Read Nguna Togoa Etafe North YOEL 2 Bible Online

YOEL 2 - Nguna Togoa Etafe North bible

YOEL 2

¹Kuga sui paiga Sion, po duki nap̃ea tava tapu aginau: naatatoko maga ni navanua euga ruruuru puti, nalakena naaleatia ki Yehovah ega umai, e pei m̃aladigi;

²E pei naaleatia ni namaligo, go namaligoligo, naaleatia ni napopouru maga, go namaligo wono; nalauna warua go kasua e pei tea welesakiana tava maga dapala natolaana, tea waina e dakiusi a e da doko sala vea mau, go ega wo da moro pakilina sala edaku mau, usuraki natau maga ni tagona laapa.

³Nasiinu sikai e do gani kivea ki da; go kiedaku mena ni nakapu e do soro: sala vea navanua e dakiusi roara ni Eden, ma sala edaku e po pei maso maladi; nalakena te navatuna sikai e da pei tea mautiana asa mau.

⁴Natakiusiana kakada e dakiusi horse maga; go dapala tea maga waina eu sakesaake horse, eu do sava kasua.

⁵Dapala nasaruruana ni kariot maga waina eu do dam̃atam̃alua nam̃asua ni tava maga, dapala nam̃alidalidaana ni mena ni nakapu waina e do gani nap̃olaga, dapala nalauna kasua sikai waina e pei tea saisaikiana paki navakalo.

⁶Narei maga eu punusi ra go eu dogokitesa: naraeda maga eu datare puti.

⁷Eu sava kasua dakiusi m̃aau maga; eu pagi p̃aaka dakiusi naatam̃oli maga ni navakalo; go eu mamau puti surata napua adeada visarasara maga, go eu da papele ovara adeada maga mau.

⁸Eu da dum̃ada die ra mau; eu sikasikai surata napua adeada pano: go eu dieduru nalikau maga, po da dawasi mau.

⁹Eu kapurigoro natokoana, eu sava usi p̃aaka; eu pagi sili nasum̃a maga; eu sili namata leoduru maga dakiusi tea vanako.

¹⁰Maramana e nuanua; nakoroatelagi maga eu duruuru: elo go atelagi ero maligo, go m̃asoe maga eu da marama mau.

¹¹Go Yehovah e pitua ki nadaleona kivea ni taua ni navakalo aneana maga; go taua aneana e p̃arua sa; tea waina e do mari navasaana aneana e pei tea marimatua sikai: nalakena naaleatia ki Yehovah e p̃arua, go e pei tea mataukiana pa; sei e mariatae lawodugoro e?

¹²Nalakena tea wanogoe, Yehovah e noa e, kuga maradoa paki nau ki nap̃op̃omu mamau, go ki navaliana, go ki natagiana, go ki nasusueana:

¹³Go kuga vuap̃orae nap̃op̃omu, go ega ta pei sugoro animu maga mau, po maradoa paki Yehovah Sup̃e animu: nalakena nae e pei saup̃ia go maritadodomi, tea mari daliali namaetoana, go tea warua nadodomiana, go tea midoaki piri nalo ni nasaana.

¹⁴Sei e atae e pe wo da liliu po midoaki piri, po doropusi navasam̃atakiana sikai ega toko, navituaana ni flaur, go navituaana takiana, paki Yehovah Sup̃e animu?

¹⁵Kuga sui paiga Sion, kuga tapugoro navaliana sikai, kuga soso saisai ki nasaisaiana tatutakiana sikai:

¹⁶Kuga viragi saisai ki narei, kuga tapugoro nasaisaiana, kuga viragi saisai ki tea matua maga, kuga viragi saisai ki piakirikiri maga, go tea susu maga: tea vitawiri ega tave m̃elu dua ki em̃ago aneana pano, go tea laki m̃elu dua ki em̃ago sili aneana.

