Read Nguna Togoa Etafe North DANIEL 9 Bible Online

DANIEL 9 - Nguna Togoa Etafe North bible

DANIEL 9

¹Natau vea ki Darius natu ni Ahasuerus, ni naworawora ni naka ni Media, waina e pei tea mariana e pei nawota dap̃au namarakiana ni naka ni Kaldea;

²natau vea ni namaramaraana aneana kinau Daniel a midoakiatae pae tusi maga naveveana ni natau maga, waina navasaana ki Yehovah e umai paki profeta Yeremiah asa, nalo ni navakavuroana ni namakakaana maga ni Yerusalem, natau rualima larua.

³Go a pitua ki naraegu paki Nawota Sup̃e, naga aga laaga pae natapasavasaana go navavaraniana maga, pilake navaliana, go nakulukulu ni sak, go natanoapu.

⁴Go a dapasavasa paki Yehovah Sup̃e aginau, po dum̃agu pasa dip̃a gami, po noa, Ako Nawota O, Sup̃e warua go tea mataukiana, waina e do pavaigoro navasasokiana go nadodomiana paki tea maga waina eu do dodomi a po do pavaigoro natip̃akiana aneana maga;

⁵au mari naleo sa, go au mari naleo tagele, go au mari nasigisigileoana, go au marip̃auluulu, go au dawasi m̃elu dua ki natip̃akiana anigo maga go ki navasap̃otaeana anigo maga:

⁶go au da dogo parati ki tea suasua anigo maga profeta maga mau, waina eu pasa pae nagisam̃a paki nawota aginami maga, tea maraki aginami maga, go tamagami maga, go paki narei mamau ni navanua.

⁷Nawota O, namarinaleoleanaana e pei anigo, ma namaliereana ni narae e pei aginami, dapala waina e doko naaleatia waia; agi naatam̃oli maga ni Yudah, go agi tea maga waina eu doko Yerusalem, go agi Israel mamau puti, waina eu doko m̃aladigi, go waina eu madu uvea, usuraki navanua mamau puti waina ku kopasi lua ra paki ara, nalakena natapiriana adeada waina eu dapiri asa dip̃a ko.

⁸Nawota O, namaliereana ni narae e pei aginami, agi nawota aginami maga, agi tea maraki aginami maga, go agi tamagami maga, nalakena au mari naleo sa paki‐go.

⁹Namaritadodomiana maga go namidoakikorokoroana maga eu pei agi Nawota Sup̃e aginami; nalakena au marip̃auluulu paki nia;

¹⁰go au da dogo parati ki nadaleo ni Yehovah Sup̃e aginami mau, naga auga surata pae nawotaeana aneana maga, waina e doropusi a naraegami pae nam̃elearu ni tea suasua aneana maga profeta maga.

¹¹Go Israel mamau puti eu dapiri nawotaeana anigo, go eu dawasi naga euga ta dogo parati ki nadaleom̃a mau: go navasasakiana e pei tea takiana paki gami, go navivisaana waina e pei tea midiriana nawotaeana ki Moses tea suasua ki Sup̃e; nalakena au mari naleo sa paki nia.

¹²Go e lawosoki navasaana aneana maga, waina e pasa asa dip̃a gami, go dip̃a tea vasap̃otae aginami maga waina eu pasap̃otae gami, pae naviragi‐umai‐ana paki gami nasaana warua sikai: waina e da pei tea mariana etano ni nakoroatelagi mamau mau dapala waina e pei tea mariana Yerusalem.

¹³Dapala waina e pei tea midiriana nawotaeana ki Moses, nasaana mamau waia e umai paki gami: ma au ko da pavara ni narae ni Yehovah Sup̃e aginami mau, naga auga liliu m̃elu dua ki namarinaleotageleana aginami maga, po peani namidoakiataeana nalo ni nalomauana anigo.

¹⁴Go Yehovah e leleogoro nasaana wanogoe, po piragi a umai paki gami; nalakena Yehovah Sup̃e aginami e leana nalakena nawosiana aneana mamau puti waina e mari a, go au da dogo parati ki nadaleona mau.

¹⁵Go ragi waia, Nawota Sup̃e aginami O, waina ku piragi narei anigo m̃elu dua ki navanua ni Ityipt umai ki nam̃elearu kasua sikai, po dum̃am̃a manigo mari nagisa sikai, dapala waina e doko naaleatia waia; au mari naleo sa, au mari nasigisigileoana.

