Read Nguna Togoa Etafe North NUMBERS 12 Bible Online

NUMBERS 12 - Nguna Togoa Etafe North bible

NUMBERS 12

¹Go Miriam go Aaron ero pasa dip̃a Moses nalakena nagoroi ni Kush waina Moses e dawiri a: nalakena e dawiri nagoroi sikai ni Kush.

²Go ero naga, Yehovah e pasa paki Moses e sikina, kite? E da moro pasa paki gami mau, kite?

³Go Yehovah e dogo e. Go naatam̃oli wanogoe Moses e pei tea matemate liu naatam̃oli maga mamau puti waina eu doko narae ni maramana.

⁴Go Yehovah e pasa paki Moses, go paki Aaron, go paki Miriam, po naga, Nimu dolu kuga mamau puti dave umai paki tap̃aup̃au ni nasaisaiana.

⁵Go eu dave umai. Go Yehovah e siwo umai, e doko tea lawodu sikai ni napopouru, po lawodu namata ni Tap̃aup̃au, po soso Aaron go Miriam: go ero dave umai.

⁶Go e naga, Koroga rogo navasaana aginau maga: profeta sikai e pe toko m̃aleoputo kakamu, kinau Yehovah a pe wo dum̃agu mari au a pe vei tea ataeana paki nia doko navunusiana sikai, a pe wo pasa pusum̃aki paki nia doko nap̃erea sikai.

⁷Tea suasua aginau e da dapala nogoe mau; nae e pei lomau doko nasum̃a aginau mamau:

⁸Aga wo pasa pusum̃aki paki nia nagole paki nagole dokolina, go ega ta pae navasamaluluakiana maga mau; go ega wo leo punusi natakiusiana ni Yehovah: nalakena tea wanogoe ekasana koro da mataku mau naga koroga vasa dip̃a tea suasua aginau, dip̃a Moses?

⁹Go namaetoana ki Yehovah e pavaga dip̃a ra; go e m̃elu pano.

¹⁰Go napopouru e m̃elu dua ki elagi ni Tap̃aup̃au po pano; go p̃a leo, Miriam e po pei lepero, e dare dapala sno: go Aaron e leo punusi Miriam, go p̃a leo, e po pei lepero.

¹¹Go Aaron e noa ki Moses, e naga, Nawota aginau O, a pavara ni ko, p̃a ta doropusi namarinaleosaana ega toko gami mau, nalakena au mari manumatavusa, go nalakena au mari naleo sa.

¹²A pavara ni ko, ega ta dakiusi tea mate sikai mau, waina nap̃okasina e sirinopu ragi waina e pakilina m̃elu nap̃ele ni p̃ilana.

¹³Go Moses e pioso paki Yehovah, doko do naga, P̃a mari pauri a, Sup̃e O, a pavara ni ko asa.

¹⁴Go Yehovah e noa ki Moses, e naga, Tamana e pe taniu naraena, e pe ta maliere naaleatia larua, kite? Ega vei tea kokoro‐p̃onotiana etaku ni tokora ni nam̃enakiana naaleatia ega larua, go edaku ki tea wanogoe ega moro pei tea viragiana umai.

¹⁵Go Miriam e pei tea kokoro‐p̃onotiana etaku ni tokora ni nam̃enakiana naaleatia larua: go narei eu da moro paki nasurataana mau pa pa Miriam e moro pei tea viragiana umai.

¹⁶Go edaku ki tea wanogoe narei eu m̃elu dua ki Haseroth po moro surata nasurataana adeada pano, po m̃enaki doko masop̃alo ni Paran.