ESEKIEL 4

¹Go nigo, naatam̃oli natuna, p̃a tape brik sikai, po nadi ki nia naraem̃a, go p̃a tae midiri natokoana sikai asa, Yerusalem nogo:

²Go p̃a kelugoro e, po davagi nasum̃a maga ni p̃aaka dip̃a e, po sike nawosiana ni nakelugoroana dip̃a e; p̃a sike lawo ki tap̃aup̃au maga po m̃enakigoro e, po lawo ki nakau lawo p̃orae maga dalivirigoro e.

³Go p̃a tape siloa welewelea sikai ni airon, po lawo ki nia ega vei p̃aaka sikai ni airon namawota kakam̃a go ni natokoana: go p̃a lawo ki namatam̃a eroga leo paki asa, go ega vei tea kelugoroana, nigo p̃a kelugoro e. Tea waia ega wo pei navaivaiana sikai agi nasum̃a ni Israel.

⁴Go p̃a one natano nap̃irikiam̃a ni mawiri, go aga wo sawa ki navaratiana ni nasum̃a ni Israel ega toko ako: pataka ni naveveana ni naaleatia maga waina p̃a wo one tokora wanogoe, p̃a wo dapetape navaratiana adeada.

⁵Nalakena a dua ko naaleatia laapa, naaleatia p̃onotia dolu rualima takuna loveti, eu pitotowo ma naveveana ni natau maga ni navaratiana ni nasum̃a ni Israel.

⁶Go ragi waina p̃a wo pakavuro tea maga wanogoe, p̃a moro one natano nap̃irikiam̃a ni matua, go p̃a wo dapetape navaratiana ni nasum̃a ni Yudah: kinau a manigo dawona ki naaleatia rualima pati, naaleatia sikai dip̃a natau sikai, sikasikai sarasara ra.

⁷Go p̃a lawo ki namatam̃a eroga leo paki nakelugoroana ni Yerusalem, narum̃a ega toko lina; go p̃a veanoasai dip̃a e.

⁸Go p̃a leo, aga wo doropusi natali solisoki maga euga toko ako, go p̃a wo da maradoa paki taleva kite paki taleva mau, pa pa naaleatia anigo maga ni nakelugoroana euga wo pei tea vakavuroana.

⁹Go p̃a tape whiit, go barle, go bin maga, go lentil maga, go millet, go spelt, po pai ra lasa sikai maau, go p̃a tum̃am̃a mari bred ara; ega vataka ni naveveana ni naaleatia maga waina p̃a wo one natano nap̃irikiam̃a, naaleatia p̃onotia dolu rualima takuna loveti, p̃a wo gani a.

¹⁰Go navinaga anigo waina p̃a wo gani a, ega wo pei tea rowogiana ega vei shekel rualima dua naaleatia sikai, sara naaleatia sikasikai.

¹¹Go noai waina p̃a wo munugi a, ega wo pei tea rowogiana, ega vei namagovai kelatesa ni hin sikai, sara naaleatia sikasikai.

¹²Go p̃a wo gani navinaga anigo ega tapala keke maga ni barle, go p̃a wo dao ni a ki natae ni naatam̃oli doko naraeda.

¹³Go Yehovah e naga, Ega tapala nogoe Israel natuna maga euga wo gani navinaga adeada waina e da dautau mau, m̃aleoputo ni nalauna maga waina aga wo daperavera ki da usuraki ara.

¹⁴Go kinau a naga, Yehovah Sup̃e O! P̃a leo, naatagu e da pei tea mariana e loa mau: nalakena pae naaleatia ni navei‐natureai‐ana aginau pa pa paki naaleatia waia, kinau a da gani tea waina e dum̃ana mate mau, kite waina e pei tea kati‐p̃oraeana ki nalo mila maga mau; go nap̃okasi mamaragokiana e da umai paki nawokagu mau.

¹⁵Go e noa ki nau, e naga, P̃a leo, kinau a dua ko natae ni kau oli natae ni naatam̃oli, go p̃a wo mari m̃ata ki navinaga anigo asa.

¹⁶Go e moro noa ki nau, e naga, Naatam̃oli natuna, p̃a leo, aga wo mari p̃oriwori tiko ni navinaga Yerusalem: go euga wo gani bred rowogiana ega vilake namatakuana; go euga wo munu noai rowogiana ega vilake nam̃anaunauana:

¹⁷Naga euga wo dika ki bred go ki noai, po saram̃akoto dum̃ada paki da, po sirinopu namarinaleotageleana adeada.