Read Nguna Togoa Etafe North NUMBERS 14 Bible Online

NUMBERS 14 - Nguna Togoa Etafe North bible

NUMBERS 14

¹Go nasaisaiana mamau eu sike nadaleoda, po pioso kasua; go narei eu dagi p̃ogi wanogoe.

²Go Israel natuna maga eu daururu dip̃a Moses go dip̃a Aaron: go nasaisaiana mamau eu noa ki da, eu naga, Au pe mate navanua ni Ityipt e pe wia! Kite au pe mate masop̃alo e pe wia!

³Go ekasana Yehovah e piragi gami umai paki navanua waia, naga auga rowo ki lova? Nagoroi aginami maga go piakirikiri aginami maga euga vei tea vuti‐lua‐pavakotoana sikai: e da p̃ia ki gami naga auga liliu paki Ityipt pano, kite?

⁴Go eu dum̃ada noa ki da, eu naga, Tuga matadoa tea maraki sikai, go tuga liliu paki Ityipt.

⁵Go Moses go Aaron ero dowo dap̃olosiwo narae ni nasaisaiana mamau ni Israel natuna maga.

⁶Go Yoshua natu ni Nun go Kaleb natu ni Yefuneh, waina ero pei tea maga waina eu leo pavaraka navanua seara kakada, ero pua p̃orae sugoro adeada maga:

⁷Go ero pasa paki nasaisaiana mamau ni Israel natuna maga, po naga, Navanua wanogoe waina au surata duaduru asa naga auga leo pavaraka asa, e pei navanua wia liu sikai.

⁸Yehovah e pe midoaki m̃ata ki gida, e pe wo piragi gida pano paki navanua wanogoe, po dua gida asa; navanua sikai waina e sara ki milk go ki honi.

⁹Ma kuga ta mari p̃auluulu dip̃a Yehovah mau, go kuga ta matau ki narei ni navanua wanogoe mau; nalakena eu pei navinaga anigida: melu adeada e pei tea tapeluaana kiada, go Yehovah e pei tea anigida: kuga ta matau ki da mau.

¹⁰Ma nasaisaiana mamau eu noa naga euga nadi ra ki vatu. Go nasamasamaana ki Yehovah e pakilina ekopu ni tap̃aup̃au ni nasaisaiana, paki Israel natuna maga mamau puti.

¹¹Go Yehovah e noa ki Moses, e naga, Narei waia euga tip̃adoa au pa pa paki seve ragi? Go euga ta saralomau au pa pa paki seve ragi, go a mari navaivaiana laapa m̃aleoputo kakada?

¹²Aga wo atugi ra ki nasasanaana sa, po dape lua p̃aumaso adeada kiada, go aga wo mari ko p̃a vei nalauna sikai waina ega warua liu po kasua liu ra.

¹³Go Moses e noa ki Yehovah, e naga, Go naka ni Ityipt euga wo dogo e; nalakena ku piragi narei waia m̃elu m̃aleoputo kakada sake umai ki nakasuaana warua anigo;

¹⁴Go nara euga wo noakisai naatatoko maga ni navanua wanogoe asa: nara eu dogo sua naga nigo Yehovah ku doko m̃aleoputo ni narei waia; nalakena nigo Yehovah ku pei tea vunusiana narae paki narae, go napopouru anigo e do lawodu dap̃augoro ra, go ku do pea ki da pano, doko tea lawodu sikai ni napopouru aleati, go doko tea lawodu sikai ni nakapu p̃ogi.

¹⁵Go ku pe mari punue narei waia dakiusi eu pe vei naatam̃oli sikai maau, nalauna maga waina eu dogo narogoana kakam̃a eu pe wo pasa, doko do naga,

¹⁶Nalakena Yehovah e mari sap̃o piragi narei waia umai paki navanua waina e pivisa paki da naga ega tua ra asa, nalakena tea wanogoe e atugi ra masop̃alo.

¹⁷Go a pavara ni ko, nakasuaana ki Yehovah ega wo p̃arua, dakiusi waina ku noa e, doko do naga, Yehovah e daliali namaetoana,

¹⁸go e p̃arua nadodomiana, e do dape lua namarinaleotageleana go natapiriana, go waina ega wo da noa naga sogi e puoli mau; e do parati natuda namarinaleotageleana ki tamada, tagona ketolu go kevati.

¹⁹P̃a magi narei waia midoakikorokoro namarinaleotageleana adeada, a pavara ni ko asa, ega vae nadodomiana warua anigo, go ega tapala waina ku magi narei waia midoakikorokoro ra, pae ragi waina eu doko Ityipt pa pa paki ragi waia.

²⁰Go Yehovah e naga, A po madeada midoakikorokoro ra, pataka ni navasaana anigo:

²¹Ma e pei lomau, kinau a mauri, go maramana mamau ega vura ki nasamasamaana ki Yehovah;

²²Nalakena naatam̃oli maga mamau puti wanogoe waina eu punusi nasamasamaana aginau, go navaivaiana aginau maga, waina a mari ra Ityipt go masop̃alo, ma eu maridogo au sala kerualima waia, go eu da dogo parati ki nadaleogu mau;

²³Nara euga wo da punusi navanua wanogoe mau waina a pivisa paki tamada maga naga aga tua ra asa, go tea maga waina eu dip̃adoa au, nara ma euga wo da punusi a mau:

²⁴Ma tea suasua aginau Kaleb, nalakena naatana mamau sikai e doko asa, go e pakavuro dausi au, ega vei nae waina aga wo piragi a umai paki navanua waina e paki asa pano: go naworana ega wo peanipioli ki nia.

