Read Nguna Togoa Etafe North HOSEA 2 Bible Online

HOSEA 2 - Nguna Togoa Etafe North bible

HOSEA 2

¹Kuga noa ki taimu, Ammi; go ki goremu, Ruhamah.

²Kuga vululu ki p̃ilamu, kuga vululu; nalakena nae e da pei nagoroi aginau mau, go kinau a da pei anawota mau: go ega toropusi namasausaraana aneana maga m̃elu dua ki naraena, go namaripeleana aneana maga pa dua ki namawota ni nasusuna maga;

³Mase a pe tuatilua kiana e pe m̃alam̃ala, po mari a e pe toko dapala waina e doko naaleatia ni navakilinaana aneana, po mari a e pe tapala masop̃alo sikai, po lawo ki nia e pe takiusi navanua garagara sikai, po mari punue a ki namadouana;

⁴Go aga wo da maritadodomi natuna maga mau; nalakena eu pei natu maga ni namaripeleana.

⁵Nalakena p̃ilada e maripele: nae waina e dumau ki da, e mari tea ni namaliereana: nalakena e naga, Aga wo dausi tea dodomi au maga, waina eu dua au navinaga aginau go noai aginau, wul aginau go flaks aginau, naroro aginau go tea munuana aginau.

⁶Nalakena tea wanogoe p̃a leo, aga wo p̃aakagoro napua aneana ki tea makalikali maga, go aga wo mari nakoro sikai dip̃a e, naga ega wo da pap̃ai napua aneana maga mau.

⁷Go ega wo dausi tea dodomi a maga, ma ega wo da pa parati ki da mau; ega wo laaga ara, ma ega wo da pap̃ai ra mau: go ega wo noa, Aga wo pano, po liliu paki aguwota vea; nalakena sala vea wanogoe e p̃ia ki nau liu sala waia.

⁸Nalakena e da atae naga kinau a dua e korn, go waine, go naroro, po maneana mari silver go kold eu p̃arua liu, waina eu pitua ki nia paki Baal.

⁹Nalakena tea wanogoe aga wo dape liliua ki korn aginau doko ragi kakana, go waine aginau doko p̃aunarago kakana; go aga wo pualua wul aginau go flaks aginau waina eu pei tea vituakiana naga euga kovagoro nam̃alam̃alaana aneana.

¹⁰Go sala waia aga wo lagai pakasa ki tea ni namaliereana aneana namata ni tea dodomi a maga, go te naata sikai ega wo da pualua e m̃elu dua ki nam̃elearugu mau.

¹¹Go aga wo mari nalaelaeaana mamau puti aneana ega wo makoto, nasaisaiana aneana maga, atelagi vau aneana maga, go sabbath aneana maga, go nasoso‐saisai‐kiana aneana maga mamau puti.

¹²Go aga wo mari sa sa ki vaine aneana maga go nakau napuliva aneana maga, waina e noa nalo kakada, e naga, Tea maga waia eu pei namoriana aginau waina tea dodomi au maga eu dua au ara: go aga wo mari ra euga vei namalasi mau, go nalo mila maga ni navanua euga wo gani dinomi ra.

¹³Go aga wo parati a nalakena naaleatia maga ni nasaisaiana maga ni Baal maga, ragi waina e dap̃ara ki tea ni nap̃o wia paki da, ragi waina e dum̃ana dekei ki nia ki vakadaliga aneana maga go naloriki wia aneana maga, po dausi tea dodomi a maga po malio ki nau, Yehovah e noa e.

¹⁴Nalakena tea wanogoe p̃a leo, aga wo surue a, po piragi a paki masop̃alo pano, po pasa matemate paki nia.

¹⁵Go tokora wanogoe aga wo moro dua e roara maga ni vaine aneana maga, go nap̃aloa ni Akor, naga ega vei namata duaduru sikai ni naleogoroana: go tokora wanogoe nae ega wo mari navasadaraana dapala waina e doko naaleatia maga ni naveinaatara‐ana aneana, go dapala waina e doko naaleatia waina e m̃elu dua ki navanua ni Ityipt sake umai.

¹⁶Go ega wo doko naaleatia wanogoe, Yehovah e noa e, naga p̃a wo soso au ki Ishi; go p̃a wo da moro soso au ki Baali mau.

¹⁷Nalakena aga wo dape lua Baal maga nagisada maga m̃elu dua ki nawokana, go euga wo da moro pei tea vasa‐lagati‐ana ki nagisada mau.

¹⁸Go doko naaleatia wanogoe aga wo manigo mari navasasokiana sikai paki nalo mila maga ni namalasi, go paki manu maga ni namalopa, go paki nalo kakaravi maga ni natano: go aga wo p̃ori kotovi naasu go lova go navakalo m̃elu dua ki navanua, po mari ko p̃a wo one natano po doko p̃ia doko.

¹⁹Go aga wo dum̃agu maginau pasasoki ko p̃a vei aginau pa pa po du mau du; aga wo dum̃agu maginau pasasoki ko p̃a vei aginau doko namarinaleoleanaana, go doko naleanaana, go doko nasaup̃iaana, go doko nadodomiana maga.

²⁰Go aga wo dum̃agu maginau pasasoki ko p̃a vei aginau doko naveilomauana: go p̃a wo atae Yehovah.

²¹Go ega wo pakilina naaleatia wanogoe, naga kinau aga wo pasadara, Yehovah e noa e, kinau aga wo pasadara nakoroatelagi, go nae ega wo pasadara maramana;

²²Go maramana ega wo pasadara korn, go waine, go naroro; go nara euga wo pasadara Yesreel.

²³Go aga wo dum̃agu maginau lawo e navanua; go aga wo dodomi tea waina e da peani nadodomiana mau; go aga wo noa ki tea maga waina eu da pei narei aginau mau, P̃a vei narei aginau; go nara euga wo naga, Nigo ku pei Sup̃e aginau.