Read Nguna Togoa Etafe North ESEKIEL 5 Bible Online

ESEKIEL 5 - Nguna Togoa Etafe North bible

ESEKIEL 5

¹Go nigo, naatam̃oli natuna, p̃a tape lova makali sikai, ega makali dapala masimasi sikai ki tea masi nasi ni naatam̃oli, go p̃a masi nap̃aum̃a asa go nalolu ni nasim̃a: go p̃a tape vatu rowogi, po dap̃otawotae nalolum̃a wanogoe.

²Namagovai ketolu kakana p̃a tap̃ara ki nia ki nakapu m̃aleoputo ni natokoana, ragi waina naaleatia maga ni nakelugoroana euga wo pei tea vakavuroana; go p̃a tape namagovai ketolu kakana, po atugi a ki lova daliviri; go namagovai ketolu kakana p̃a sapura ki nia paki nalagi, go aga wo sai lua lova sikai edaku ki da.

³Go p̃a tape tea visa maau m̃elu ara, po kalutigoro ra ki sugoro kovagoro anigo.

⁴Go ki tea maga wanogoe p̃a moro dape kovai a, po nadi ki nia paki m̃aleoputo ni nakapu, po dap̃ara ki nia nakapu; nakapu sikai ega wo m̃elu asa po paki nasum̃a mamau ni Israel.

⁵Yehovah Sup̃e e noa dapala nea, e naga, Tea waia e pei Yerusalem: kinau a lawo ki nia e doko m̃aleoputo ni nalauna maga, go navanua maga eu doko dalivirigoro e.

⁶Go nae e mari p̃auluulu dip̃a navasap̃otaeana aginau maga, doko do mari nasigisigileoana warua liu nalauna maga, go e mari p̃auluulu dip̃a natawonakiana aginau maga p̃arua liu navanua maga waina eu doko dalivirigoro e: nalakena eu dip̃adoa navasap̃otaeana aginau maga, go eu da surata napua ni natawonakiana aginau maga mau.

⁷Nalakena tea wanogoe Yehovah Sup̃e e noa dapala nea, e naga, Nalakena nimu ku mari p̃auluulu p̃arua liu nalauna maga waina eu doko dalivirigoro mu, go ku da surata napua ni natawonakiana aginau maga mau, kite pavaigoro navasap̃otaeana aginau maga mau, kite mari pataka ni natip̃akiana maga ni nalauna maga waina eu doko dalivirigoro mu mau;

⁸Nalakena tea wanogoe Yehovah Sup̃e e noa dapala nea, e naga, P̃a leo, kinau, kinau ma a mari dip̃a ko; go aga wo mari navasap̃otaeana maga m̃aleoputo kakam̃a namata ni nalauna maga.

⁹Go nalakena tea mamaragokiana maga mamau puti anigo, aga wo mari paki‐go ki tea waina a da pea mari a mau, go waina aga wo da moro mari a mau.

¹⁰Nalakena tea wanogoe tamada maga euga wo gani natuda maga m̃aleoputo kakam̃a, go natuda maga euga wo gani tamada maga; go aga wo mari navasap̃otaeana maga doko ako, go namagovai mamau anigo waina kuga wo pei tea toropusiana doko, aga wo sapura ki nia paki nalagi maga mamau puti.

¹¹Nalakena tea wanogoe Yehovah Sup̃e e noa dapala nea, e naga, Kinau a mauri, go nalakena ku mari tokora tapu aginau e loa ki tea karaikitaana anigo maga mamau puti, go ki tea mamaragokiana anigo maga mamau puti, nalakena tea wanogoe kinau ma aga wo daelua ko; namatagu ega wo da mari malemale mau, go aga wo da maritadodomi mau.

¹²Namagovai ketolu kakam̃a ega wo mate ki nasasanaana sa, po mavunuvunu ki navitoloana m̃aleoputo kakam̃a; go namagovai ketolu kakam̃a ega wo dowo ki lova dalivirigoro ko; go namagovai ketolu kakam̃a aga wo sapura ki nia paki nalagi maga mamau puti, go aga wo sai lua lova sikai edaku ki da.

¹³Dapala nogoe namaetoana aginau ega wo pei tea vakavuroana, go aga wo mari namaritausuana aginau ega wo lawo ara, go aga wo maro asa: go euga wo atae naga kinau Yehovah a pasa doko nasuisuiana aginau, ragi waina aga wo pakavuro namaritausuana aginau dip̃a ra.

¹⁴Go aga wo mari ko p̃a wo pei maso maladi sikai, go tea vasapinoaana sikai m̃aleoputo ni nalauna maga waina eu doko dalivirigoro ko, namata ni tea mamau puti waina eu do liu pano.

¹⁵Go ega wo pei tea vasapinoaana sikai, go tea vasasaudoakiana sikai, tea ni natapavanauana sikai go tea ni nasaram̃akotoana sikai paki nalauna maga waina eu doko dalivirigoro ko, ragi waina aga wo mari navasap̃otaeana maga doko ako doko namaetoana go doko namaritausuana, go doko navasadip̃aana kokona maga: kinau Yehovah a noa e:

¹⁶Ragi waina aga wo dip̃aki lua dip̃a ra nalua sa maga ni navitoloana waina eu pei tea ni namate‐puolikiana, waina aga wo dip̃aki lua ra pano naga euga wo mari puoli ki mu; go aga wo mari navitoloana ega wo moro p̃arua liu paki mu, po mari p̃oriwori tiko ni navinaga animu;

¹⁷Go aga wo dip̃aki lua dip̃a mu navitoloana, go nalo mila sa maga, go nara euga wo mari natumu maga euga wo puoli ki mu ki namateana; go nasasanaana sa go nada eroga wo surata usuraki m̃aleoputo kakam̃a; go aga wo mari lova ega wo doko ako: kinau Yehovah a noa e.