Read Nguna Togoa Etafe North HOSEA 10 Bible Online

HOSEA 10 - Nguna Togoa Etafe North bible

HOSEA 10

¹Israel e pei vaine wia liu sikai waina e do pitua ki nawana: dapala waina nawana e disu po laapa, dapala nogoe wede maga ni naviriana aneana maga eu disu po laapa; dapala waina navanua aneana e disu po p̃ia, dapala nogoe eu mari tea lawodu aneana maga eu disu po p̃ia.

²Nap̃op̃oda e pei tea tap̃otaeana; go eu one ara one naga euga tapetape navaratiana ni natapiriana adeada: Yehovah ega wo dakai wede ni naviriana adeada maga, po mari puoli ki tea lawodu adeada maga.

³Nalakena sala waia euga wo noa, Tu dika nawota: nalakena tu da matau ki Yehovah mau; go nawota sikai e mariatae manigida mari nasava?

⁴Eu pasa ki navasaana p̃alo maga, eu pivisa sorosoro, doko do mari navasasokiana maga: nalakena tea wanogoe navasap̃otaeana e do p̃otu sake dakiusi nam̃enau sa doko nasalena maga ni vanua.

⁵Naatatoko maga ni Samaria euga wo duruuru nalo ni kau natuna ni Beth‐aven: narei kakana euga wo dagisi a, tea viri kakana maga euga wo susue nalo kakana, euga wo lalagaarova nalakena nasamasamaana kakana, nalakena e m̃elu dua ki nia pano.

⁶Go ega wo pei tea viragiana pano paki Assiria, ega vei navituaana sikai paki nawota Yareb: Efraim ega wo pei tea toropusiana paki namaliereana, go Israel ega wo dum̃ana maliere nalo ni nasup̃e aneana.

⁷Go nawota ni Samaria ega wo pano puoli, dakiusi nasogosogo doko narae ni noai maga.

⁸Go tokora vakilagi maga ni Aven, namarinaleosaana ni Israel, euga wo pei tea mari‐puoli‐kiana: tea makalikali go tea vivitip̃a euga wo p̃otu sake doko wede ni naviriana adeada maga; go euga wo noa ki tava warua maga, Kuga tap̃augoro gida; go ki tava sula maga, Kuga tonigoro gida.

⁹Israel O, ku mari naleo sa pae naaleatia maga ni Cibeah pa pa pa: tokora wanogoe eu lawodu asa; go navakalo ega wo da pa parati ki da Cibeah mau, kite?

¹⁰Ragi waina aga wo masauna, aga wo parati ra; go nalauna maga euga wo pei tea saisaikiana dip̃a ra, ragi waina euga wo pei tea varatiana nalakena natapiriana dua adeada.

¹¹Go Efraim e pei kau natuna goroi sikai tea mari‐piseikiana, waina e masauna naga ega vasi lesue korn; ma a doro nakau nanoa e doko nanoana leom̃atakiana; Efraim ega wo sisi natano, Yakob ega wo dum̃ana mari‐p̃oroworosi nap̃eretano aneana maga.

¹²Kuga tum̃amu manimu sapura ki namarinaleoleanaana, kuga tagaukotovi nawa ni nadodomiana doko mau doko; kuga kili natano vea animu: nalakena e pei ragi naga kuga laaga Yehovah, naga ega umai po mari namautipauriana ega p̃owo paki mu.

¹³Ku sisi nasigisigileoana, ku dagaukotovi namarinaleotageleana; ku gani nawa ni nasorosoroana maga: nalakena ku pavatu kariot anigo maga, go nalapalapaana ni naatam̃oli marimatua anigo maga.

¹⁴Nalakena tea wanogoe nap̃agaagaana ega wo pakilina m̃aleoputo ni narei anigo, go p̃aaka anigo maga euga wo pei tea marisakiana, dapala waina Salman e mari sa ki Beth‐arbel naaleatia ni navakalo: ragi waina p̃ila maga eu pei tea mari‐poraworaeana, nara ma natuda maga.

¹⁵Ega wo pei tea mariana paki‐go ega tapala nogoe, nasum̃a ni Israel O, nalakena nasigisigileoana warua anigo: doko suitaviro nawota ni Israel ega wo pano puoli.