Read Nguna Togoa Etafe North NUMBERS 10 Bible Online

NUMBERS 10 - Nguna Togoa Etafe North bible

NUMBERS 10

¹Go Yehovah e pasa paki Moses, po naga,

²P̃a mari paiga dua ni silver; p̃a mari ra eroga vei nawosiana malo wono: go p̃a sui ra naga p̃a soso saisai ki nasaisaiana mamau, go naga nasaisaiana euga rakai po surata pano.

³Go ragi waina euga sui ra, nasaisaiana mamau euga tum̃ada saisai ki da umai punusi ko doko namata ni tap̃aup̃au ni nasaisaiana.

⁴Ma eu pe sui paiga sikai maau, tea maraki maga, nap̃au maga ni manu maga ni Israel, eu pe wo dum̃ada saisai ki da umai punusi ko.

⁵Go ragi waina kuga sui naviosoana sikai, taua mamau waina eu m̃enaki doko taleva ni elo sake, euga rakai po surata pano.

⁶Go ragi waina kuga sui naviosoana sikai sala kerua, taua mamau waina eu doko taleva ni etua euga rakai po surata pano: euga sui naviosoana sikai ragi waina euga vaki nasurataana adeada maga pano.

⁷Go ragi waina nasaisaiana ega vei tea viragi‐saisai‐kiana, kuga sui a, ma kuga ta sui naviosoana sikai mau.

⁸Go Aaron natuna tea viri maga euga sui paiga maga: go euga manimu pei natawonakiana sikai usuraki tagona animu maga pa pa ega tu du po du mau du.

⁹Go ragi waina kuga vaki navakalo navanua animu dip̃a wala p̃ota waina e do diesoki mu, kuga sui paiga maga ni naviosoana sikai; go kuga wo pei tea midoakiana narae ni Yehovah Sup̃e animu, go kuga wo pei tea mautiana m̃elu dua ki tea kokona ki mu maga.

¹⁰Go naaleatia ni nalaelaeaana animu. Go ragi ni nasaisaiana tatutakiana animu maga, go ragi ni atelagi vau animu maga, kuga sui paiga maga ragi ni navituaana tap̃arakiana animu maga, go ragi ni naviriana maga ni navituaana maga ni natam̃ateana animu maga; naga euga manimu pei namidoaki‐lagatiana sikai narae ni Yehovah Sup̃e animu: kinau a pei Yehovah Sup̃e animu.

¹¹Go e pakilina natau kerua, atelagi kerua, nakup̃a kerualima dua ni atelagi, naga napopouru e pei tea tapeana sake m̃elu dua ki elagi ni nasum̃atokoana ni nanoasokisokiana.

¹²Go Israel natuna maga eu dakai po surata m̃elu dua ki masop̃alo ni Sinai pano nasurataana adeada; go napopouru e doko masop̃alo ni Paran doko.

¹³Go eu dakai po surata nasurataana adeada, pataka ni natip̃akiana ki Yehovah pae nam̃elearu ni Moses.

¹⁴Go manututu ni taua maga ni Yudah natuna maga e pei tea vea mau waina e m̃elu pano, go nara eu surata pano pae taua adeada maga: go Nahshon natu ni Amminadab e pei tea maraki dap̃au taua adeada maga.

¹⁵Go Nethanel natu ni Suar e pei tea maraki dap̃au taua ni naworawora ni Issakar natuna maga.

¹⁶Go Eliab natu ni Helon e pei tea maraki dap̃au taua ni naworawora ni Sebulun natuna maga.

¹⁷Go nasum̃atokoana e pei tea rakaiana; go Cershon natuna maga go Merari natuna maga, waina eu dapetape nasum̃atokoana eu m̃elu po surata pano.

¹⁸Go manututu ni taua maga ni Reuben e m̃elu pano, go nara eu surata pano pae taua adeada maga: go Elisur natu ni Shedeur e pei tea maraki dap̃au taua adeada maga.

¹⁹Go Shelumiel natu ni Surishaddai e pei tea maraki dap̃au taua ni naworawora ni Simeon natuna maga.

²⁰Go Eliasaf natu ni Deuel e pei tea maraki dap̃au taua ni naworawora ni Cad natuna maga.

²¹Go naworawora ni Kohath eu m̃elu po surata pano, doko do dapetape tokora tapu: go nasum̃atokoana e pei tea sike‐lawo‐kiana doko raki da.

²²Go manututu ni taua maga ni Efraim natuna maga e m̃elu pano, go nara eu surata pano pae taua adeada maga; go Elishama natu ni Ammihud e pei tea maraki dap̃au taua adeada maga.

²³Go Camaliel natu ni Pedahsur e pei tea maraki dap̃au taua ni naworawora ni Manasseh natuna maga.

²⁴Go Abidan natu ni Cideoni e pei tea maraki dap̃au taua ni naworawora ni Benyamin natuna maga.

²⁵Go manututu ni taua maga ni Dan natuna maga e m̃elu pano, go nara waina eu pei tea edaku mau ni taua mamau puti, eu surata pano pae taua adeada maga: go Ahieser natu ni Ammishaddai e pei tea maraki dap̃au taua adeada maga.

²⁶Go Pakiel natu ni Okran e pei tea maraki dap̃au taua ni naworawora ni Asher natuna maga.

²⁷Go Ahira natu ni Enan e pei tea maraki dap̃au taua ni naworawora ni Naftali natuna maga.

²⁸Go nasurataana maga ki Israel natuna maga eu dapala nogoe, eu surata pae taua adeada maga; go eu m̃elu po surata pano.

²⁹Go Moses e noa ki Hobab, natu ni Reuel naatam̃oli sikai ni Midian, Moses m̃ona, e naga, Auga wo surata paki tokora waina Yehovah e noa e, waina e naga, Aga wo dua mu asa: p̃a sikoti gami pano, go auga wo mari tea wia paki‐go: nalakena Yehovah e pasa ki tea wia nalo ni Israel.

³⁰Go e noa ki nia, e naga, Aga wo da pano mau; ma aga wo m̃elu pano po paki navanua aginau pano, go paki namatarau aginau.

³¹Go e naga, P̃a ta doropusi gami mau, a pavara ni ko asa; nalakena ku atae naga auga to m̃enaki doko masop̃alo, go p̃a wo maginami pei namatagami maga.

³²Go ega wo doko, waina ku pe sikoti gami pano, io, ega wo doko, naga sara te nawiaana waina Yehovah e pe wo mari a paki gami, kinami ma au pe wo moro mari a ega vataka sikai paki‐go.

³³Go eu m̃elu dua ki tava ki Yehovah po pano nasurataana ni naaleatia dolu; go areka ni navasasokiana ki Yehovah e pea ki da pano nasurataana ni naaleatia dolu, naga ega madeada laaga tokora sikai waina euga maromaro asa.

³⁴Go napopouru ki Yehovah e dap̃augoro ra aleati, ragi waina eu dakai po surata pano.

³⁵Go e pakilina, ragi waina areka e m̃elu po pano, naga Moses e noa naga, P̃a tuleana, Yehovah O, go tea kokona ki‐go maga euga vei tea taperaverakiana pano; go tea maga waina eu pilosi ko euga sava dua ki naraem̃a.

³⁶Go ragi waina e du dorogo, e naga, P̃a liliu umai, Yehovah O, po punusi tivilia maga ni manu maga ni Israel.