²⁵Go Amalek go naworawora ni Kanaan eu doko nap̃aloa doko: matamai kuga maradoa, go kuga vaki masop̃alo pano, kuga vae napua waina e paki Natasi ni Nam̃om̃o.

²⁶Go Yehovah e pasa paki Moses, go paki Aaron,

²⁷po naga, Pa pa paki seve ragi aga soki nasaisaiana sigisigileo waia, waina eu do daururu dip̃a au? A po dogo sua nataururuana maga ki Israel natuna maga, waina eu do daururu asa dip̃a au.

²⁸P̃a noa ki da, p̃a naga, Yehovah e naga, Kinau a mauri doko, go dapala waina nimu ku pasa nadaligagu, dapala nogoe kinau aga wo mari a paki mu:

²⁹Nap̃atoko mate animu maga euga rowo masop̃alo waia; go nimu tea mamau puti kakamu waina ku pei tea veveana, tea ni natau rualima dua go do liu, waina ku daururu dip̃a au,

³⁰Kuga wo da umai paki navanua wanogoe mau, waina a pivisa nalo kakana naga aga mari mu naga kuga toko asa doko, ma Kaleb natu ni Yefuneh, go Yoshua natu ni Nun, nara sikida eroga vaki asa.

³¹Ma piakirikiri animu maga, waina ku noa naga euga wo pei tea vuti‐lua‐pavakotoana sikai, nara aga wo piragi ra umai, go nara euga wo atae navanua waina nimu ku po dip̃adoa e.

³²Ma nimu, nap̃atoko mate animu maga euga rowo masop̃alo waia.

³³Go natumu maga euga vei tea vanovano maga masop̃alo natau rualima pati, go euga tapetape namaripeleana animu maga, pa pa nap̃atoko mate animu maga euga mamau puti mavunuvunu masop̃alo.

³⁴Ega tapala naveveana ni naaleatia maga waina ku doko do leo pavaraka navanua, naaleatia rualima pati, natau sikai ega tip̃a naaleatia sikai, ega tapala nogoe kuga tapetape namarinaleotageleana animu maga, natau rualima pati, go kuga atae navanop̃otaana aginau.

³⁵Kinau Yehovah a po pasa, a naga, E pei lomau, aga wo mari tea wanogoe paki nasaisaiana sigisigileo mamau waia, waina eu pei tea viragi‐saisaikiana dip̃a au: euga wo pei tea dinomiana masop̃alo waia, go tokora wanogoe euga wo mate asa.

³⁶Go naatam̃oli maga wanogoe, waina Moses e dip̃aki lua ra pano naga euga leo pavaraka navanua, go waina eu liliu umai, po mari nasaisaiana mamau eu daururu dip̃a e, waina eu dape narogorogoana sa sikai nalo ni navanua wanogoe umai,

³⁷Naatam̃oli maga wanogoe, waina eu dape narogorogoana sa sikai nalo ni navanua wanogoe umai, eu mate ki nasasanaana sa narae ni Yehovah.

³⁸Ma Yoshua natu ni Nun, go Kaleb natu ni Yefuneh, waina ero pei naatam̃oli maga waina eu paki navanua wanogoe naga euga leo pavaraka asa seara kakada, nara ero dua maau ero mauri doko.

³⁹Go Moses e dogorogo ki nanoaana maga wanogoe paki Israel natuna maga mamau puti: go narei eu susue p̃arua.

⁴⁰Go eu duleana malip̃ogi loaloa, po sake paki nam̃asua ni tava pano, eu naga, Kuga leo, tu doko nea, go tuga sake paki tokora waina Yehovah e pasa ki gida asa: nalakena tu mari naleo sa.

⁴¹Go Moses e naga, Ekasana kuga tapiri natip̃akiana ki Yehovah, nalakena ega wo da disu p̃ia mau?

⁴²Kuga ta sake pano mau, nalakena Yehovah e da sikoti mu doko mau; naga kuga ta pei tea atugiana narae ni tea kokona ki mu maga mau.

⁴³Nalakena tea ni Amalek go naworawora ni Kanaan eu doko naraemu tokora wanogoe, go kuga rowo ki lova: nalakena ku dawasi pano po da moro dausi Yehovah mau, nalakena tea wanogoe Yehovah ega wo da sikoti mu doko mau.

⁴⁴Ma eu mari p̃auluulu sake paki nam̃asua ni tava pano: ma areka ni navasasokiana ki Yehovah, go Moses, ero da m̃elu dua ki tokora ni nam̃enakiana pano mau.

⁴⁵Go tea ni Amalek eu siwo umai, go naworawora ni Kanaan waina eu doko tava wanogoe doko, po atugi ra po marimatua ki da, pano pa pa liliu Hormah.