Read Nguna Togoa Etafe North ESEKIEL 6 Bible Online

ESEKIEL 6 - Nguna Togoa Etafe North bible

ESEKIEL 6

¹Navasaana ki Yehovah e umai paki nau,

²po naga, Naatam̃oli natuna, p̃a lawo ki naraem̃a paki tava maga ni Israel, po peanoasai paki da.

³P̃a naga, Tava maga ni Israel O, kuga rogo navasaana ki Yehovah Sup̃e: Yehovah Sup̃e e noa dapala nea paki tava warua maga go paki tava sula maga, paki nap̃ap̃a noaisara maga go paki nap̃aloa maga, e naga, Kuga leo, kinau aga wo piragi lova sikai umai paki mu, go aga wo mari puoli ki tokora vakilagi animu maga.

⁴Go wede ni naviriana animu maga euga wo makaka, go wede ni naviriana ni tea ni nap̃o wia animu maga euga wo pei tea mari‐p̃oraworaeana: go aga wo nadi ki naatam̃oli maripunueana animu maga pakitano narae ni idolo animu maga.

⁵Go aga wo lesi nap̃atoko mate maga ni Israel natuna maga narae ni idolo adeada maga; go aga wo daperavera ki navatuda maga dalivirigoro wede ni naviriana animu maga.

⁶Doko sara tokora waina nimu ku doko ara doko, natokoana maga euga wo makaka, go tokora vakilagi maga euga wo pei maso maladi; go wede ni naviriana animu maga euga wo makaka po pei maso maladi, go idolo animu maga euga wo pei tea mari‐p̃oraworaeana po makoto, go wede maga ni naviriana ni tea ni nap̃o wia euga wo pei tea tae‐kotokotoviana, go nawosiana animu maga euga wo pei tea mari‐puoli‐kiana.

⁷Go tea maripunueana maga euga wo dowo m̃aleoputo kakamu, go kuga wo atae naga kinau a pei Yehovah.

⁸Ma aga wo doropusi namagovai sikai ega wo doko; euga wo sava m̃elu dua ki lova, go aga wo daperavera ki da usuraki nalauna maga.

⁹Go nimu waina kuga vei tea mautiana, kuga wo midoa ki parati ki nau m̃aleoputo ni nalauna maga tokora waina kuga wo pei tea viragi‐luapavakotoana paki ara pano, nalakena aga wo mari p̃orae nap̃op̃o‐masausaraana adeada waina e m̃elu dua ki nau pano, po mari namatada maga euga wo kesa nalakena eu maripele dausi idolo adeada maga: go euga wo dum̃ada mamarago ki da namatada nalakena namarinaleosaana maga waina eu mari naleo sa asa, nalakena tea mamaragokiana adeada maga mamau puti.

¹⁰Go euga wo atae naga kinau a pei Yehovah: a da noa m̃oli ki nia mau naga aga wo mari nasaana waia paki da.

¹¹Yehovah Sup̃e e noa dapala nea, e naga, P̃a tapap̃osawosa ki nam̃elearum̃a, go p̃a vasi ki natuam̃a, po naga, Awi! Nalakena tea mamaragokiana sa maga mamau puti ni nasum̃a ni Israel: nalakena euga wo dowo ki lova, go ki navitoloana, go ki nasasanaana sa.

¹²Naata waina e doko uvea ega wo mate ki nasasanaana sa; go naata waina e doko m̃aladigi ega wo dowo ki lova; go naata waina e pei tea toropusiana e mauri doko, ega wo mate ki navitoloana: dapala nogoe aga wo pakavuro namaritausuana aginau paki da.

¹³Go kuga wo atae naga kinau a pei Yehovah, ragi waina naatam̃oli maripunueana adeada maga euga wo one m̃aleoputo ni idolo adeada maga dalivirigoro wede ni naviriana adeada maga, go nam̃asua ni sara tava vakilagi, go nap̃au mamau puti ni tava warua maga, go etano ki sara nakau mamalakesa, go etano ki sara nakau matolu ni oak, tokora waina eu pitua ki navituaana ni tea ni nap̃o wia asa paki idolo adeada maga mamau puti.

¹⁴Go aga wo sai ki nam̃elearugu dip̃a ra, po mari navanua ega wo pei maso maladi, po makaka, pae masop̃alo pano pa pa liliu Diblah, usuraki tokora tokoana adeada maga mamau puti: go euga wo atae naga kinau a pei Yehovah.