Read Nguna Togoa Etafe North DANIEL 6 Bible Online

DANIEL 6 - Nguna Togoa Etafe North bible

DANIEL 6

¹E pei tea wia narae ni Darius naga ega vusake dap̃au namarakiana satrap p̃onotia sikai rualima takuna dua, waina euga toko usuraki namarakiana mamau;

²go dap̃au tea maga wanogoe nap̃au nawota dolu, waina Daniel e pei sikai kakada; naga satrap maga wanogoe euga atusi paki da, go naga nawota ega ta sua te natapepuolikiana mau.

³Ragi wanogoe Daniel wanogoe e marimatua liu nap̃au nawota maga go satrap maga, nalakena naatana tatap̃au sikai e doko asa; go nawota e midoa ki nia naga ega vusake a ega tap̃au namarakiana mamau.

⁴Ragi wanogoe nap̃au nawota maga go satrap maga eu laaga naga euga vap̃ai nalakena sikai dip̃a Daniel nalo ni namarakiana; ma eu marisa pap̃ai te nalakena kite te namariana madada; nalakena nae e pei lomau, go te namariana pele kite te namariana madada e da pei tea vap̃aiana asa mau.

⁵Ragi wanogoe naatam̃oli maga wanogoe eu noa, Tuga wo da pap̃ai te nalakena dip̃a Daniel waia mau, mase tuga wo pap̃ai a dip̃a e nalo ni nawotaeana ki Sup̃e aneana.

⁶Ragi wanogoe nap̃au nawota maga wanogoe go satrap maga wanogoe eu saisai midi pa punusi nawota, po noa ki nia dapala waia, Nawota Darius, p̃a mauri doko mau doko.

⁷Nap̃au nawota mamau puti ni namarakiana, tea maramara oli maga, go satrap maga, tea vusum̃aki maga, go tea maraki namagovai maga, eu pusum̃aki dum̃ada paki da naga euga tawona ki natawonakiana sikai ki nawota, po lawosoki natip̃agoroana sikai naga te naata e pe tatago ki te natatagoana sikai paki te sup̃e sikai kite paki te naatam̃oli sikai te naaleatia sikai pa pa paki naaleatia rualima dolu, ma ega tatagovi ko, nawota O, ega vei tea nadikiana paki nap̃aloa ni laion maga.

⁸Ragi waia, nawota O, p̃a lawosoki natip̃agoroana wanogoe, go p̃a midirisoki namidiriana wanogoe, naga ega ta pei tea mariana ega vanop̃ota mau, ega tapala nawotaeana ki naka ni Media go ki naka ni Persia, waina e da pano puoli mau.

⁹Nalakena tea wanogoe nawota Darius e midirisoki namidiriana wanogoe go natip̃agoroana wanogoe.

¹⁰Go Daniel ragi waina e atae naga namidiriana wanogoe e pei tea midirisokiana sua, e paki ekopu ni nasum̃a aneana; (go namata leoduru kakana maga ni em̃ago ni elagi kakana waina e leo paki Yerusalem eu dap̃olaga doko;) go nae e paka tolu naaleatia sikai ditip̃atua ki nap̃atuana maga, po dapasavasa, po pasadodom̃ata ki narae ni Sup̃e aneana, nalakena nae e do mari dapala nogoe sala vea.

¹¹Ragi wanogoe naatam̃oli maga wanogoe eu saisai midi po pap̃ai Daniel e do dapasavasa po datago nasaup̃iaana narae ni Sup̃e aneana.

¹²Ragi wanogoe eu rumai paki m̃aladigi, po pasa narae ni nawota nalo ni natip̃agoroana ki nawota; Ku da midirisoki natip̃agoroana sikai, naga sara naatam̃oli waina euga wo datagovi te sup̃e sikai kite te naatam̃oli sikai te naaleatia sikai pa pa paki naaleatia rualima dolu, ma euga tatagovi ko, nawota O, euga vei tea nadikiana paki nap̃aloa ni laion maga kite? Nawota e pasadara po noa, Naleo wanogoe e pei lomau, pae nawotaeana ki naka ni Media go ki naka ni Persia, waina e da pano puoli mau.

¹³Ragi wanogoe eu pasadara po noa narae ni nawota, Daniel waina, waina e pei tea ni tea viragi‐luapavakotoana maga ni Yudah, e da dodo parati ki‐go mau, nawota O, go ki natip̃agoroana mau waina ku midirisoki a, ma e do datago natatagoana aneana paka tolu naaleatia sikai.

