Read Nguna Togoa Etafe North HOSEA 9 Bible Online

HOSEA 9 - Nguna Togoa Etafe North bible

HOSEA 9

¹P̃a ta laelaea mau, Israel O! P̃a ta sokamidi dakiusi narei p̃ota maga mau; nalakena ku doropusi Sup̃e anigo po maripele pano, ku dodomi namoriana ki tea masausara doko sara malo wokalesue.

²Malo wokalesue go m̃oru ni navasokiana ni nawa ni vaine, eroga wo da pakale ra mau, go waine vau ega wo mari nasorosoroana paki da.

³Euga wo da doko navanua ki Yehovah doko mau; ma Efraim ega wo liliu paki Ityipt, go doko Assiria euga wo gani navinaga waina e da dautau mau.

⁴Euga wo da daki lua navituaana takiana maga ni waine paki Yehovah mau, go nae ega wo da maro naviriana adeada maga mau: navinaga adeada ega wo madeada pei navinaga ki tea susue maga; tea maga mamau puti waina eu gani a, euga wo pei tea mariana euga wo loa asa: nalakena navinaga adeada ega vei tea ni navitoloana adeada sikina; ega wo da umai paki ekopu ni nasum̃a ki Yehovah mau.

⁵Kuga wo mari nasava naaleatia ni nasaisaiana tatutakiana, go naaleatia ni nasaisaiana ki Yehovah?

⁶Nalakena p̃a leo, eu m̃elu pano nalakena namarisakiana, ma Ityipt ega wo piragi saisai ki da, Memfis ega wo ova ki da: nataputea vivitip̃a ega wo peani naleo wia masauniana ni silver adeada maga: tea makalikali maga euga wo doko ekopu ni tap̃aup̃au adeada maga.

⁷Naaleatia maga ni navaratiana eu rumai, naaleatia maga ni navitua‐dip̃a‐ana eu rumai; Israel ega wo atae a: profeta e pei tea manumatavusa sikai, naatam̃oli waina e pei tea ni Naatana e doropa, nalakena nalapalapaana ni namarinaleotageleana anigo, go nalakena nakokonaana e p̃arua.

⁸Profeta e pei tea vavaigoro ki Sup̃e, e do pavaigoro dap̃au Efraim: ma vaivai sikai ki tea valako ki manu e doko napua aneana maga mamau puti, go nakokonaana e doko ekopu ni nasum̃a ki Sup̃e aneana.

⁹Eu dum̃ada mari ra eu pei tea marisasakiana dapala waina e doko naaleatia maga ni Cibeah: nae ega wo midoa ki parati ki namarinaleotageleana adeada, nae ega wo parati ra namarinaleosaana adeada maga.

¹⁰A pap̃ai naga Israel e dakiusi nawa ni vaine doko masop̃alo; a punusi naga tamamu maga eu dakiusi nawa vea ni takavea ni napuliva doko ragi ni namasu vea kakana: ma eu rumai paki Baal‐peor, po dum̃ada mari masale ki da paki naleo ni namaliereana, po pei tea mamaragokiana dakiusi naleo waina eu dodomi a.

¹¹Go Efraim, nasamasamaana adeada ega wo diri pano dakiusi manu sikai: navakilinaana ega wo dika, natienaana ega wo dika, natumauana ega wo dika.

¹²Eu pe vakale natuda maga, ma a pe wo mari puoli ki da ki namateana, pa pa te naata sikai ega wo da pei tea toropusiana doko mau: ai ki da, ragi waina aga wo m̃elu dua ki da pano!

¹³Efraim natuna maga dapala waina a punusi sua e, eu pei tea mari‐dawona‐kiana naga euga vei tea vuti‐lua‐pavakotoana sikai; e one Efraim one naga ega viragi lua natuna maga paki namaripunueana.

¹⁴P̃a tua ra, Yehovah O; nasava waina p̃a wo dua ra asa? P̃a tua ra nap̃ele doroasa sikai go nasusu dap̃a maga.

¹⁵Nasigisigileoana adeada mamau puti eu doko Cilcal doko; nalakena doko tokora wanogoe a pae asa pilosi ra: nalakena nasigisigileoana ni natomariana adeada maga, aga wo kopasi lua ra m̃elu dua ki nasum̃a aginau pano: aga wo da moro dodomi ra mau; tea maraki adeada maga mamau puti eu pei tea mari p̃auluulu maga.

¹⁶Efraim e pei tea atugiana, nakoada e kokolo sua, euga wo da dau ki nawa mau: eu pe tapetape, ma a pe wo mari punue nawa ni nap̃eleda waina eu dodomi a.

¹⁷Sup̃e aginau ega wo nadi ki da pano, nalakena eu da dogo parati ki nia mau: go euga wo pei tea vanovano maga usuraki nalauna maga.