Read Nguna Togoa Etafe North NUMBERS 13 Bible Online

NUMBERS 13 - Nguna Togoa Etafe North bible

NUMBERS 13

¹Go Yehovah e pasa paki Moses, po naga,

²P̃a tip̃aki lua naatam̃oli maga pano, naga euga leo pavaraka navanua ni Kanaan, waina aga wo dua Israel natuna maga asa: p̃a tip̃aki lua naatam̃oli sikasikai m̃elu sara naworawora ni tamada maga, euga vei tea maraki adeada maga sikasikai sarasara ra.

³Go Moses e dip̃aki lua ra m̃elu dua ki masop̃alo ni Paran pano, pataka ni natip̃akiana ki Yehovah: eu mamau puti pei nap̃au maga ni Israel natuna maga.

⁴Go tea maga waia eu pei nagisada maga: ni naworawora ni Reuben, Shammua natu ni Sakkur.

⁵Ni naworawora ni Simeon, Shafat natu ni Hori.

⁶Ni naworawora ni Yudah, Kaleb natu ni Yefuneh.

⁷Ni naworawora ni Issakar, Ikal natu ni Yosef.

⁸Ni naworawora ni Efraim, Hoshea natu ni Nun.

⁹Ni naworawora ni Benyamin, Palti natu ni Rafu.

¹⁰Ni naworawora ni Sebulun, Caddiel natu ni Sodi.

¹¹Ni naworawora ni Yosef, waina e pei naworawora ni Manasseh, Caddi natu ni Susi.

¹²Ni naworawora ni Dan, Ammiel natu ni Cemalli.

¹³Ni naworawora ni Asher, Sethur natu ni Mikael.

¹⁴Ni naworawora ni Naftali, Nahbi natu ni Vofsi.

¹⁵Ni naworawora ni Cad, Ceuel natu ni Maki.

¹⁶Tea maga wanogoe eu pei nagisa ni naatam̃oli maga waina Moses e dip̃aki lua ra pano naga euga leo pavaraka navanua. Go Moses e soso Hoshea, natu ni Nun, ki Yoshua.

¹⁷Go Moses e dip̃aki lua ra pano naga euga leo pavaraka navanua ni Kanaan, e noa ki da, e naga, Kuga vae napua waia pae taleva ni Sauth, po sake paki tava maga pano:

¹⁸Po leo punusi navanua naga e dapale sava; go narei waina eu doko asa doko naga eu pe kasua kite eu pe manainai, eu pe visa maau kite eu pe laapa;

¹⁹Go navanua waina eu doko asa doko naga e pe wia kite e pe sa; go natokoana maga waina eu doko asa doko naga eu pe vei tokora ni nam̃enakiana, kite eu pe vei natokoana maga ni p̃aaka;

²⁰Go navanua naga e dapale sava, e pe m̃anopunopu kite e pe m̃agura, mala ni nakau e pe toko asa kite e pe tika. Go kuga viviari, po dape nawa ni navanua seara umai. Go ragi wanogoe e pei ragi ni takavea ni nawa ni vaine.

²¹Go eu sake pano, po leo pavaraka navanua pae masop̃alo ni Sin pano pa pa liliu Rehob, paki tokora ni nasiliana paki Hamath.

²²Go eu pae taleva ni Sauth sake pano, po umai paki Hebron; go Ahiman, Sheshai, go Talmai, Anak natuna maga, eu doko tokora wanogoe doko. (Go Hebron e pei tea tavagiana natau larua sua, go eu moro davagi Soan doko Ityipt).

²³Go eu rumai paki nap̃aloa ni Eshkol, po dae kotovi ara sikai ni m̃okai ni nawa ni vaine, go eu pausi a ki nakau vavau sikai; go eu moro dape nawa ni pomekranet seara umai go nawa ni napuliva seara.

²⁴Tokora wanogoe e pei tea sosoana ki nap̃aloa ni Eshkol, nalakena m̃okai waina Israel natuna maga eu dae kotovi a asa.

²⁵Go eu leo pavaraka navanua naaleatia rualima pati, po moro liliu umai.

²⁶Go eu rumai paki Kadesh doko masop̃alo ni Paran punusi Moses, go Aaron, go nasaisaiana mamau ni Israel natuna maga; go eu dape navasaana umai noa ki da asa, go ki nasaisaiana mamau, po pisei ki da nawa ni navanua.

²⁷Go eu noa ki nia, eu naga, Au rumai paki navanua waina ku dip̃aki lua gami pano punusi a, go lomau e sara ki milk go ki honi; go tea waia e pei nawana.

²⁸Ma narei waina eu doko navanua wanogoe doko eu kasua, go natokoana maga eu pei tea p̃aakagoroana, go eu p̃arua: go au moro punusi Anak natuna maga eu doko asa doko.

²⁹Amalek e doko navanua ni Sauth doko: go naworawora ni Heth, go naworawora ni Yebus, go naworawora ni Amor, eu doko tava maga doko: go naworawora ni Kanaan eu doko nadigi ni natasi doko, go nadigi ni Yordan.

³⁰Go Kaleb e mari narei eu punuta narae ni Moses, po naga, Tuga m̃araverave sake pano, po peani a; nalakena tu mariatae marimatua ki nia.

³¹Ma naatam̃oli maga waina eu mamau pano, eu naga, Tu mari sap̃o sake pano dip̃a narei wanogoe; nalakena nara eu kasua do liu gida.

³²Go eu dape narogorogoana sa nalo ni navanua waina eu leo pavaraka asa paki Israel natuna maga, eu naga, Navanua wanogoe, waina au surata asa naga auga leo pavaraka asa, e pei navanua sikai waina e do gani dinomi naatatoko kakana maga; go narei mamau puti waina au punusi ra eu doko asa doko, eu pei naatam̃oli p̃atoko warua.

³³Go tokora wanogoe au punusi pule maga, Anak natuna maga: go au punusi naga kinami au dakiusi midiri, go e pei lomau namatada.