Read Nguna Togoa Etafe North AMOS 7 Bible Online

AMOS 7 - Nguna Togoa Etafe North bible

AMOS 7

¹Yehovah Sup̃e e mari au a punusi tea waia: p̃a leo, e do mari taua sikai ni midiri maga; go e pei ragi ni navisouana ni namasu kerua; go p̃a leo, e pei namasu kerua waina e po edaku ki natagaukotoviana agi nawota.

²Go e pakilina naga ragi waina eu pae asa gani dinomi nataputea ni navanua, kinau a naga, Yehovah Sup̃e O, p̃a midoakikorokoro, a pavara ni ko asa: Yakob e pe wo lawodu, kite? Nalakena nae e kiki.

³Go Yehovah e midoa ki piri nalo kakana: ega wo da dapala nogoe mau, Yehovah e noa e.

⁴Yehovah Sup̃e e mari au a punusi tea waia: go p̃a leo, Yehovah Sup̃e e soso nakapu soro ni navasap̃otaeana; go e dinomi epua warua, po pae asa gani navanua.

⁵Go a naga, Yehovah Sup̃e O, ega makoto, a pavara ni ko asa: Yakob e pe wo lawodu, kite? Nalakena nae e kiki.

⁶Go Yehovah e midoa ki piri nalo kakana: ega wo da dapala nogoe mau, Yehovah Sup̃e e noa e.

⁷Go Yehovah e mari au a punusi tea waia: go p̃a leo, naatam̃oli sikai e lawodu pisari p̃aaka sikai, namea totowo sikai e doko nam̃elearuna.

⁸Go Yehovah e noa ki nau, e naga, Amos, ku punusi nasava? Go a naga, Namea totowo sikai. Go Yehovah e naga, P̃a leo, aga wo lawo ki namea totowo sikai ega toko m̃aleoputo ni narei aginau Israel; aga wo da moro pakalau ra mau:

⁹Go tokora vakilagi maga ni Isaak euga wo pei maso maladi, go tokora tapu maga ni Israel euga wo makaka one; go aga wo duleana dip̃a nasum̃a ni Yeroboam ki lova.

¹⁰Go Amasiah tea viri ni Beth‐el, e dip̃aki lua po noa ki Yeroboam nawota ni Israel, e naga, Amos e mari nasekeana sikai dip̃a ko m̃aleoputo ni nasum̃a ni Israel: navanua e dogo sa ki navasaana aneana maga, waina e do noa e.

¹¹Nalakena Amos e noa dapala nea, e naga, Yeroboam ega wo mate ki lova, go Israel ega wo pei tea viragi‐lua‐pavakotoana m̃elu dua ki navanua aneana pano paki uvea.

¹²Go Amasiah e moro noa ki Amos, e naga, P̃a vano, tea kikita O, p̃a sava paki navanua ni Yudah, go p̃a kani navinaga tokora wanogoe, go p̃a veanoasai tokora wanogoe:

¹³Ma p̃a ta moro peanoasai doko Beth‐el mau: nalakena e pei tokora tapu ki nawota, go e pei nasum̃a sikai ni navei‐nawota‐ana.

¹⁴Go Amos e pasadara, po noa ki Amasiah, e naga, Kinau a da pei profeta sikai mau, go a da pei profeta maga natuda sikai mau; ma a pei tea leoparatiki shiip sikai, go tea wosiwosi ki naita maga:

¹⁵Go Yehovah e piragi lua au m̃elu dua ki nataku ni navata ni shiip, go Yehovah e noa ki nau, e naga, P̃a vano, p̃a veanoasai paki narei aginau Israel.

¹⁶Nalakena tea wanogoe p̃a rogo navasaana ki Yehovah: nigo ku naga, P̃a ta peanoasai dip̃a Israel mau, go p̃a ta lua ki navasaana anigo dip̃a nasum̃a ni Isaak mau;

¹⁷Nalakena tea wanogoe Yehovah e noa dapala nea, e naga, Nagoroi anigo ega wo pei tea masausara sikai natokoana, go natum̃a naanoai maga go natum̃a nagoroi maga euga wo dowo ki lova, go navanua anigo ega wo pei tea tap̃otawotaeana ki namea totowo; go nigo p̃a wo mate navanua sikai waina e da dautau mau, go Israel ega wo pei tea viragilua‐pavakotoana m̃elu dua ki navanua aneana pano.