Read Nguna Togoa Etafe North ESEKIEL 40 Bible Online

ESEKIEL 40 - Nguna Togoa Etafe North bible

ESEKIEL 40

¹Doko natau kerualima dua tamate lima ni navi ragilua pavakoto gidaana, ragi ni naatulakeana ni natau, nakup̃a kerualima ni atelagi, doko natau kerualima sikai tamate pati edaku ki naatugiana ni natokoana, doko naaleatia sikai maau wanogoe, nam̃elearu ni Yehovah e doko au, go e piragi au pano.

²Doko navunusiana maga ki Sup̃e, e piragi au paki navanua ni Israel, po lawo ki nau a doko tava vakilagi liu sikai, go tea waina e pei tea vunusiana e dakiusi natokoana sikai, e pei tea tavagiana doko asa doko taleva ni sauth.

³Go e piragi au pano paki tokora wanogoe, go p̃a leo, naatam̃oli sikai e doko, go naleopunusiana kakana e dapala brass, go namea totowo sikai ni flaks e doko nam̃elearuna, go napati nau totowo sikai; go e lawodu doko namatapua.

⁴Go naatam̃oli wanogoe e noa ki nau, e naga, Naatam̃oli natuda, namatam̃a eroga leo punusi, go nadaligam̃a eroga taki dorogo, go nap̃op̃oma ega vei tea lawokiana paki tea mamau puti waina aga wo Pisei kigo ara; nalakena ku pei tea viragiana umai paki nea naga aga visei kigo arai tea mamau puti waina pa wo punusi ra, p̃a noasai ra paki nasum̃a ni Israel.

⁵Go p̃a leo, p̃aaka sikai e doko etaku ni nasum̃a dalivirigoro e, go napati nau totowo sikai e doko nam̃elearu ni naatam̃oli wanogoe, navarauana kakana kubit latesa, ni kubit sikai go naweleweleana ni nam̃elearu ni naatam̃oli sikai, sikasikai sarasara: go e dowogi namatoluana ni p̃aaka wanogoe, e pei napati nau totowo sikai maau; go navakilagiana kakana e pei napati nau totowo sikai maau.

⁶Go e umai paki namatapua waina e leo paki taleva ni elo sake, po surata sake napua vavadu kakana maga; go e dowogi tea tuasila ni namatapua, naweleweleana kakana e pei napati nau totowo sikai maau: go tea tuasila kerua naweleweleana kakana napati nau totowo sikai maau.

⁷Go em̃ago maga mamau puti navarauana kakada napati nau totowo sikai maau, go naweleweleana kakada napati nau totowo sikai maau, sikasikai sarasara ra; go namalopa waina e doko namawota ni emago maga go ni emago maga e pei kubit lima; go tea tuasila ni namatapua nadigi ni natarataup̃a ni namatapua paki nasum̃a e pei napati nau totowo sikai maau.

⁸Go e moro dowogi natarataup̃a ni namatapua paki nasum̃a, e pei napati nau totowo sikai maau.

⁹Go e moro dowogi natarataup̃a ni namatapua ekopu, e pei kubit latolu; go nakautu kakana maga kubit dua; go natarataup̃a ni namatapua e leo paki nasum̃a.

¹⁰Go em̃ago maga ni namatapua paki taleva ni elo sake, eu dolu taleva sikai kakana, go eu dolu taleva kerua kakana; nara dolu walogoe eu pitotowo: go nakautu maga narowogiana kakada e pataka sikai taleva sikai go taleva kerua.

¹¹Go e dowogi naweleweleana ni namalopa ni namatapua, e pei kubit rualima sikai; go navarauana ni namatapua, kubit rualima sikai tamate dolu;

¹²Go namalopa sikai narae ni emago maga, kubit sikai taleva sikai kakana, go namalopa sikai kubit sikai taleva kerua kakana; go emago maga kubit latesa taleva sikai kakana, go kubit latesa taleva kerua kakana.

¹³Go e dowogi namatapua pae nam̃ago ni em̃ago sikai pano pa pa paki nam̃agoni em̃ago kerua, naweleweleana kakana kubit rualima dua tamate lima; namata duaduru e leana dip̃a nam̃ata duaduru.

¹⁴Go e dowogi natarataup̃a, kubit rualima dua; go roara e doko dalivirigoro natarataup̃a ni namatapua.

