Read Nguna Togoa Etafe North HOSEA 13 Bible Online

HOSEA 13 - Nguna Togoa Etafe North bible

HOSEA 13

¹Ragi waina Efraim e pasa, naatam̃oli maga eu duruuru; e pei tea tapeana pakilagi doko Israel: ma ragi waina e dapilagona nalo ni Baal, e mate.

²Go sala waia eu mari naleo sa po moro mari naleo sa, po dum̃ada madeada mari nasup̃e takiana maga, idolo maga waina eu pei tea mari‐m̃ata‐kiana ki silver adeada, eu mamau puti pei nawosiana ki tea vei mataisau maga ni silver: eu noa nalo kakada, eu naga, Kuga mari naviriana maga paki tea maga waia, kuga tum̃ili kau natuna maga.

³Nalakena tea wanogoe euga wo dapala napopouru ni malip̃ogi, go dapala nasovaki waina e m̃elu pano m̃araverave, dapala nap̃olaga waina e pei tea sui‐pulua‐kiana ki suitaviro m̃elu dua ki malo wokalesue pano, go dapala naasua waina nalagi e dape a pano.

⁴Ma kinau a pei Yehovah Sup̃e anigo pae navanua ni Ityipt; go p̃a wo da atae te sup̃e sikai mau, ma kinau sikigu; go tea maumau pauri sikai e dika, ma kinau a masikinau.

⁵Kinau a atae ko doko masop̃alo, doko navanua ni nagaragaraana warua.

⁶Dapala malo kanikani adeada, dapala nogoe eu puka; eu puka, go nap̃op̃oda e pei tea tapeana pakilagi: nalakena tea wanogoe eu malio ki nau.

⁷Nalakena tea wanogoe kinau a madeada pei laion sikai: dapala leopard sikai aga wo kusugoro napua:

⁸Aga wo sua ra dakiusi bear waina natuna maga eu puoli ki nia ki namateana, go aga wo kati p̃oraworae nagorogoroda: koria maga euga wo gani nap̃okasida, nalo mila maga ni namalasi euga wo kati p̃oraworae ra.

⁹A pe mari sa ki‐go, Israel O, sei e pe wo silae ko?

¹⁰Nawota anigo wai, waina ega mauti ko? Tea maraki anigo maga mamau puti wai, waina euga silae ko? Tea maga wanogoe waina ku noa nalo kakada, ku naga, P̃a tua au nawota sikai go tea maraki maga.

¹¹Kinau a dua ko nawota maga doko namaetoana aginau, go a dape lua ra doko namaritausuana aginau.

¹²Namarinaleotageleana ni Efraim e pei tea otisokiana: namarinaleosaana aneana e pei tea tauakiana.

¹³Navitinuana ni navisolaana ega wo pa parati ki nia, e pei piakiki manumatavusa sikai; e pei ragi aneana ma e mari daliali naga ega tave m̃elu nasum̃a ni kanao.

¹⁴Aga wo daulua ra m̃elu dua ki nam̃elearu ni Sheol, kite? Aga wo pualua ra m̃elu dua ki namateana, kite? Namateana O, nasasanaana sa anigo maga wai? Sheol O, namarisakiana anigo wai? Namaritadodomiana e pei tea tasurukiana paki namatagu maga.

¹⁵E pe siria dapala nap̃araerae, ma nalagi ruatu, namero ni Yehovah, e pe wo sake m̃elu dua ki masop̃alo umai; go namata noai aneana ega wo garagara, go m̃oru noai aneana ega wo dap̃a: ega wo mari sa sa ki naleo wia ni tea masauniana aneana maga.

¹⁶Samaria ega wo dapetape navaratiana ni natapiriana aneana maga; nalakena e mari p̃auluulu dip̃a Sup̃e aneana: euga wo dowo ki lova; piakirikiri adeada maga euga wo pei tea tukip̃oroworosiana, go nagoroi tiena adeada maga euga wo pei tea vua‐p̃oraworaeana.