Read Nguna Togoa Etafe North NUMBERS 15 Bible Online

NUMBERS 15 - Nguna Togoa Etafe North bible

NUMBERS 15

¹Go Yehovah e pasa paki Moses, po naga,

²P̃a vasa paki Israel natuna maga, po noa ki da, p̃a naga, Ragi waina kuga wo umai doko sua navanua waina kuga wo doko asa doko, waina kinau a dua mu asa,

³Go kuga wo mari navituaana sikai ni nakapu paki Yehovah, navituaana tap̃arakiana sikai, kite naviriana sikai, naga kuga vakavuro nasaiana sikai, kite waina e pe vei navituaana suasuakiana sikai, kite e pe vei nasaisaiana tatutakiana animu maga, naga ega mari tea ni nap̃o wia paki Yehovah, m̃elu navata ni katel, kite m̃elu navata ni shiip:

⁴Naata waina ega vitua ki naviriana ni navinaga aneana sikai paki Yehovah, ega vitua ki navituaana sikai ni flaur ni kekerualima sikai ni efah sikai ni flaur wia, tea sarisariana pilake namagovai kevati ni hin sikai ni naroro:

⁵Go p̃a mari m̃ata ki waine naga ega vei navituaana takiana sikai, namagovai kevati ni hin sikai ega vilake navituaana tap̃arakiana kite naviriana, ega vilake shiip natuna sikasikai.

⁶Kite e pe vei shiip anoai sikai, p̃a mari m̃ata ki kekerualima dua ni efah sikai ni flaur wia, tea sarisariana pilake namagovai ketolu ni hin sikai ni naroro, naga ega vei navituaana ni flaur sikai.

⁷Go p̃a vitua ki namagovai ketolu ni hin sikai ni waine, naga ega vei navituaana takiana sikai, tea ni nap̃o wia paki Yehovah.

⁸Go ragi waina p̃a mari m̃ata ki kau anoai sikai naga ega vei navituaana tap̃arakiana sikai, kite naviriana sikai, kite naga ega vakavuro nasaiana sikai, kite ega vei navituaana maga ni natam̃ateana paki Yehovah:

⁹P̃a vitua ega vilake kau natuna wanogoe ki navituaana sikai ni flaur kekerualima dolu ni efah sikai ni flaur wia, tea sarisariana pilake namagovai sikai ni hin sikai ni naroro.

¹⁰Go p̃a vitua ki waine namagovai sikai ni hin sikai naga ega vei navituaana takiana sikai, navituaana tap̃arakiana sikai, tea ni nap̃o wia paki Yehovah.

¹¹Ega vei tea mariana ega tapala nogoe raki kau anoai sikai, kite raki shiip anoai sikai, kite raki shiip natuna anoai sikai, kite raki naninani natuna sikai, ega sikasikai sarasara ra.

¹²Pataka ni naveveana kakada waina p̃a mari m̃ata ki da, p̃a mari ega tapala nogoe paki da sikasikai sarasara ra.

¹³Naatatoko mamau puti euga mari naleo maga wanogoe ega tapala nogoe, euga vitua ki navituaana tap̃arakiana sikai, tea ni nap̃o wia paki Yehovah.

¹⁴Go nam̃enaki‐atatoko sikai e pe m̃enaki sikoti mu, kite te naata e pe toko m̃aleoputo kakamu usuraki tagona animu maga, go e pe masauna naga ega vitua ki navituaana tap̃arakiana sikai, tea ni nap̃o wia paki Yehovah; dapala waina nimu ku mari a, dapala nogoe nae ma ega moro mari a.

¹⁵Nasaisaiana mamau puti, nimu ma nam̃enaki‐atatoko waina e pe m̃enaki sikoti mu doko, kuga toko etano ni natawonakiana sikai maau, natawonakiana sikai waina ega tu du po du mau du usuraki tagona animu maga: dapala waina nimu ku doko, dapala nogoe nam̃enaki‐atatoko waina e m̃enaki sikoti mu nae ma ega moro doko, narae ni Yehovah.

¹⁶Nawotaeana sikai maau go navasap̃otaeana sikai maau ega vei animu go agi nam̃enaki‐atatoko waina e m̃enaki sikoti mu.

¹⁷Go Yehovah e pasa paki Moses, po naga,

¹⁸P̃a vasa paki Israel natuna maga, po noa ki da, p̃a naga, Ragi waina kuga wo umai doko sua navanua waina aga viragi mu umai paki asa,

¹⁹Ega wo doko, ragi waina kuga wo gani navinaga ni navanua, naga kuga vitua ki navituaana sikosikoviana sikai paki Yehovah.

²⁰Kuga vitua ki keke sikai ni takavea ni flaur animu naga ega vei navituaana sikosikoviana sikai: kuga vitua ki nia naga ega vei navituaana sikai m̃elu malo wokalesue.

²¹Kuga vitua ki navituaana sikosikoviana sikai ni takavea ni flaur animu paki Yehovah usuraki tagona animu maga.

