Read Nguna Togoa Etafe North YONAH 4 Bible Online

YONAH 4 - Nguna Togoa Etafe North bible

YONAH 4

¹Ma Yonah e midoaki sa ki p̃arua ki nia, go e maeto asa.

²Go e dapasavasa paki Yehovah, po noa, Ako Yehovah O, tea waia e da pei navasaana aginau ragi waina a ko doko navanua aginau kite? Nalakena tea wanogoe a peapea ki nia naga aga sava paki Tarshish pano: nalakena a atae naga nigo ku pei Sup̃e saup̃ia, go maritadodomi, tea mari daliali namaetoana, go tea warua nadodomiana, go tea midoakipiri nalo ni nasaana.

³Tea wanogoe, Yehovah O, p̃a tape lua, a pavara ni ko asa, namauriana aginau kiagu; nalakena namateana aginau e p̃ia liu namauriana aginau.

⁴Go Yehovah e noa, Ku mari p̃ia naga p̃a maeto kite?

⁵Go Yonah e dave m̃elu dua ki natokoana, po do natano taleva ni ist ni natokoana, po dum̃ana maneana mari tap̃aup̃au sikai tokora wanogoe, po do natano etano ki nia melu kakana, pa pa naga ega vunusi tea waina ega wo pakilina ki natokoana.

⁶Go Yehovah Sup̃e e dawona ki lesi miala sikai, po mari a e ulua sake dap̃augoro Yonah, naga ega vei melu sikai elagi ki nap̃auna, naga ega vualua e m̃elu dua ki narogokitesaana aneana. Go Yonah e laelaea lesi miala wanogoe nalaelaeana warua.

⁷Ma Sup̃e e dawona ki asulati sikai ragi ni nasakeana ni malip̃ogi ni matamai ki nia, go e dip̃a lesi miala wanogoe, go e kokolo.

⁸Go e pakilina, ragi waina elo e sake, naga Sup̃e e dawona ki nalagi ruatu vivitinu sikai; go elo e dara nap̃au ni Yonah, go e matakimala, go e dum̃ana maneana datago naga ega mate, po noa, Namateana aginau e p̃ia liu namauriana aginau.

⁹Go Sup̃e e noa ki Yonah, Ku mari p̃ia naga p̃a maeto nalakena lesi miala kite? Go e noa, A mari p̃ia naga aga maeto pa pa paki namateana.

¹⁰Go Yehovah e noa, Nigo ku susue nalakena lesi miala, waina ku da p̃osiwosi ki nia mau, go ku da mari a e ulua mau; waina e pakilina nap̃ogiana sikai, po moro puoli nap̃ogiana sikai:

¹¹go kinau aga ta susue nalakena Nineveh, natokoana warua waina kite? Waina naatam̃oli laapa liu manu p̃onotia sikai go manu rualima dua eu doko asa waina eu da leop̃otae nam̃elearuda ni matua go nam̃elearuda ni mawiri mau, go katel laapa.