¹⁶Nawota O, ega tapala namarinaleoleanaana anigo mamau puti, namaetoana anigo go namaritausuana anigo eroga liliu pano, a pavara ni ko asa, m̃elu dua ki natokoana anigo Yerusalem, tava tapu anigo: nalakena namarinaleosaana aginami maga, go namarinaleotageleana maga ki tamagami maga eu pei nalakena Yerusalem go narei anigo eu po pei tea vasapinoakiana ki tea mamau puti waina eu doko dalivirigoro gami.

¹⁷Go ragi waia, Sup̃e aginami O, p̃a rogo parati ki natapasavasaana ki tea suasua anigo, go ki navavaraniana aneana maga, go p̃a mari naraem̃a ega maramalaga paki tokora tapu anigo, waina e pei maso maladi, nalakena nigo ku pei Nawota.

¹⁸Sup̃e aginau O, p̃a taki nadaligam̃a, go p̃a rogo; p̃a lagai namatam̃a maga, go p̃a vunusi maso maladi aginami maga, go natokoana waina nagisam̃a e pei tea sosoana asa: nalakena kinami au da doropusi navavaraniana aginami maga naraem̃a nalakena namarinaleoleanaana aginami maga mau, ma namaritadodomiana warua anigo maga e pei nalakena.

¹⁹Nawota O, p̃a rogo; Nawota O, p̃a midoakikorokoro; Nawota O, p̃a takidorogo po mari; p̃a ta mari daliali mau; nalakena nigo Sup̃e aginau O, nalakena nagisam̃a e pei tea sosoana natokoana anigo go narei anigo.

²⁰Go ragi waina kinau a ko do pasa, po do dapasavasa, po do noasai namarinaleosaana aginau go namarinaleosaana ki narei aginau Israel, po do doropusi navavaraniana aginau narae ni Yehovah Sup̃e aginau nalakena tava tapu ki Sup̃e aginau;

²¹go ragi waina kinau a ko do pasa natapasavasaana, naatam̃oli Cabriel wanogoe, waina a punusi a navunusiana sala vea, e pei tea mariana e puvua umai, e umai paki m̃aladigi ki nau, e alagoro pei ragi ni naviriana ni ragi melu.

²²Go e mari au a midoakiatae, go e pasa ki nau, po noa, Daniel O, a po dave umai ragi waia naga aga vasa pisei ki‐go naga p̃a midoakiatae.

²³Ragi ni naatulakeana ni navavaraniana anigo maga natip̃akiana e dave pano, go kinau a po umai naga aga noakisai ko asa; nalakena nigo ku pei tea dodomiana warua: go p̃a midoakiusiusi naleo waia, po midoakiatae navunusiana.

²⁴Wiik rualima larua eu pei tea midoakidawonakiana paki narei anigo go paki natokoana tapu anigo, naga ega kokoro natapiriana, po pulusokigoro namarinaleosaana maga, po dap̃augoro namarinaleotageleana, po piragi umai namarinaleoleanaana waina ega wo du du po du mau du, go naga ega vulusokigoro navunusiana go tea veanoasai, po puvurai ki tokora tapu p̃arua liu sikai.

²⁵Go p̃a atae po midoakiatae, naga pae natavepanoana ni natip̃akiana naga euga viragi liliua ki Yerusalem po davagi a pa pa paki tea vuvuraikiana, tea maraki, ega wo pei wiik larua go wiik rualima latesa tamate dua: ega wo moro pei tea tavagiana asa pilake napua warua go m̃orutano daliviri, go tea wanogoe ragi maga ni nariesokiana.

²⁶Go edaku ki wiik rualima latesa tamate dua wanogoe tea vuvuraikiana ega wo pei tea taeluaana, go tea aneana ega wo dika: go narei ki tea maraki waina ega wo umai euga wo mari sa ki natokoana go ki tokora tapu; go namatap̃agona edaku ega wo pilake natave, go navakalo ega wo doko pa pa paki namatap̃agona edaku; maso maladi maga eu pei tea midoakidawonakiana.

²⁷Go wiik sikai ega wo marisoki navasasokiana kasua sikai paki tea laapa, go namagovai ni wiik ega wo mari naviriana go navituaana ni navinaga m̃oli eroga wo makoto; go tea waina e do mari a e pei maso maladi ega wo doko nalivaru ni tea mamaragokiana maga umai; go pa pa paki namanopuana, go tea waina e pei tea midoakidawonakiana, waina ega wo pei tea takiana paki nia po mari a ega wo pei maso maladi.