Read Nguna Togoa Etafe North OBADIAH 1 Bible Online

OBADIAH 1 - Nguna Togoa Etafe North bible

OBADIAH 1

¹Navunusiana ki Obadiah. Yehovah Sup̃e e noa dapala nea nalo ni Edom: Kinami au dogo narogorogoana m̃elu Yehovah, go tea tautauana sikai e pei tea tip̃akiluaana pano paki m̃aleoputo ni nalauna p̃ota maga: e naga, Nimu kuga tuleana, go tuga mari navakalo dip̃a e.

²P̃a leo, aga wo mari ko p̃a wo kiki m̃aleoputo ni nalauna maga: nigo ku pei tea midoaki‐p̃alo‐p̃arua‐kiana.

³Nap̃op̃o‐vakilagi‐ana anigo e surue ko, nigo waina ku doko tokora ni nasava‐sili‐ana maga ni vatu laketoko, waina tokora tokoana anigo e doko elagi; waina ku do noa nap̃op̃om̃a, Sei ega mari au aga siwo paki natano?

⁴Ku pe tiri sake paki elagi mau dapala ikila, go vetem̃a e pe vei tea lawokiana m̃aleoputo ni m̃asoe maga, ma aga wo mari ko p̃a wo pae asa siwo pakitano, Yehovah e noa e.

⁵Waina tea vanako maga eu pe umai punusi ko p̃ogi, tea tapepavakoto maga, (awi ma nigo ku pei tea marisasakiana!) Eu pe wo da do panako pa pa eu pe veani tea waina e patakada, nara eu sikida mau kite? Waina tea lolovae nawa ni vaine eu pe umai punusi ko, eu pe wo da doropusi nawa ni vaine te seara eu pe toko, kite?

⁶Esau e pei tea vuti‐lua‐pavakoto‐kiana! Naleo tauakiana aneana maga eu pei tea talesiana!

⁷Naatam̃oli maga mamau puti ni navasasokiana anigo eu kopasi lua ko pano pa pa paki kokoi: naatam̃oli maga waina eu doko dam̃ate paki‐go eu surue ko po marimatua ki‐go; tea maga waina eu gani navinaga anigo eu lawo ki vaivai sikai raki‐go: namidoakiataeana e da doko asa mau.

⁸Yehovah e naga, Doko naaleatia wanogoe aga wo da mari puoli ki naatam̃oli manumatua maga m̃elu dua ki Edom, go namidoakiataeana pa dua ki tava Esau, kite?

⁹Go naatam̃oli marimatua anigo maga euga wo m̃anaunau, Teman O, go sara naata euga vei tea atugiana po pei tea taeluaana pa dua ki tava Esau.

¹⁰Namaliereana ega wo kovagoro ko nalakena namaripavakotoana paki taim̃a Yakob, go p̃a wo pei tea taeluaana pa pa ega tu mau du.

¹¹Doko naaleatia waina ku lawo dugoro, naaleatia waina walu p̃ota maga eu puapavakoto ki naveaniana aneana, go tea ni nalauna p̃ota maga eu sili namatapua aneana maga, po nadi ki gole raki Yerusalem, nigo ku mari dapala ku pe vei sikai kakada.

¹²Ma p̃a ta leo punusi taim̃a naaleatia ni narogokitesaana aneana; go p̃a ta laelaea dap̃au Yudah natuna maga naaleatia ni namari‐sa‐ki‐da‐ana mau; kite pasa lagi naaleatia ni nariesokiana.

¹³P̃a ta sili namata‐pua ki narei aginau naaleatia ni namari‐saki‐da‐ana mau; go p̃a ta leo punusi narogokitesaana adeada naaleatia ni namari‐sa‐ki‐da‐ana, go p̃a ta sai ki nam̃elearum̃a maga paki naveaniana adeada maga mau, naaleatia ni namari‐sa‐ki‐da‐ana.

¹⁴Go p̃a ta lawodu napua dawasi mau naga p̃a taelua tea aneana maga waina eu sava pano; go p̃a ta pitua ki tea aneana maga mau waina eu madoko naaleatia ni nariesokiana.

¹⁵Nalakena naaleatia ki Yehovah e umai paki m̃aladigi ki nalauna maga mamau puti: dapala waina nigo ku mari a, dapala nogoe ega wo pei tea mariana paki‐go; nalagati‐pitua‐kiana anigo ega wo liliu paki nap̃aum̃a.

¹⁶Nalakena dapala waina nimu ku munu tava tapu aginau, dapala nogoe nalauna maga mamau puti euga wo munu pitip̃atip̃a, io, euga wo munu po darataara, go euga wo dakiusi waina eu pe ta doko mau.

¹⁷Ma te seara waina eu sava pano euga wo du tava ni Sion, go ega wo dapu; go nasum̃a ki Yakob euga wo peani naveaniana adeada maga.

¹⁸Go nasum̃a ki Yakob euga wo pei nakapu, go nasum̃a ki Yosef euga wo pei mena ni nakapu, go nasum̃a ki Esau euga vei nap̃olaga, go euga wo soro m̃aleoputo kakada, po gani ra: go te seara ni nasum̃a ki Esau euga ta pei tea toropusiana euga mauri doko mau; Yehovah e noa e.

¹⁹Go tea ni Sauth euga wo peani tava Esau; go tea ni malo matemate navanua ni Filistine maga, go euga wo peani navanua ni Efraim, go navanua ni Samaria: go Benyamin euga wo peani Cilead.

²⁰Go tea ni tea vua‐pavakotoana ni taua wanogoe ni Israel natuna maga waina eu doko m̃aleoputo ni naworawora ni Kanaan, euga wo peani a pa pa paki Sarefath; go tea ni tea vua‐pavakotoana ni Yerusalem, waina e doko Sefarad, euga wo peani natokoana maga ni Sauth.

²¹Go tea mautipauri maga euga wo sake umai paki tava Sion, naga euga vasap̃otae tava ni Esau; go namarakiana ega wo pei tea ki Yehovah.