¹⁵Go pae narae ni namatapua doko malo duaduru pano pa pa liliu narae ni natarataup̃a ni maleoputo ni namatapua, e pei kubit rualima lima.

¹⁶Go namata leoduru turuturia maga eu doko em̃ago maga, go namalopa maga namawota kakada, go natarataup̃a ekopu kakana daliviri: go paama maga eu pei tea tae midimidiria nakautu maga.

¹⁷Go e piragi au paki roara ni katama, go p̃a leo, em̃ago maga go napara ni vatu sikai e doko daliviri roara wanogoe: em̃ago rualima dolu eu doko napara ni vatu wanogoe.

¹⁸Go napara ni vatu wanogoe e doko nadigi ni namatapua maga, e pitotowo ma navarauana ni namatapua maga, e pei napara ni vatu vakitano.

¹⁹Go e dowogi naweleweleana ni roara namawota ni namatapua vakitano ekopu, go narae ni roara ni m̃aleoputo katama, e pei kubit ponotia sikai, e pataka sikai taleva ni elo sake go taleva ni north.

²⁰Go namatapua ni roara ni katama waina e leo paki north, e dowogi a navarauana kakana go naweleweleana kakana.

²¹Go em̃ago kakana maga eu dolu taleva sikai go eu dolu taleva kerua; go nakautu kakana maga go natarataup̃a kakana maga narowogiana kakada e pataka sikai ma namatapua vea: navarauana kakana kubit rualima lima, go naweleweleana kakana kubit rualima dua tamate lima.

²²Go namata leoduru kakana maga, go natarataup̃a kakana, go nakau paama kakana maga, narowogiana kakada e pataka sikai ma namatapua waina e leo paki taleva ni elo sake; go eu sake paki ekopu pae napua vavadu larua; go natarataup̃a kakana e doko ekopu.

²³Go namatapua sikai e doko roara ni m̃aleoputo, e leana dip̃a namatapua kerua, e pataka sikai taleva ni north go taleva ni elo sake; go e dowogi a pae namatapua sikai pano pa pa liliu namatapua kerua, kubit ponotia sikai.

²⁴Go e piragi au pano paki sauth, go p̃a leo, namatapua sikai taleva ni sauth: Go e dowogi nakautu kakana maga go natarataup̃a kakana, eu pataka sikai ma tea vea maga.

²⁵Go namata leoduru maga eu doko asa go eu doko natarataup̃a daliviri, eu dakiusi namata leoduru vea maga: navarauana kakana kubit rualima lima, go naweleweleana kakana kubit rualima dua tamate lima.

²⁶Go napua vavadu larua waina eu sake paki asa, go natarataup̃a kakana e doko ekopu: go nakau paama maga eu doko nakautu kakana maga, taleva sikai kakana, go taleva kerua kakana.

²⁷Go namatapua sikai e doko roara ni m̃aleoputo paki sauth: go e dowogi a pae namatapua sikai pano pa pa liliu namatapua kerua paki sauth, kubit ponotia sikai.

²⁸Go e piragi au pae namatapua ni sauth umai paki roara ni m̃aleoputo: go e dowogi namatapua ni sauth, go narowogiana kakana e pataka sikai ma tea vea maga;

²⁹Go em̃ago kakana maga, go nakautu kakana maga, go natarataupa kakana, narowogiana kakada maga eu pataka sikai ma tea vea maga: go namata leoduru maga eu doko daliviri asa go eu doko natarataup̃a kakana daliviri: navarauana kakana kubit rualima lima, go naweleweleana kakana kubit rualima dua tamate lima.

³⁰Go natarataup̃a maga eu doko daliviri, navarauana kakada kubit rualima dua tamate lima, go naweleweleana kakada kubit lima.

³¹Natarataup̃a kakana e leo paki roara ni katama; go nakau paama maga eu doko nakautu kakana maga: go napua kakana waina eu sake paki asa, e pei tea vavadu maga eu latolu.

³²Go e piragi au umai paki roara ni maleoputo paki taleva ni elo sake: go e dowogi namatapua kakana, go e pataka sikai ma tea vea maga;

³³Go em̃ago kakana maga, go nakautu kakana maga, go natarataup̃a kakana, narowogiana kakada e pataka sikai ma tea vea maga: go namata leoduru maga eu doko asa go eu doko natarataup̃a kakana daliviri: navarauana kakana kubit rualima lima, go naweleweleana kakana kubit rualima dua tamate lima.

