Read Nguna Togoa Etafe North ESEKIEL 8 Bible Online

ESEKIEL 8 - Nguna Togoa Etafe North bible

ESEKIEL 8

¹Go e pakilina natau kelatesa, atelagi kelatesa kakana, nakup̃a kelima ni atelagi, ragi waina kinau a dasake doko ekopu ni nasum̃a aginau, go tea matua maga ni Yudah eu dasake doko naraegu, naga nam̃elearu ni Yehovah Sup̃e e dowo paki nau tokora wanogoe.

²Go a leo punusi, go p̃a leo, tea waina e pei tea vunusiana e dakiusi nakapu vavaga; pae tea waina e pei tea vunusiana e dakiusi namalona go pakitano, e pei nakapu vavaga: go pae namalona go pakilagi, e pei tea vunusiana e dakiusi nalagaana, e lidalida dapala brass.

³Go e sai ki tea waina e pei tea vunusiana e dapala nam̃elearu sikai, po puasoki au ki navutilolu ni nap̃augu; go naatana e dape au sake namawota ni maramana go ni nakoroatelagi, go doko navunusiana maga ki Sup̃e, e piragi au paki Yerusalem, paki namasova ni namata‐pua ni roara ni m̃aleoputo waina e leo paki north; tokora waina malo tasake ki nasup̃e ni natotowo‐kasuaana e doko asa, waina e do pakadali ki Yehovah po do mari a e dotowo kasua.

⁴Go p̃a leo, nasamasamaana ni Sup̃e ki Israel e doko tokora wanogoe, e dakiusi navunusiana waina a punusi a doko nap̃aloa.

⁵Go e noa ki nau, e naga, Naatam̃oli natuna, p̃a sike namatam̃a po leo paki north. Go a sike namatagu po leo paki north, go p̃a leo, nasup̃e ni natotowo‐kasuaana wanogoe e lawodu namasova ni namata‐pua ni wede ni naviriana paki north.

⁶Go e noa ki nau, e naga, Naatam̃oli natuna, ku punusi tea waina nara eu do mari a, kite? Ku punusi tea mamaragokiana warua maga waina nasum̃a ni Israel eu do mari ra tokora waia, naga euga kopasi lua au m̃elu dua ki tokora tapu aginau pano, kite? Ma p̃a roa, go p̃a wo punusi tea mamaragokiana maga waina eu p̃arua do liu.

⁷Go e piragi au umai paki namata duaduru ni roara; go a leo punusi, go p̃a leo, m̃oru sikai e doko p̃aaka ni nasum̃a.

⁸Go e noa ki nau, e naga, Naatam̃oli natuna, p̃a kili p̃aaka ni nasum̃a: go a kili p̃aaka ni nasum̃a, go p̃a leo, e pei namata duaduru sikai.

⁹Go e noa ki nau, e naga, P̃a vaki ekopu, po punusi tea mamaragokiana sigisigileo maga waina eu do mari ra tokora waia.

¹⁰Go a paki ekopu po leo punusi a; go a punusi nunu ni naleo kakaravi visarasara maga mamau puti; go ni nalo tuavati mamaragokiana maga, go ni idolo maga mamau puti ni nasum̃a ni Israel, eu pei tea midiriana namalo ni nasum̃a daliviri.

¹¹Go tea matua maga ni nasum̃a ni Israel naatam̃oli rualima larua kakada eu lawodu naraeda, go Yaasaniah natu ni Shafan e lawodu m̃aleoputo kakada, go lasa ni tea ni nap̃o wia e doko nam̃elearuda sikasikai sarasara ra; go nap̃o ni naasua ni tea ni nap̃o wia e sake pano.

¹²Go e noa ki nau, e naga, Naatam̃oli natuna, ku punusi tea waina tea matua maga ni nasum̃a ni Israel eu do mari a namaligo, eu do mari a ekopu ni em̃ago ni nunu adeada maga, kite? Nalakena eu naga, Yehovah e da punusi gida mau; Yehovah e doropusi navanua.

¹³Go e moro noa ki nau, e naga, P̃a maradoa, go p̃a wo moro punusi tea mamaragokiana maga waina eu do mari ra, waina eu moro p̃arua do liu.

¹⁴Go e piragi au umai paki namasova ni namata‐pua ni nasum̃a ki Yehovah, waina e paki north; go p̃a leo, nagoroi maga eu doko natano tokora wanogoe, eu do dagisi Tamus.

¹⁵Go e noa ki nau, e naga, Ku punusi tea wanae, naatam̃oli natuna O? P̃a wo moro punusi tea mamaragokiana maga waina eu moro p̃arua do liu tea maga wanogoe.

¹⁶Go e piragi au umai paki roara ni m̃aleoputo ni nasum̃a ki Yehovah, go p̃a leo, naatam̃oli e alagoro pei rualima dua tamate lima eu doko namata duaduru ni nasum̃a tapu ki Yehovah, namawota ni natarataup̃a go ni wede ni naviriana, natakuda eu paki nasum̃a tapu ki Yehovah, go naraeda eu paki taleva ni elo sake; go eu lotu ki elo paki taleva ni elo sake.

¹⁷Go e noa ki nau, e naga, Ku punusi tea wanae, naatam̃oli natuna O? E pei tea m̃oli paki nasum̃a ni Yudah naga eu do mari tea mamaragokiana maga waina eu do mari ra tokora waia, kite? Nalakena eu mari navanua e pura ki namaripavakotoana, go eu moro mari p̃auluulu po moro mari au a maeto: go p̃a leo, eu doro ara ni nakau paki nagisuda.

¹⁸Nalakena tea wanogoe kinau aga wo maritausu paki da: namatagu ega wo da mari malemale mau, go aga wo da maritadodomi mau: go eu pe vioso nadaligagu ki nadaleo kasua sikai, ma kinau a pe wo da daki dorogo paki da mau.