Read Nguna Togoa Etafe North AMOS 3 Bible Online

AMOS 3 - Nguna Togoa Etafe North bible

AMOS 3

¹Kuga rogo navasaana waia waina Yehovah e pasa asa dip̃a mu, Israel natuna maga O, dip̃a namatarau mamau puti waina a piragi lua ra m̃elu dua ki navanua ni Ityipt sake umai,

²e naga, Nigo sikim̃a, ni namatarau mamau puti ni maramana, nigo sikim̃a kinau a atae ko: nalakena tea wanogoe aga wo parati ko namarinaleotageleana anigo maga mamau puti.

³Naatam̃oli dua eroga tum̃ada pitana ki da napua, ero pe ta dum̃ada atae ra mau, kite?

⁴Laion sikai ega uru namalasi, ragi waina e dika ki tea kati‐p̃oraeana, kite? Laion tureai sikai ega vitua ki nadaleona valeana, e pe ta puati te navatuna mau, kite?

⁵Manu sikai ega rowo paki vaivai sikai natano, tokora sikai waina te nasasa sikai e pe ta pei tea lawokiana doko raki nia mau, kite? Vaivai sikai ega tum̃ana sake m̃elu dua ki natano, go te navatuna e da pei tea vuasokiana asa mau, kite?

⁶Paiga ega vei tea suiana natokoana sikai, go narei euga wo da mataku mau, kite? Namarisakiana ega vakilina ki natokoana sikai, Yehovah e pe ta dum̃ana mari a mau, kite?

⁷Yehovah Sup̃e ega wo da mari te navatuna mau, e pe ta pea mari pakasa ki p̃aia aneana paki tea suasua aneana profeta maga.

⁸Laion sikai e do uru, sei ega wo da mataku? Yehovah Sup̃e e do pasa, sei ega wo da peanoasai?

⁹Kuga rogorogo paki nasum̃a kasua p̃aakagoroana maga ni Assiria, go paki nasum̃a kasua p̃aakagoroana maga waina eu doko navanua ni Ityipt, po naga, Kuga tum̃amu saisai ki mu tava maga ni Samaria, po leo punusi napariana warua maga waina eu doko asa, go nariesokiana maga m̃aleoputo kakana.

¹⁰Nalakena eu da atae takana waina euga mari tea waina e leana mau, Yehovah e noa e, nara waina eu pila daua ki namaripavakotoana go navuti‐luapavakotoana ekopu ni nasum̃a kasua p̃aakagoroana adeada maga.

¹¹Nalakena tea wanogoe Yehovah Sup̃e e noa dapala nea, e naga, Tea riesoki sikai ega wo dalivirigoro navanua: go nae ega wo mari nakasuaana anigo ega m̃elu dua ki‐go po pakitano, go nasum̃a kasua p̃aakagoroana anigo maga euga wo pei tea vuti‐lua‐pavakotoana.

¹²Yehovah e noa dapala nea, e naga, Dapala waina tea leoparatiki shiip e pualua m̃elu dua ki nawoka ni laion natua dua m̃oli, kite matele sikai m̃oli ni nadaliga sikai; dapala nogoe Israel natuna maga waina eu doko Samaria, waina eu kere one wauwa adeada maga naweweleda maga, namagovai kakada m̃oli ega wo pei tea vualuaana.

¹³Kuga rogo, po noasokisoki dip̃a nasum̃a ni Yakob, Yehovah Sup̃e, Sup̃e ki taua maga, e noa e.

¹⁴Nalakena doko naaleatia waina aga varati Israel natapiriana kakana, doko naaleatia wanogoe aga wo moro parati wede ni naviriana maga ni Beth‐el, go napati maga ni wede ni naviriana euga wo pei tea taeluaana, po dowo paki natano.

¹⁵Go aga wo atugi nasum̃a ni namamaladiana, go nasum̃a ni navivitinuana; go nasum̃a maga ni napati ni elefant euga wo pano puoli, go nasum̃a laapa euga wo nopu, Yehovah e noa e.