Read Nguna Togoa Etafe North HOSEA 11 Bible Online

HOSEA 11 - Nguna Togoa Etafe North bible

HOSEA 11

¹Ragi waina Israel e pei piakiki, ragi wanogoe a dodomi a, go a soso natugu m̃elu dua ki Ityipt umai.

²Dapala waina a soso ra, po moro soso ra, dapala nogoe eu moro m̃elu dua ki nau pano: eu mari naviriana maga paki Baal maga pitip̃atip̃a, po dap̃ara ki tea ni nap̃o wia paki nasup̃e taeana maga.

³Ma e pei kinau waina a mari pisei ki Efraim naga ega surata; a dape dakati ra eu doko narugu maga; ma eu da atae naga e pei kinau waina a mari pauri ra mau.

⁴A puati ra ki natali maga ni naatam̃oli, ki namea maga ni nadodomiana; go a po madeada pei tea vakale ra sikai, go a kerea ki nau paki da po pagani ra.

⁵Euga wo liliu paki navanua ni Ityipt, go Assiria ega wo pei nawota adeada, nalakena eu karai liliu umai punusi au.

⁶Go lova ega wo darup̃a natokoana aneana maga, go ega wo dinomi tea walagoto kakana maga, go aga wo mari puoli ki da, nalakena namidoaki‐p̃otae‐ana adeada maga.

⁷Narei aginau eu dum̃ada lawo ki da naga euga m̃elu dua ki nau pano; eu pei tea tip̃akotoviana paki nakau ni nanoa, go te naata ega wo da dape lua e kiada mau.

⁸Dapale sava a mariatae pitua ki‐go, Efraim O? Dapale sava a mariatae suasua naga p̃a vano puoli, Israel O? Dapale sava a mariatae mari ko p̃a wo dakiusi Adma? Dapale sava a mariatae mari paki‐go ega tapala waina e pei tea mariana paki Seboim? Nap̃op̃ogu e m̃aem̃ae nap̃alaugu, namaritadodomiana aginau e do pivitinu.

⁹Aga wo da pakavuro namaetoana vavaga aginau mau, aga wo da moro mari sa ki Efraim mau: nalakena kinau a pei Sup̃e, a da pei naatam̃oli mau; a pei Tea Tapu doko m̃aleoputo kakam̃a: go aga wo da umai naga aga mari puoli mau.

¹⁰Euga wo surata dausi Yehovah, nae ega wo uru dakiusi laion sikai; ega wo uru, go natuna maga euga wo pae taleva ni elo musu umai, euga wo duruuru umai.

¹¹Euga wo umai m̃araverave dakiusi manu maga m̃elu Ityipt, go dakiusi tokopea maga m̃elu navanua ni Assiria; go aga wo mari ra euga wo doko nasum̃a adeada maga doko, Yehovah e noa e.

¹²Efraim e dalivirigoro au ki nasorosoroana maga, go nasum̃a ni Israel ki namarisoreana: ma Yudah e ko pei tea ataeana ki Sup̃e doko, go e pei lomau paki Tea Tapu.