Read Nguna Togoa Etafe North ESEKIEL 9 Bible Online

ESEKIEL 9 - Nguna Togoa Etafe North bible

ESEKIEL 9

¹Go e pioso nadaligagu ki nadaleo kasua sikai, po naga, Kuga umai paki m̃aladigi, nimu tea viviatu maga waina ku pei tea tap̃au maga dap̃au natokoana, nalikau maga ni namarisakiana euga toko nam̃elearumu sikasikai sarasara mu.

²Go p̃a leo, naatam̃oli latesa eu rumai pae napua ni namata‐pua ni elagi waina e paki north, nalikau maga ni naatugiana eu doko nam̃elearuda sikasikai sarasara ra; go naatam̃oli sikai e doko m̃aleoputo kakada, e pei tea sugoroana ki sugoro ni linen, go lasa sikai ni noai loa ki tea midiri e doko nap̃irikiana sikai. Go eu paki ekopu, po lawodu nadigi ni wede ni naviriana ni brass.

³Go nasamasamaana ni Sup̃e ki Israel e sake pa dua ki kerubim waina e doko asa, paki tea tuasila ni namata ni nasum̃a: go e pioso paki naatam̃oli waina e pei tea sugoroana ki linen, waina lasa ni noai loa ki tea midiri e doko nap̃irikiana sikai.

⁴Go Yehovah e noa ki nia, e naga, P̃a vano po surata duaduru natokoana, duaduru m̃aleoputo ni Yerusalem, go p̃a toropusi wotu sikai narae ni naatam̃oli maga waina eu do mamarago ki po do gi nalo ni tea mamaragokiana maga mamau puti waina eu do pei tea mariana m̃aleoputo kakana.

⁵Go e noa ki tea p̃ota kakada maga, go kinau a dogo e, e naga, Kuga rausi a duaduru natokoana, po atugi: namatamu ega ta mari malemale mau, go kuga ta maritadodomi mau:

⁶Kuga atugi namariki, go natureai, go naatara, go piakirikiri maga go nagoroi maga: ma kuga ta kisidogo te naata sikai waina wotu e doko asa mau; go kuga atulake asa tokora tapu aginau. Go eu pae asa atugi tea matua maga waina eu doko narae ni nasum̃a.

⁷Go e noa ki da, e naga, Kuga mari nasum̃a ega vei tea m̃oli, po mari roara maga euga vura ki tea atugiana maga: kuga vano. Go eu pano, po atugi natokoana.

⁸Go e pakilina, ragi waina eu do atuatu, go kinau a pei tea toropusiana doko, naga a dowo dap̃olosiwo, po pioso, po naga, Yehovah Sup̃e O! P̃a wo mari puoli ki namagovai mamau puti ni Israel natakiana ni namaritausuana anigo paki Yerusalem, kite?

⁹Go e noa ki nau, e naga, Namarinaleotageleana ni nasum̃a ni Israel go Yudah e p̃arua p̃arua liu, go navanua e pura ki nada, go natokoana e pura ki namarimalauwelukiana: nalakena eu naga, Yehovah e doropusi navanua, go Yehovah e da punusi a mau.

¹⁰Go kinau, namatagu ega wo da mari malemale mau, go aga wo da maritadodomi mau, ma aga wo liliua ki napua adeada ega wo liliu paki nap̃auda.

¹¹Go p̃a leo, naatam̃oli waina e pei tea sugoroana ki linen, waina lasa ni noai loa ki tea midiri e doko nap̃irikiana sikai, e dogorogo paki nia, po naga, Kinau a mari pataka ni tea waina ku dip̃aki nau asa, go e nopu.