Read Nguna Togoa Etafe North ESEKIEL 7 Bible Online

ESEKIEL 7 - Nguna Togoa Etafe North bible

ESEKIEL 7

¹Go navasaana ki Yehovah e umai paki nau,

²po naga, Go nigo, naatam̃oli natuna O, Yehovah Sup̃e e noa dapala nea paki navanua ni Israel, e naga, Te nou: namatap̃agona edaku e po pa parati ki naweluki pati ni navanua.

³Go ragi waia namatap̃agona edaku e pa parati ki‐go, go aga wo dip̃aki lua namaetoana aginau paki‐go, go aga wo pasap̃otae ko ega vataka ni natomariana anigo maga; go aga wo lagati dua ko ega vae tea mamaragokiana anigo maga mamau puti.

⁴Go namatagu ega wo da mari malemale ko mau, go aga wo da maritadodomi mau: ma aga wo mari natomariana anigo maga euga wo liliu paki‐go, go tea mamaragokiana anigo maga euga wo doko m̃aleoputo kakam̃a: go kuga wo atae naga kinau a pei Yehovah.

⁵Yehovah Sup̃e e noa dapala nea, e naga, Namarisakiana ega wo dausi namarisakiana! P̃a leo, e do umai.

⁶Namatap̃agona edaku e po umai, namatap̃agona edaku e po umai, e do leleogoro dip̃a ko; p̃a leo, e do umai.

⁷Ragi ni natip̃akotoviko‐ana e po pakilina ki‐go, naatatoko ni navanua O: ragi e po umai, naaleatia e pei m̃aladigi; naaleatia sikai ni narogokitesaana doko tava maga, e da pei tea ni namarip̃araiana ni nalaelaeaana mau.

⁸Go ragi kiki waia aga wo daki lua namaritausuana aginau paki‐go, po pakavuro namaetoana vivitinu aginau dip̃a ko, go aga wo pasap̃otae ko pataka ni napua anigo maga; go aga wo lagati dua ko tea mamaragokiana anigo maga mamau puti.

⁹Go namatagu ega wo da mari malemale mau, go aga wo da maritadodomi mau: aga wo lagati dua ko ega vae napua anigo maga, go tea mamaragokiana anigo maga euga wo doko m̃aleoputo kakam̃a; go kuga wo atae naga kinau a pei Yehovah, go naga a do atugi.

¹⁰P̃a leo, naaleatia wanogoe, p̃a leo, e do umai: ragi ni natip̃akotoviko‐ana e po pakilina; tiko e pum̃a, naleomadagaana e siria.

¹¹Namaripavakotoana e ulua sake po pei tiko ni nasigisigileoana; te seara kakada euga wo da pei tea toropusiana doko mau, kite te seara ni naloriki adeada maga, kite ni nasogolapaana adeada: go te naata sikai ega wo da dagisi ra mau.

¹²Ragi e po umai, naaleatia e disu paki m̃aladigi: tea vakokoto ega ta laelaea mau, go tea sosori ega ta susue mau: nalakena namaritausuana e do pavaga dip̃a taua kakada mamau puti.

¹³Nalakena tea sosori ega wo da liliu paki tea waina e pei tea soriana mau; euga wo mamau puti mari naleo sa, po da peani nakasuaana asa mau.

¹⁴Eu sui paiga, go eu marisokisoki; ma te naata e da paki navakalo pano mau: nalakena namaritausuana aginau e do pavaga dip̃a taua kakada mamau puti.

¹⁵Lova e doko etaku, go nasasanaana sa go navitoloana ero doko m̃aleoputo: naata waina e doko vanua ega wo mate ki lova; go naata waina e doko natokoana, navitoloana go nasasanaana sa eroga wo mari puoli ki nia.

¹⁶Go te seara kakada eu pe vei tea mautiana eu pe mauri, eu pe wo doko tava maga dakiusi tokopea maga ni nap̃aloa maga, euga wo gi, sara naata sikasikai namarinaleotageleana adeada.

¹⁷Nam̃elearuda maga mamau puti euga wo manainai, go nap̃atuada maga mamau puti euga wo sarumate.

¹⁸Go euga wo dum̃ada dasoki ra ki nakulukulu ni sak, go nasaram̃akotoana ega wo dap̃augoro ra; go namatamaliereana ega wo doko naraeda, go nam̃asuaana ega wo doko nap̃auda.

¹⁹Euga wo nadi ki silver adeada pakitano napua maga ni natokoana, go kold adeada ega wo dakiusi naleo p̃alo sikai; silver adeada go kold adeada euga wo da mariatae pualua ra mau naaleatia ni namaritausuana ki Yehovah; euga wo da paka maromaro ki naatada asa, kite pakavuro namaritada maga asa mau: nalakena e pei tea tapilagonaana ni namarinaleotageleana adeada.

²⁰Go naleo ni narekeikiana leom̃atakiana adeada e pei tea ni nasamasamaana p̃alo: ma eu mari nunu maga ni tea mamaragokiana adeada maga go naleo karaikitaana adeada maga asa: nalakena tea wanogoe aga wo mari a ega vei naleo p̃alo sikai paki da.

²¹Go aga wo pitua ki nia paki nam̃elearu ni tea ni nalauna p̃ota maga, ega vei tea vuti‐lua‐pavakotoana sikai, go paki tea sigisigileo ni maramana ega vei tea tape‐pavakotoana sikai; go nara euga wo mari a ega vei tea m̃oli.

²²Go aga wo doa naraegu pa dua ki da, go euga wo mari tokora tapu aginau ega vei tea m̃oli: go tea tape pavakoto maga euga wo paki ekopu kakana, po mari a ega vei tea m̃oli.

²³Kuga mari namori ni vatu: nalakena navanua e pura ki nada, go natokoana e pura ki namaripavakotoana.

²⁴Nalakena tea wanogoe aga wo piragi umai tea ni nalauna p̃ota maga tea sa liu kakada, go nara euga wo peani pioli ki nasum̃a adeada maga: go aga wo mari navei‐p̃op̃o‐vakilagiana ni tea kasua maga ega makoto; go tokora tapu adeada maga euga wo pei tea mariana euga vei tea m̃oli.

²⁵Narogokitesaana ega wo umai; go euga wo laaga natam̃ateana, go ega wo dika.

²⁶Namarisakiana ega wo dausi namarisakiana, go narogoana ega wo dausi narogoana; go euga wo laaga naveanoasaiana pae profeta; ma natapavanauana ega wo puoli ki tea viri, go namidoaki‐p̃otaeana ega wo m̃elu dua ki tea matua maga.

²⁷Nawota ega wo susue, go tea maraki ega wo pei tea sugoroana ki narogokitesaana, go nam̃elearu ni narei ni navanua ega wo duruuru: aga wo mari paki da ega vataka ni napua adeada maga, go aga wo pasap̃otae ra navasap̃otaeana adeada maga; go euga wo atae naga kinau a pei Yehovah.