Read Nguna Togoa Etafe North HOSEA 5 Bible Online

HOSEA 5 - Nguna Togoa Etafe North bible

HOSEA 5

¹Kuga rogo tea waia, tea viri maga O, go kuga taki dorogo, nasum̃a ni Israel O, go kuga taki nadaligamu, nasum̃a ni nawota O, nalakena navasap̃otaeana e pei animu; nalakena ku pei nasasa sikai doko Mispah, go kup̃ena sikai tea welesakiana doko Tabor.

²Eu mari m̃orutano ni Sittim e pakipua; ma aga wo parati ra, tea mamau puti kakada.

³Kinau a atae Efraim, go Israel e da pei tea tasurukiana paki nau mau; ma nigo, ku po mari namasausaraana, Efraim O, go Israel e po pei tea mamaragokiana.

⁴Nalakena natomariana adeada maga, eu mari sa maradoa liliu umai punusi Sup̃e adeada mau. Nalakena naata ni namasausaraana e doko m̃aleoputo kakada, go eu da atae Yehovah mau.

⁵Go naleomadagaana ni Israel e do noasokisoki paki naraena: nalakena tea wanogoe Israel go Efraim eroga wo dum̃ada dapilagona namarinaleotageleana adeada; go Yudah nae ma ega wo dapilagona sikoti ra.

⁶Euga wo pano pilake navata maga ni shiip adeada maga go pilake navata maga ni katel adeada maga naga euga laaga Yehovah; ma euga wo da pap̃ai a mau: e dum̃ana suka ki nia m̃elu dua ki da pano.

⁷Eu mari malauweluki dip̃a Yehovah; nalakena eu pesi piakiki vanop̃ota maga: sala waia atelagi vau ega wo dinomi ra, nara ma vanua adeada maga.

⁸Kuga sui paiga Cibeah, go sagoa Ramah: kuga vioso kasua Beth‐aven; p̃a turuuru, Benyamin O.

⁹Efraim ega wo pei maso maladi sikai naaleatia ni navaratiana; tea waina ega wo pakilina lomau, kinau a mari a e pei tea ataeana usuraki Israel naworaworana maga.

¹⁰Tea maraki maga ni Yudah eu dakiusi tea maga waina eu disua ki lua kokoi: kinau aga wo daki lua namaritausuana aginau paki da dakiusi noai.

¹¹Efraim e pei tea riesoki sikai, e do puadoa naleanaana; nalakena e masauna naga ega rausi tea p̃alo.

¹²Nalakena tea wanogoe kinau a dakiusi naup̃oa paki Efraim, go dakiusi namesoana paki nasum̃a ni Yudah.

¹³Ragi waina Efraim e punusi nasasanaana aneana, go Yudah e punusi wotu aneana, Efraim e pano paki Assiria, go Yudah e dip̃aki lua pa punusi nawota warua: ma nae e da mariatae mari pauri ko mau, kite mari wotu anigo ega apu mau.

¹⁴Nalakena aga wo mari paki Efraim ega takiusi laion sikai, go ega takiusi laion tureai sikai paki nasum̃a ni Yudah: kinau, kinau aga wo kati p̃oraworae po pano; aga wo piragi lua pavakoto tea kati‐p̃oraeana aginau, go tea waina ega vualua ega wo dika.

¹⁵Aga wo pano, aga wo liliu paki naliagu, pa pa euga wo noasai natapiriana adeada po laaga naraegu: doko narogokitesaana adeada, euga wo laaga parati ki nau.