Read Nguna Togoa Etafe North HOSEA 6 Bible Online

HOSEA 6 - Nguna Togoa Etafe North bible

HOSEA 6

¹Kuga umai, go tuga liliu pa punusi Yehovah: nalakena nae e kati p̃oraworae gida, go nae ega wo moro mari pauri gida; nae e atu gida, go nae ega wo moro pivisi gida.

²Edaku ki naaleatia dua, ega wo paka mauri ki gida: naaleatia ketolu, ega wo sike gida tuga moro duleana, go tuga wo mauri doko naraena doko.

³Go tuga tum̃agida lawo ki gida naga tuga atae Yehovah; natave‐pano‐ana aneana e dapala namakotokotoana ni malip̃ogi, e pei lomau: go ega wo umai punusi gida dakiusi usa, dakiusi usa edaku waina e do puevue navanua.

⁴Efraim O, a mariatae manigo mari nasava? Yudah O, a mariatae manigo mari nasava? Nalakena nawiaana anigo e dapala napopouru ni malip̃ogi, go dapala nasovaki waina e m̃elu pano m̃araverave.

⁵Nalakena tea wanogoe aga wo dap̃oraworae ra pae profeta maga, aga wo mari punuvunue ra pae navasaana maga ni nawokagu: go navasap̃otaeana aginau ega wo dave pano dapala namarama.

⁶Lomau a masau nadodomiana, go a da masau naviriana mau; go naataeana ki Sup̃e p̃arua liu navituaana tap̃arakiana maga.

⁷Ma nara eu dapiri navasasokiana doko Adam: tokora wanogoe eu mari malauweluki dip̃a au.

⁸Cilead e pei natokoana sikai ki tea mari dagele maga, e pei tea sirikiana ki nada.

⁹Eu mari punuvunue doko napua paki Shekem, go eu mari nasigisigileoana. Dapala waina taua maga ni tea tape‐pavakoto maga eu kusugoro raki naatam̃oli, taua maga ni tea viri maga eu moro mari dapala nogoe.

¹⁰Doko nasum̃a ni Israel a punusi naleo sa liu sikai: tokora wanogoe namasausaraana e pei tea vap̃aiana doko Efraim, Israel e pei tea mamaragokiana.

¹¹Go nalolovaeana sikai e manigo pei tea mari‐dawona‐kiana, Yudah O.