Read Nguna Togoa Etafe North ESEKIEL 42 Bible Online

ESEKIEL 42 - Nguna Togoa Etafe North bible

ESEKIEL 42

¹Go e piragi au paki roara ni m̃aleoputo, paki taleva ni north: go e piragi au paki em̃ago maga waina eu leo paki roara ni katama, waina e doko taleva ni north kivea ni nasum̃a.

²Navarauana ni nasum̃a taleva ni north e pei kubit p̃onotia sikai, go naweleweleana kakana kubit rualima lima.

³Doko leana dip̃a namalopa ni kubit rualima dua ni roara ni m̃aleoputo, go leana dip̃a napara ni vatu ni roara ni etaku, natarataup̃a e doko leana dip̃a natarataup̃a tagona ketolu kakana.

⁴Go malousiana sikai e doko kivea ki em̃ago maga, naweleweleana kakana kubit rualima sikai, go navarauana kakana kubit p̃onotia sikai; go namata duaduru kakada maga eu leo paki taleva ni north.

⁵Go em̃ago maga ni tagona ni elagi eu kiki nalakena natarataup̃a maga, nalakenatea wanogoe eu da pitotowo ma em̃ago maga ni etano go ni m̃aleoputo.

⁶Nalakena eu pei tagona dolu, go tip̃a maga dakiusi tea maga waina eu doko roara ni katama eu dika ara: nalakena tea wanogoe eu da p̃arua pataka ni tea maga ni etano go ni maleoputo.

⁷Go p̃aaka ni katama waina e pitata ma em̃ago maga, doko do leo paki roara ni katama, leana dipa em̃ago maga, navarauana kakana kubit rualima lima.

⁸Nalakena em̃ago maga waina eu leo paki roara ni katama, navarauana kakada kubit rualima lima, ma tea maga waina eu leana dip̃a nasum̃a tapu, navarauana kakada kubit ponotia sikai.

⁹Go tokora sikai waina eu sili pae asa e doko etano ki em̃ago maga wanogoe taleva ni elo sake doko roara ni katama.

¹⁰Em̃ago maga eu doko p̃aaka ni roara doko namatoluana kakana, taleva ni sauth, leana dip̃a roara go nasum̃a tapu, go malousiana sikai e doko kivea ki da;

¹¹Eu pataka sikai ma em̃ago maga waina eu doko taleva ni north, navarauana kakada go naweleweleana kakada eu pitotowo: go tokora ni natavepanoana kakada maga go namata duaduru kakada maga eu pataka sikai.

¹²Go tokora sikai waina eu sili pae asa e doko etano ki em̃ago maga ni sauth, leana dip̃a p̃aaka waina e doko taleva ni elo sake, e pei napua paki malousiana,

¹³Go e noa ki nau, e naga, em̃ago maga ni north go em̃ago maga ni sauth waina eu doko leana dipa roara, eu pei em̃ago tapu maga, tokora waina tea viri maga waina eu paki m̃aladigi ki Yehovah euga wo gani navituaana tapu liu maga asa; tokora wanogoe navituaana tapu liu maga euga wo pei tea toropusiana asa, navituaana ni korn, navituaana ni namarinaleosaana, go navituaana ni natapiriana, nalakena tokora wanogoe e dapu.

¹⁴Ragi waina tea viri maga euga sili paki ekopu ni tokora tapu wanogoe, euga wo da moro m̃elu dua ki nia po dave paki roara ni katama pano mau, ma euga wo pea sawo lua tea suniana adeada maga waina eu suni ra ragi waina eu mari nawosiana ni nasuasuaana, po doropusi ra euga toko tokora wanogoe doko, nalakena nara eu dapu; go euga wo suni tea suniana p̃ota maga po edaku pano paki maladigi ki naleo maga waina eu pei agi narei.

¹⁵Go e dowogi sua ekopu ni nasum̃a tapu, go e piragi lua au pano pae napua ni namatapua waina e leo paki taleva ni elo sake, go e dowogi roara ni nasum̃a tapu daliviri.

¹⁶E dowogi a taleva ni elo sake ki napati nau totowo, go e pei kubit ponotia lima.

¹⁷Go e dowogi a taleva ni north ki napati nau totowo, go e pei kubit p̃onotia lima.

¹⁸Go e dowogi a taleva ni sauth ki napati nau totowo, go e pei kubit ponotia lima.

¹⁹Go e dowogi a taleva ni elo musu ki napati nau totowo, go e pei kubit p̃onotia lima.

²⁰E dowogikokoi pati kakana: go p̃aaka sikai e dalivirigoro e, navarauana kakana kubit p̃onotia lima, go naweleweleana kakana kubit p̃onotia lima, e dap̃otae tea waina e dapu, go tea waina e moli.