¹⁷Tea viri maga, tea suasua maga ki Yehovah, euga tagi namawota ni natara‐taup̃a go ni wede ni naviriana, go euga naga, P̃a mauti narei anigo, Yehovah O, go p̃a ta pitua ki tea veaniana anigo paki navasa‐pinoa‐kiana, naga nalauna maga euga vasadao ara: ekasana euga noa m̃aleoputo ni narei maga, Sup̃e adeada wai?

¹⁸Ragi wanogoe Yehovah e dotowo kasua nalo ni navanua aneana, go e maritadodomi narei aneana.

¹⁹Go Yehovah e pasadara po noa ki narei aneana, e naga, Kuga leo, aga wo manimu dip̃aki lua korn, go waine, go naroro, go kuga wo puka ara: go aga wo da moro mari mu kuga vei navasa‐pinoa‐kiana sikai m̃aleoputo ni nalauna maga mau:

²⁰Ma aga wo disua ki lua taua ni north ega vaki uvea ki mu, go aga wo kopasi lua e paki navanua p̃alo go maso maladi sikai, kivea kakana ega vaki natasi paki elo sake, go kiedaku kakana ega vaki natasi paki elo musu; go nap̃oaana kakana ega wo sake umai, go nap̃ona sa ega wo sake umai, nalakena e mari naleo warua maga.

²¹P̃a ta mataku mau, navanua O, p̃a laelaea po samasama; nalakena Yehovah e mari naleo warua maga.

²²Kuga ta mataku mau, nimu nalo tuavati maga ni namalasi; nalakena malo kaniana maga ni masop̃alo eu pisou, nalakena nakau e dau ki nawana, go napuliva go vaine ero pitua ki nakasuaana adeada.

²³Nalakena tea wanogoe kuga samasama, nimu Sion natuna maga, kuga laelaea doko Yehovah Sup̃e animu: nalakena e dua mu usa vea ki totowo leana, go e mari usa e do manimu p̃owo, usa vea go usa edaku, doko atelagi vea.

²⁴Go malo wokalesue maga euga wo pura ki whiit, go m̃oru maga euga wo pura sarasaraape ki waine go ki naroro.

²⁵Go aga wo manimu liliua ki natau maga waina midiri e gani ra, go tipekini, go uraasi, go raasi, taua warua aginau waina a dip̃aki lua e paloti paki m̃aleoputo kakamu.

²⁶Go kuga wo ganikani p̃ia po puka, go kuga wo samasama ni nagisa ni Yehovah Sup̃e animu, waina e manimu mari tea ni namagaana maga, go narei aginau euga wo da moro maliere mau.

²⁷Go kuga wo atae naga kinau a doko m̃aleoputo ni Israel, go naga kinau a pei Yehovah Sup̃e animu, go tea p̃ota e dika: go narei aginau euga wo da moro maliere mau.

²⁸Go ega wo pakilina naaleatia edaku maga, aga wo daki kovai naatagu paki sara nap̃okasi; go natumu naanoai maga go natumu nagoroi maga euga wo peanoasai, namariki animu maga euga wo p̃erea ki nap̃erea maga, natureai animu maga euga wo punusi navunusiana maga:

²⁹Go naaleatia maga wanogoe aga wo daki kovai naatagu paki tea suasua naanoai maga, go tea suasua nagoroi maga.

³⁰Go aga wo pitua ki tea ni namagaana maga nakoroatelagi maga go maramana, nada, go nakapu, go namavu ni naasua.

³¹Elo ega wo panop̃ota po pei namaligo, go atelagi ega wo pei nada, ega wo pea ki na‐umai‐ana ki naaleatia warua go ni namatauki‐Yehovah‐ana.

³²Go ega wo pakilina naga sara naata waina euga wo pioso paki nagisa ni Yehovah, euga wo pei tea mautipauriana: nalakena doko tava ni Sion go doko Yerusalem te seara euga wo pei tea vualuaana, dapala waina Yehovah e noa e, go ega vei namagovai kakada waina Yehovah ega wo soso ra.