Read Nguna Togoa Etafe North HOSEA 14 Bible Online

HOSEA 14 - Nguna Togoa Etafe North bible

HOSEA 14

¹Israel O, p̃a maradoa liliu umai punusi Yehovah Sup̃e anigo, nalakena ku dapilagona nalakena namarinaleotageleana anigo.

²P̃a tape navasaana maga sikoti ko pano, po maradoa liliu punusi Yehovah; p̃a noa ki nia, p̃a naga, Namarinaleotageleana ega vei tea tapeluaana puti, go p̃a saup̃ia ki gami, go auga wo pitua ki nawa ni nagolegami maga ega vei navituaana aginami.

³Assiria e da mariatae mauti gami mau; auga wo da sakesaake horse maga mau: go auga wo da moro noa ki tea ni nawosiana ni nam̃elearugami maga, Nimu ku pei sup̃e aginami: nalakena namalepu maga eu pap̃ai namaritadodomiana doko ako.

⁴Aga wo mari pauri ra m̃elu dua ki nasigisigileoana adeada, aga wo dodomi p̃arua ki da: nalakena namaetoana aginau e maradoa m̃elu dua ki da pano.

⁵Aga wo magi Israel pei nasovaki: ega wo pum̃a dapala lili, nakoana maga euga wo koakoa dapala sidar.

⁶Arana maga euga wo pei tea saikiana, go naleom̃atakiana kakana ega wo dapala nakau oliva, go nap̃ona dapala Lebanon.

⁷Euga wo liliu umai po doko melugu doko; euga wo siria dapala korn, euga wo pum̃a dapala vaine waina nap̃ona e dapala nap̃o ni waine ni Lebanon.

⁸Efraim ega wo noa, Aga kasa ki nasup̃e maga? Kinau a pasadara e, go aga wo pavaigoro e: kinau a dakiusi nakau paine malakesa p̃ia sikai; a manigo do pitua ki nawagu.

⁹Tea waina e manumatua ega midoa ki atae naleo maga wanogoe. Tea waina e midoa ki atae ega wo atae ra; nalakena napua maga ki Yehovah eu leana, go tea leana maga euga wo surata ara; ma tea tapiri maga euga wo dapilagona ara.