Read Nguna Togoa Etafe North HOSEA 7 Bible Online

HOSEA 7 - Nguna Togoa Etafe North bible

HOSEA 7

¹Ragi waina a masauna naga aga moro piragi liliua ki tea viragi‐luapavakotoana maga ni narei aginau, ragi waina a masauna naga aga mari pauri Israel, ragi wanogoe namarinaleotageleana ni Efraim go nasigisigileoana ni Samaria e pei tea mariana e dokolina; nalakena eu mari nasorosoroana: tea vanako e kili darave paki ekopu ni nasum̃a, go taua ni tea tape‐pavakoto maga eu puti lua pavakoto doko katama.

²Go eu da midoakiusiusi a nap̃op̃oda mau naga kinau a midoa ki parati ki nasigisigileoana adeada mamau puti: ma natomariana adeada maga eu dalivirigoro ra; eu doko kivea ni naraegu.

³Eu mari nawota e laelaea ki nasigisigileoana adeada, go tea maraki maga ki nasorosoroana adeada maga.

⁴Eu pei taua maripele maga; eu dakiusi upu sikai waina tea tao ni bred e dokoni nakapu asa; e da moro surisuri nakapu asa mau, pae ragi waina e die flaur memeu pa pa e pei tea levenakiana sua.

⁵Doko naaleatia ki nawota anigida, tea maraki maga eu dum̃ada mari ra eu sasana ki navivitinuana ni waine; e sai ki nam̃elearuna sikoti tea mari‐saudoa maga.

⁶Nalakena dakiusi upu ni nakapu sikai, nap̃op̃oda e pivitinu ragi waina eu doko do kusugoro one; namaetoana adeada e pavaga p̃ogi mamau; doko malip̃ogi e soro dakiusi mena ni nakapu sikai.

⁷Eu pivitinu puti dapala upu ni nakapu sikai, go eu dinomi tea vasap̃otae adeada maga; nawota adeada maga eu dowo puti: tea sikai kakada e da pioso paki nau mau.

⁸Efraim e sari nalauna maga; Efraim e pei keke sikai waina e da pei tea tapedoaana mau.

⁹Tea ni nalauna p̃ota maga eu dinomi nakasuaana aneana, go e da atae a mau; e kapuara, go e da atae a mau.

¹⁰Go naleomadagaana ni Israel e do noasokisoki paki naraena: ma eu da maradoa liliu umai punusi Yehovah Sup̃e adeada mau, kite laaga asa mau.

¹¹Go Efraim e dakiusi tokopea veilala sikai, e dika ki namidoaki‐atae‐ana; eu pioso paki Ityipt, eu pano paki Assiria.

¹²Ragi waina euga wo doko pano, aga wo p̃elesa ki vaivai aginau dap̃augoro ra; aga wo piragi ra pakitano dapala manu maga ni namalopa: aga wo parati ra ega tapala waina nasaisaiana adeada e dogo sua e.

¹³Ai ki da! Nalakena eu surata sasap̃o m̃elu dua ki nau pano; euga wo pei tea marisakiana, nalakena eu mari p̃auluulu dip̃a au: aga wo daulua ra ragi waina eu pasa nasorosoroana maga dip̃a au, kite?

¹⁴Eu da pioso paki nau ki nap̃op̃oda mau, ma eu lalagaarova one naweweleda: eu dum̃ada dovae ra raki korn go waine, eu mari p̃auluulu dip̃a au.

¹⁵Kinau a mari naruda maga eu kasua, ma eu midoaki p̃otae tea sa dip̃a au.

¹⁶Eu maradoa pano punusi Baal; eu dakiusi naasu ni namarisoreana; tea maraki adeada maga euga wo dowo ki lova nalakena naleomadagaana ni namenada: euga wo pei tea vasa‐saudoakiana asa doko navanua ni Ityipt.