²²Go ku pe mari sap̃o, po da pavaigoro natip̃akiana maga mamau puti wanogoe mau, waina Yehovah e noa ki Moses asa,

²³Tea mamau puti waina Yehovah e dip̃aki mu asa pae nam̃elearu ni Moses, pae naaleatia waina Yehovah e dip̃aki Moses asa pano usuraki tagona animu maga;

²⁴Ega wo doko, waina e pe vei tea mariana pae nasalup̃eana, go nasaisaiana eu pe ta atae a mau, ega wo doko naga nasaisaiana mamau euga vitua ki kau natuna anoai sikai naga ega vei navituaana tap̃arakiana sikai, tea ni nap̃o wia paki Yehovah, ega vilake navituaana ni flaur kakana, go navituaana takiana kakana, ega vataka ni natawonakiana, go naninani anoai sikai naga ega vei navituaana sikai ni namarinaleosaana.

²⁵Go tea viri ega magi nasaisaiana mamau ni Israel natuna maga mari natap̃augoroana, go ega wo madeada pei tea midoakikorokoroana; nalakena e pei nasalup̃eana sikai, go eu dape naviriana ni navinaga adeada umai, navituaana tap̃arakiana sikai paki Yehovah, go navituaana ni namarinaleosaana adeada paki narae ni Yehovah, dip̃a nasalup̃eana adeada:

²⁶Go nasaisaiana mamau ni Israel natuna maga euga madeada pei tea midoakikorokoroana, nara ma nam̃enaki‐atatoko waina e m̃enaki m̃aleoputo kakada; nalakena eu mamau puti mari a pae nasalup̃eana.

²⁷Go naatam̃oli sikai e pe mari naleo sa, e pe vae nasalup̃eana, e pe wo pitua ki naninani goroi sikai tea ni natau sikai, naga ega vei navituaana ni namarinaleosaana sikai.

²⁸Go tea viri ega magi naata waina e pe mari sap̃o, waina e pe mari naleo sa pae nasalup̃eana, ega maneana mari natap̃augoroana narae ni Yehovah, naga ega maneana mari natap̃augoroana; go ega maneana pei tea midoakikorokoroana.

²⁹Kuga veani nawotaeana sikai maau agi naatam̃oli waina e pe mari te navatuna pae nasalup̃eana, agi naatatoko ni Israel natuna maga, go agi nam̃enaki‐atatoko waina e pe m̃enaki m̃aleoputo kakada.

³⁰Ma naata waina e pe mari te navatuna ki namarilagilagiana, e pe vei naatatoko kite e pe vei nam̃enaki‐atatoko, naata wanogoe e pe vasa sa ki Yehovah; go naata wanogoe ega vei tea taeluaana m̃elu dua ki narei aneana.

³¹Nalakena e dip̃adoa navasaana ki Yehovah, po dapiri natip̃akiana aneana; nalakena tea wanogoe naata wanogoe ega vei tea taeluaana, namarinaleotageleana aneana ega toko asa.

³²Go ragi waina Israel natuna maga eu doko masop̃alo doko, eu pap̃ai naatam̃oli sikai waina e do p̃owota naaleatia ni sabbath.

³³Go tea maga waina eu pap̃ai a ragi waina e do p̃owota, eu piragi a umai punusi Moses go Aaron, go nasaisaiana mamau.

³⁴Go eu pitua ki nia paki navavaigoroana, nalakena e ko da pei tea noap̃otaeana nasava waina ega vei tea mariana paki nia.

³⁵Go Yehovah e noa ki Moses, e naga, Naatam̃oli wanogoe ega vei tea toropusiana paki namateana: nasaisaiana mamau euga nadi a ki vatu etaku ni tokora ni nam̃enakiana.

³⁶Go nasaisaiana mamau eu piragi a paki etaku ni tokora ni nam̃enakiana, po nadi a ki vatu, go e mate; dapala waina Yehovah e dip̃aki Moses asa.

³⁷Go Yehovah e pasa paki Moses, po naga,

³⁸P̃a vasa paki Israel natuna maga, po dip̃aki da naga euga vausoki tea matasereserea maga doko namatap̃ago ni sugoro adeada maga usuraki tagona adeada maga, go naga euga vausoki tea matasereserea maga ni nalolo kesakesa maga.

³⁹Go ega manimu pei tea matasereserea sikai, naga kuga to leo punusi a, po midoaki parati ki natip̃akiana maga mamau puti ki Yehovah, po mari pataka da; go naga kuga ta do dausi namasauana ki nap̃op̃omu go ki namatamu maga mau, dakiusi waina ku pea do dausi pele ara:

⁴⁰Naga kuga midoaki parati ki po mari natip̃akiana aginau maga mamau puti, po pei tea tapu paki Sup̃e animu.

⁴¹Kinau a pei Yehovah Sup̃e animu, waina a piragi mu m̃elu dua ki navanua ni Ityipt umai, naga aga vei Sup̃e animu: kinau a pei Yehovah Sup̃e animu.