Read Nguna Togoa Etafe North DANIEL 7 Bible Online

DANIEL 7 - Nguna Togoa Etafe North bible

DANIEL 7

¹Natau vea ki Belshassar nawota ni Babelon, Daniel e punusi nap̃erea sikai go navunusiana maga ni nap̃auna ragi waina e one nawewele aneana: ragi wanogoe e midiri nap̃erea wanogoe po noa saisai ki naleo maga wanogoe.

²Daniel e pasa po noa, A do leo punusi tea ni navunusiana aginau p̃ogi, go kuga leo, nalagi pati ni nakoroatelagi eu dave duap̃ora paki natasi warua.

³Go nalo mila warua pati eu sake pae natasi umai, waina eu dum̃ada panovano p̃ota ki da.

⁴Tea vea e dakiusi laion sikai, go e pilake nalivaru maga ni ikila: a do leo punusi pa pa nalivaruna maga ero pei tea vutiana, go e pei tea sikeana pa dua ki natano, po pei tea mariana e lawodu natuada dua dakiusi naatam̃oli sikai, go nap̃op̃o ni naatam̃oli e pei tea vituakiana paki nia.

⁵Go kuga leo nalo mila p̃ota sikai, kerua, e dakiusi bear sikai, go e pei tea sikeana pakilagi taleva sikai, go vidi dolu eu doko nawokana namawota ni napatina maga: go eu noa dapala waia paki nia, P̃a tuleana, p̃a kani nap̃okasi warua.

⁶Edaku ki tea wanogoe a do leo punusi, go kuga leo tea p̃ota sikai, e dakiusi leopard sikai, waina e pilake nalivaru pati ni manu eu doko natakuna; go nalo mila wanogoe e pilake nap̃auna pati, go naveinawotaana e pei tea vituakiana paki nia.

⁷Edaku ki tea wanogoe a do leo punusi tea ni navunusiana maga ni p̃ogi, go kuga leo nalo mila kevati sikai, tea mataukiana go tea marimatua, go tea kasua p̃arua liu; go e pilake napati warua maga ni airon: e do ganikani po do katip̃oroworosi, po do pasi ki natuana maga tea waina e ko doko: go nae e panop̃ota ki nalo mila mamau puti waina eu pea ki nia; go e pilake napati rualima sikai ni nap̃auna.

⁸A do leo usiusi napati maga ni nap̃auna, go kuga leo, napati p̃ota sikai ni nap̃auna, tea kiki, e p̃orasake m̃aleoputo kakada, go napati vea maga ni nap̃auna tea tolu kakada eu pei tea vakuluaana m̃elu dua ki naraena: go kuga leo, namata maga, dapala namata maga ni naatam̃oli sikai ero doko napati wanogoe ni nap̃auna, go nawoka sikai waina e do pasa tea warua maga.

⁹A do leo punusi pa pa malo tasake maga eu pei tea nadikilawokiana, go Tea Matua sikai ni naaleatia maga e dasake. Sugoro aneana e dare dapala sno, go nalolu ni nap̃auna e dapala nalolu tautau ni shiip; malo tasake aneana e pei mena maga ni nakapu, tea taliepu kakana maga eu pei nakapu soro.

¹⁰Nakapu sara sikai e do sara po do dave m̃elu dua ki naraena: manu sikai paka manu maga eu maneana suasua, go tivilia sikai paka tivilia maga eu lawodu naraena: navasap̃otaeana e doko, go tusi maga eu pei tea lagaiana.

¹¹A do leo punusi ragi wanogoe nalakena nadaleo ni navasaana warua maga waina napati wanogoe ni nap̃auna e do pasa asa; a do leo punusi pa pa nalo mila wanogoe e pei tea maripunueana, go nap̃atokona e pei tea marisakiana, go e pei tea vituakiana paki natap̃arakiana ni nakapu.

¹²Go nalo ni nalo mila p̃ota maga, naveinawotaana adeada e pei tea tapeluaana: ma natokoparauana ni namauriana e pei tea vituakiana paki da pa pa paki sala sikai go ragi sikai.

¹³A do leo punusi tea ni navunusiana maga ni p̃ogi, go kuga leo, tea sikai waina e dakiusi naatam̃oli natuna sikai e pilake napopouru maga ni nakoroatelagi umai, go e umai pa punusi Tea Matua ni naaleatia maga, go eu piragi a paki m̃aladigi ki naraena.