³⁴Go natarataup̃a kakana e leo paki roara ni katama; go nakau paama maga eu doko nakautu kakana maga, taleva sikai kakana, go taleva kerua kakana: go napua sake kakana e peani tea vavadu maga eu latolu.

³⁵Go e piragi au paki namatapua ni north: go e dowogi a, go e pataka sikai ma tea vea maga;

³⁶Emago kakana maga, nakautu kakana maga, go nataratau kakana eu pataka sikai ma tea vea maga; go namata leoduru maga eu doko asa daliviri: navarauana kakana kubit rualima lima, go naweleweleana kakana kubit rualima dua tamate lima.

³⁷Go natarataup̃a kakana e leo paki roara ni katama; go nakau paama maga eu doko nakautu kakana maga, taleva sikai kakana go taleva kerua kakana: go napua sake kakana e peani napua vavadu maga eu latolu.

³⁸Go em̃ago sikai namata duaduru kakana e doko natarataup̃a ni namatapua; tokora wanogoe eu sarue navituaana taparakiana asa.

³⁹Go wede maga eu doko ekopu ni natarataup̃a ni namatapua, edua taleva sikai kakana, go edua taleva kerua kakana, waina eu mari punue navituaana tap̃arakiana ara, go navituaana ni namarinaleosaana, go navituaana ni natapiriana.

⁴⁰Go wede dua ero doko taleva sikai katama, tokora waina eu sake pae asa paki tokora ni nasiliana ni namatapua paki north; go wede dua ero doko taleva kerua ni natarataup̃a ni namatapua.

⁴¹Wede pati eu doko taleva sikai, go wede pati eu doko taleva kerua, nadigi ni namatapua; wede latolu, waina eu mari punue naviriana maga ara.

⁴²Go wede pati ni vatu taeana eu doko waina eu pei tea ni navituaana tap̃arakiana, navarauana kakada kubit sikai go namagovai, go naweleweleana kakada kubit sikai go namagovai, go navakilagiana kakada kubit sikai, sikasikai sarasara ra; waina eu sawaki sara naleo maga ara waina eu mari punue navituaana tap̃arakiana go naviriana ara.

⁴³Go nadigi kakana maga, naweleweleana kakada nam̃elearu sikai eu doko dalivirigoro ra, sikasikai sarasara ra: go nap̃okasini naviriana e doko wede maga wanogoe.

⁴⁴Go e piragi au pae katama umai paki roara ni m̃aleoputo, go p̃a leo, em̃ago dua ero doko roaia ni m̃aleoputo, sikai e doko nadigini namatapua ni north, doko do leo paki sauth, go kerua e doko nadigi ni namatapua ni sauth, doko do leo paki north.

⁴⁵Go e noa ki nau, e naga, em̃ago waia waina e leo paki sauth, e pei agi tea viri maga waina eu pavaigoro naleo paratikiana ni nasum̃a tapu.

⁴⁶Go emago waia waina e leo paki north, e pei agi tea viri maga waina eu pavaigoro naleoparatikiana ni wede ni naviriana: tea maga wanogoe eupei Sadok natuna naanoai maga, waina nara sikida ni naworawora ni Levi eu mariatae paki m̃aladigi ki Yehovah naga euga maneana suasua.

⁴⁷Go e dowogi roara wanogoe, navarauana kakana kubit p̃onotia sikai, go naweleweleana kakana kubit p̃onotia sikai, e pei palapati; go wede ni naviriana e doko kivea ki nasum̃a.

⁴⁸Go e piragi au paki natarataup̃a ni nasum̃a, po dowogi nakautu maga sikasikai ni natarataup̃a, kubit lima taleva sikai kakana, go kubit lima taleva kerua kakana: go naweleweleana ni namatapua e pei kubit dolu taleva sikai kakana, go kubit dolu taleva kerua kakana.

⁴⁹Navarauana ni natarataup̃a e pei kubit rualima dua, go naweleweleana kakana kubit rualima sikai tam̃ate dua; go napua vavadu rualima sikai eu sake paki asa: go tea lawodu maga ero doko nadigi ni nakautu maga, sikai e doko taleva sikai kakana, go kerua e doko taleva kerua kakana.