Read Nguna Togoa Etafe North HOSEA 12 Bible Online

HOSEA 12 - Nguna Togoa Etafe North bible

HOSEA 12

¹Efraim e do gani nalagi e pei navinaga aneana, e dausi nalagi ruatu naaleatia mamau; eu mari nasorosoroana maga go namaripavakotoana eu disu po p̃arua sara naaleatia; eu mari navasasokiana sikai paki Assiria, go naroro e do pei tea tapeana pano paki Ityipt.

²Yehovah e peani navululuana sikai dip̃a Yudah, go ega wo parati Yakob pataka ni napua aneana maga, po lagati dua e ega vae natomariana aneana maga.

³Doko nasum̃a ni kanao, e puati taina nam̃ago natuana; go doko ragi ni nakasuaana aneana e pululu paki Sup̃e:

⁴e pululu ki agelo po marimatua ki nia: e dagi, po mari navavaraniana paki nia: e pap̃ai a doko Beth‐el, go tokora wanogoe Sup̃e e pasa paki nia:

⁵Yehovah nogo, Sup̃e ki taua maga; Yehovah e pei nagisana.

⁶Nalakena tea wanogoe p̃a moro maradoa liliu umai punusi Sup̃e anigo: p̃a vavaigoro nadodomiana go naleanaana, po pavatu Sup̃e anigo pitip̃atip̃a.

⁷E pei tea vakokoto sikai, lasa rowogi maga ni namarisoreana eu doko nam̃elearuna: e masauna naga ega to riesoki.

⁸Efraim e naga, Ma kinau a po pei sogolapa, a dum̃agu maginau dalua nasogolapaana: ma nataluaana aneana maga mamau puti euga wo da pataka ni navaratiana ni natapiriana aneana mau.

⁹Kinau a pei Yehovah Sup̃e anigo pae navanua ni Ityipt; aga wo moro mari ko p̃a wo doko tap̃aup̃au maga doko, dapala waina e doko naaleatia maga ni nasaisaiana tatutakiana.

¹⁰Kinau a pasa paki profeta maga, go kinau a mari navunusiana maga laapa; po pitua ki naluluakia maga pae profeta maga.

¹¹Namarinaleotageleana e doko Cilead, eu pei tea p̃alo puti; doko Cilcal eu mari naviriana maga paki kau anoai maga: nalakena tea wanogoe wede ni naviriana adeada maga euga wo pei taua makaka maga doko nasalena maga ni vanua.

¹²(Yakob e sava pano paki navanua ni Aram, go Israel e pei tea suasua sikai raki nagoroi sikai, go e pei tea leoparati ki shiip maga naga ega veani nagoroi sikai.)

¹³Go pae profeta sikai Yehovah e piragi lua Israel m̃elu dua ki Ityipt sake umai, go pae profeta sikai e pei tea mautiana e mauri.

¹⁴Efraim e mari p̃auluulu p̃arua p̃arua liu: nalakena tea wanogoe sogi ni nada ega wo liko asa, go navasapinoaana aneana Yehovah ega wo liliua ki nia ega liliu paki nia.