Read Nguna Togoa Etafe North DANIEL 8 Bible Online

DANIEL 8 - Nguna Togoa Etafe North bible

DANIEL 8

¹Natau ketolu ni namaramaraana ki nawota Belshassar navunusiana sikai e pakilina ki nau, ki nau Daniel, edaku ki tea waina e pakilina ki nau sala vea.

²Go a punusi tea ni navunusiana wanogoe; go e pakilina, naga ragi waina a punusi, kinau a doko Shushan natokoana ni naveinawotaana, waina e doko navanua ni Elam; go a punusi tea ni navunusiana wanogoe, go kinau a doko pisari noaisara Ulai.

³Go a sike namatagu maga, po punusi, go kuga leo, shiip anoai sikai e lawodu narae ni noaisara, go e pilake napati dua ni nap̃auna: go napati dua wanogoe ni nap̃auna ero parau pakilagi; ma sikai e parau pakilagi liu kerua, go tea varau pakilagi liu e edaku p̃orasake.

⁴A punusi shiip anoai wanogoe e do dip̃a paki west, go paki north, go paki sauth; go te nalo mauri seara eu da mariatae lawodu naraena mau, go sikai e da doko mau waina e mariatae pualua m̃elu dua ki nam̃elearuna; ma e mari dapala namasauana aneana, po dum̃ana mari a e p̃arua.

⁵Go ragi waina kinau a do midoakiusiusi a, kuga leo, naninani anoai sikai e pae elo musu umai duaduru navanua mamau, go e da kisidogo natano mau: go naninani anoai wanogoe napati tataragiana sikai ni nap̃auna e doko namawota ni namatana maga.

⁶Go e umai paki shiip anoai waina e pilake napati dua ni nap̃auna, waina a punusi a e lawodu narae ni noaisara, go e sava paki nia pae namaritausuana ni nakasuaana aneana.

⁷Go a punusi a e umai paki m̃aladigi ki shiip anoai; go e maritakokona ki nia, go e atugi shiip anoai, po marip̃ori napati dua ni nap̃auna; go nakasuaana e da doko shiip anoai naga ega lawodu naraena mau: ma e nadi ki nia paki natano, po papuludoa e; go tea vualua m̃elu dua ki nam̃elearuna e da magi shiip anoai doko mau.

⁸Go naninani anoai e dum̃ana mari a e p̃arua pa pa e p̃arua liu: go ragi waina e kasua doko, napati warua ni nap̃auna e mawori; go napati tataragiana pati ni nap̃auna eu p̃orasake du oli a paki nalagi pati ni nakoroatelagi.

⁹Go napati kiki sikai ni nap̃auna e dave m̃elu tea sikai kakada, waina e do disu po p̃arua liu, paki sauth, go paki ist, go paki navanua ni nasamasamaana.

¹⁰Go e disu po p̃arua pa pa paki taua ni nakoroatelagi: go e nadi ki te seara ni taua go te seara ni m̃asoe maga paki natano, po papuludoa ra.

¹¹Go e dum̃ana mari a e p̃arua pa pa paki Tea Maraki ni taua; go e dape lua kiana naviriana tap̃arakiana ni sara naaleatia, go tokora ni tokora tapu aneana e pei tea rakaiana.

¹²Go taua e pei tea vituakiana paki nia pilake naviriana tap̃arakiana ni sara naaleatia nalakena natapiriana: go e nadi ki nalomauana paki natano, go e do mari namasauana aneana po do disu p̃ia.

¹³Go a dogo tea tapu sikai e do pasa; go tea tapu p̃ota sikai e noa ki tea waina e do pasa, Navunusiana nalo ni naviriana tap̃arakiana ni sara naaleatia, go nalo ni natapiriana waina e do mari a e pei maso maladi, naga ega vitua ki tokora tapu go taua naga euga vei tea vapuludoaana, ega wo doko pa pa paki seve ragi?

¹⁴Go e noa ki nau, Pa pa paki ragi melu go malip̃ogi manu dua go p̃onotia dolu; go tokora tapu ega wo pei tea mariana ega tautau.

¹⁵Go e pakilina, ragi waina kinau Daniel a punusi sua navunusiana wanogoe, naga a laaga naga aga midoakiatae a; go kuga leo, tea waina e dapala navunusiana ni naatam̃oli sikai e lawodu kivea ki nau.

¹⁶Go a dogo nadaleo ni naatam̃oli sikai namawota ni natavaaki dua ni Ulai, waina e pioso, po noa, Cabriel, p̃a mari naatam̃oli waia ega midoakiatae navunusiana waia.

¹⁷Go e umai paki m̃aladigi ki tokora waina a lawodu asa; go ragi waina e umai, a mataku, po dowo dap̃olosiwo: go e noa ki nau, P̃a midoakiatae, natu ni naatam̃oli O; nalakena navunusiana waia, e pei agi ragi ni namatap̃agona edaku.

¹⁸Go ragi waina e do pasa ki nau, a dowo po maturu daratara dap̃olosiwo one: go e kisidogo au, po sike au a lawodu leana.

¹⁹Go e noa, p̃a leo, kinau aga wo mari ko p̃a wo atae tea waina ega wo doko ragi edaku ni namaetoana: nalakena e pei agi ragi tatutakiana ni namatap̃agona edaku.

²⁰Shiip anoai waina ku punusi a waina e pilake napati dua ni nap̃auna, ero pei nawota maga ni Media go Persia.

²¹Go naninani anoai uluulua e pei nawota ni Yavan: go napati warua ni nap̃auna waina e doko namawota ni namatana maga e pei nawota vea.

²²Go nalo tea waina e mawori, go pati eu duleana du oli a, namarakiana pati euga wo duleana m̃elu nalauna, ma euga wo da pilake nakasuaana aneana mau.

²³Go ragi edaku ni namarakiana adeada, ragi waina tea tapiri maga euga wo pakavuro sua, nawota rae kasua sikai, go tea midoakiatae p̃aia maga, ega wo duleana.

²⁴Go nakasuaana aneana ega wo p̃arua, ma ega wo da pae nakasuaana aneana mau; go ega wo mari sa ki dapala ega vei tea ni namagaana, go ega wo disu p̃ia po mari namasauana aneana: go ega wo mari sa ki tea kasua maga, go narei ni tea tapu maga.

²⁵Go pae namarimanumatuaana aneana ega wo mari nasurueana ega risu p̃ia nam̃elearuna; go ega wo dum̃ana mari a ega warua nap̃op̃ona, go ega wo mari sa ki tea laapa natokodam̃ateana adeada: go ega wo duleana dip̃a Tea Maraki ki tea maraki maga; ma ega wo pei tea marip̃oriana nam̃elearu ega wo dika asa.

²⁶Go navunusiana ni ragi melu maga go ni malip̃ogi maga waina e po pei tea noaana nae e pei lomau: ma nigo p̃a kokoro navunusiana wanogoe; nalakena e pei agi naaleatia laapa waina eu ko puoli.

²⁷Go kinau Daniel a matekimala, go a sasana naaleatia seara; go a duleana po mari nawosiana ki nawota: go a saram̃akoto navunusiana wanogoe, ma te naata e da midoakiatae a mau.