Read Nguna Togoa Etafe North HOSEA 8 Bible Online

HOSEA 8 - Nguna Togoa Etafe North bible

HOSEA 8

¹P̃a lawo ki paiga paki nawokam̃a. Ega wo siwo umai dapala ikila sikai dip̃a nasum̃a ki Yehovah, nalakena eu dapiri navasasokiana aginau po mari p̃auluulu dip̃a nawotaeana aginau.

²Eu pioso paki nau, eu naga, Sup̃e aginau, kinami Israel au atae ko.

³Israel e dip̃adoa tea waina e p̃ia: tea kokona ega wo kopasi lua e.

⁴Eu sike lawo ki nawota maga, ma e da pae au mau; eu dawona ki tea maraki maga, ma kinau a da atae a mau: eu dum̃ada madeada mari nasup̃e maga ki silver adeada go ki kold adeada, naga euga tum̃ada pei tea marisakiana ara.

⁵Kinau a midoa ki p̃alo ki kau natuna anigo, Samaria O; namaetoana aginau e pavaga dip̃a ra: pa pa paki seve ragi euga wo da mariatae pei tea mari‐dautau‐kiana mau, doko nasum̃a ni Israel?

⁶Naatam̃oli wosiwosi sikai e mari a; e da pei Sup̃e mau. Kau natuna ni Samaria ega wo pei tea mari‐p̃oraworaeana.

⁷Nalakena eu sapura ki nalagi, go euga wo dagaukotovi suitaviro: korn lawodu m̃okai kakana e dika, ega wo da pitua ki navinagana mau; e pe vitua ki nia, ma tea ni nalauna p̃ota maga eu pe wo gani a.

⁸Israel e pei tea dinomiana sua: eu po dakiusi lasa sikai waina te naata sikai e da masauna mau, m̃aleoputo ni nalauna maga.

⁹Nalakena eu sake pano paki Assiria dakiusi ass mila sikai waina e sikina doko: go eu pitua ki navituaana maga ni nadodomiana paki Ityipt.

¹⁰Eu pe vitua ki navituaana maga ni nadodomiana usuraki nalauna maga, ma kinau a pe wo daperavera ki da m̃araverave; go euga wo pae asa makoto ki navuvuraiana ki nawota maga go ki tea maraki maga.

¹¹Efraim e mari wede maga ni naviriana laapa naga euga tape lua namarinaleosaana, ma eu po maneana pei wede maga ni naviriana naga ega mari naleo sa ara.

¹²A pe maneana midiri navasaparatikiana manu laapa ni nawotaeana aginau, ma eu pe wo pei tea midoakiana naga eu pe vei naleo vanop̃ota sikai.

¹³Eu mari naviriana maga ni nap̃okasi euga vei naviriana maga ni navituaana paki nau, go eu gani ra; ma Yehovah e da maro ara mau: sala waia nae ega wo midoa ki parati ki namarinaleotageleana adeada, po parati ra namarinaleosaana adeada maga; euga wo liliu paki Ityipt.

¹⁴Nalakena Israel e malio ki Tea Mari‐dawona ki nia, po davagi nasum̃a tapu maga; go Yudah e mari natokoana p̃aakagoroana maga laapa: ma kinau aga wo dip̃aki lua nakapu sikai paki natokoana aneana maga, go ega wo gani dinomi p̃aaka kakada maga.