¹⁴Ragi wanogoe nawota, ragi waina e dogo navasaana wanogoe, e dogo sa ki p̃arua ki nia, go e doropusi nap̃op̃ona Daniel naga ega vualua e: go e p̃osiwosi pa pa elo e musu naga ega vualua e.

¹⁵Ragi wanogoe naatam̃oli maga wanogoe eu saisai midi pa punusi nawota, po noa ki nawota, P̃a atae, nawota O, naga e pei nawotaeana sikai ki naka ni Media go ki naka ni Persia, naga te natip̃agoroana kite te natawonakiana waina nawota e dawona ki nia ega ta pei tea mariana ega vanop̃ota mau.

¹⁶Ragi wanogoe nawota e pitip̃aki; go eu piragi Daniel pano, po nadi ki nia paki nap̃aloa ni laion maga. Nawota e pasa po noa ki Daniel, Sup̃e anigo waina nigo ku do maneana suasua sara ragi, nae ega wo pualua ko.

¹⁷Go vatu sikai e pei tea tapeana umai, po pei tea toropusiana nawoka ni nap̃aloa; go nawota e pulusoki a ki tea vulusoki aneana, go ki tea vulusoki ki tea maraki aneana maga; naga te navatuna ega ta pei tea mariana ega vanop̃ota nalo ni Daniel mau.

¹⁸Ragi wanogoe nawota e paki nasum̃a warua aneana pano, po doko nap̃ogiana wanogoe e da ganikani mau, go e da piragi tea woka naleo ni nalegaana maga seara umai paki ekopu punusi a mau: go namaturuana aneana e sava pa dua ki nia pano.

¹⁹Ragi wanogoe nawota e duleana ragi ni namakotokotoana ni m̃alipogi, po pano m̃araverave paki nap̃aloa ni laion maga.

²⁰Go ragi waina e umai paki m̃aladigi ki nap̃aloa punusi Daniel, e pioso ki nadaleo ni nasusueana sikai: nawota e pasa po noa ki Daniel, Daniel O, tea suasua ki Sup̃e mauri, Sup̃e anigo, waina nigo ku do maneana suasua sara ragi, e mariatae pualua ko pa dua ki laion maga kite?

²¹Ragi wanogoe Daniel e pasa paki nawota, Nawota O, p̃a mauri doko mau doko.

²²Sup̃e aginau e dip̃aki lua agelo aneana umai, po p̃ogoro nawoka ni laion maga, go eu da mari sa ki nau mau: nalakena waia natautauana naraena e pei tea vap̃aiana au; go naraem̃a ma, nawota O, a da mari te namarisakiana mau.

²³Ragi wanogoe nawota e laelaea p̃arua nalakena nae, po pitip̃aki naga euga viragi Daniel ega sake m̃elu dua ki nap̃aloa. Go Daniel e pei tea viragiana sake m̃elu dua ki nap̃aloa, go te namarisakiana sikai e da pei tea vap̃aiana asa mau, nalakena e pavatu Sup̃e aneana.

²⁴Go nawota e pitip̃aki, go eu piragi naatam̃oli maga wanogoe waina eu dapusukao ki Daniel, go eu nadi ki da paki nap̃aloa ni laion maga, nara, natuda maga, go nagoroi adeada maga; go eu ko da paki namago ni nap̃aloa mau ragi waina laion maga eu marimatua ki da, po katip̃oroworosi puti navatuda maga.

²⁵Ragi wanogoe nawota Darius e midiri paki narei mamau puti, paki nalauna mamau puti, go paki namena mamau puti, waina eu doko maramana mamau; Natam̃ateana animu ega vei tea mariana ega warua.

²⁶Navasakisogiana sikai e pei tea vituakiana m̃elu au, naga naatam̃oli maga ni namarakiana mamau aginau euga turururu po mataku pa dua ki narae ni Sup̃e ki Daniel: nalakena nae e pei Sup̃e mauri, go e pei tea laketoko pa pa ega tu du po du mau du, go namarakiana aneana e pei tea waina ega wo da pei tea maripuolikiana mau, go naveinawotaana aneana ega wo doko pa pa paki ragi edaku mau;

²⁷e do pualua po do mauti eu mauri doko, go e do mari navaivaiana maga go tea ni namagaana maga nakoroatelagi go maramana; waina e pualua Daniel pa dua ki nakasuaana ni laion maga.

²⁸Go Daniel wanogoe e disu p̃ia namaramaraana ki Darius, go namaramaraana ki Sairus tea ni Persia.