¹⁴Go naveinawotaana e pei tea vituakiana paki nia, go nasamasamaana, go namarakiana sikai, naga narei maga, nalauna maga, go namena maga euga mamau puti maneana suasua: naveinawotaana aneana e pei naveinawotaana waina e du du po du mau du, waina ega wo da pano puoli mau, go namarakiana aneana waina ega wo da pei tea maripuolikiana mau.

¹⁵Kinau Daniel, naatagu e susue m̃aleoputo ni nap̃atokogu, go navunusiana maga ni nap̃augu eu mari au a mataku.

¹⁶A paki m̃aladigi ki sikai ni tea maga waina eu lawodu pisari, naga aga vusuusu paki nia ki nalomauana nalo ni tea mamau wanogoe. Go e noa ki nau asa, po mari au a midoakiatae nanoap̃otaeana ni naleo maga wanogoe.

¹⁷Nalo mila warua maga waia, waina eu pati, eu pei nawota pati waina euga wo duleana pae maramana.

¹⁸Ma tea tapu maga ki Tea Vakilagi Mau euga wo dape namarakiana, po peani namarakiana pa pa ega tu mau du, go pa pa ega tu du po du mau du.

¹⁹Ragi wanogoe a masauna naga aga atae nalomauana nalo ni nalo mila kevati, waina e panop̃ota ki puti ra, tea mataukiana warua liu, waina napatina maga eu pei tea ni airon, go natap̃alakisina maga eu pei tea ni brass; waina e do ganikani, po do katip̃oroworosi, po do pasi ki natuana maga tea waina e ko doko;

²⁰go nalo ni napati rualima sikai ni nap̃auna, waina eu doko nap̃auna, go ni napati p̃ota ni nap̃auna waina e p̃orasake, go waina tea tolu eu dowo m̃elu dua ki naraena; go napati wanogoe ni nap̃auna waina e pilake namata maga, go nawoka sikai waina e do pasa tea warua maga, waina navunusiana kakana e p̃arua liu agi tea p̃ota maga.

²¹A do leo punusi, go napati wanogoe ni nap̃auna e mari navakalo paki tea tapu maga, po marimatua ki da;

²²pa pa Tea Matua ni naaleatia maga e umai, go navasap̃otaeana e pei tea vituakiana paki tea tapu maga ki Tea Vakilagi Mau; go ragi e umai waina tea tapu maga eu peani namarakiana asa.

²³E noa dapala waia, Nalo mila kevati ega wo pei namarakiana kevati sikai maramana, waina ega wo panop̃ota ki namarakiana mamau puti, go ega wo gani maramana mamau, go ega wo papuludoa e, po marip̃oraworae a.

²⁴Go nalo ni napati rualima sikai wanogoe ni nap̃auna, nawota rualima sikai euga wo duleana m̃elu namarakiana wanogoe: go tea p̃ota sikai ega wo duleana edaku ki da; go nae ega wo panop̃ota ki tea vea maga, go ega wo mari nawota dolu euga vakitano.

²⁵Go ega wo pasa navasaana maga dip̃a Tea Vakilagi Mau, go ega wo mari sa ki tea tapu maga ki Tea Vakilagi Mau: go ega wo midoa ki nia naga ega mari ragi maga go nawotaeana euga vanop̃ota; go euga wo pei tea vituakiana paki nam̃elearuna pa pa paki ragi sikai go ragi dua go namagovai ni ragi sikai.

²⁶Ma navasap̃otaeana ega wo doko, go euga wo dape lua naveinawotaana aneana, naga euga mari sa ki nia po mari puoli ki nia pa pa paki namatap̃agona edaku.

²⁷Go namarakiana go naveinawotaana, go nawaruaana ni namarakiana maga etano ni nakoroatelagi mamau, euga wo pei tea vituakiana paki narei ni tea tapu maga ki Tea Vakilagi Mau: namarakiana aneana e pei namarakiana waina ega wo du du po du mau du, go naveinawotaana mamau puti euga wo maneana suasua po dogo parati ki nia.

²⁸Navasaana ni naleo waia e liliu nea. Kinau Daniel, namidodoana aginau maga eu mari au a mataku p̃arua, go naraegu e panop̃ota doko au: ma a pavaigoro naleo wanogoe e doko nap̃op̃ogu.