Read Nguna Togoa Etafe North NUMBERS 16 Bible Online

NUMBERS 16 - Nguna Togoa Etafe North bible

NUMBERS 16

¹Go Korah, natu ni Ishar, natu ni Kohath, natu ni Levi, nara ma Dathan go Abiram, Eliab natuna maga, go On, natu ni Peleth, Reuben natuna maga, eu piragi naatam̃oli maga:

²Go eu duleana narae ni Moses, nara ma Israel natuna maga seara kakada, tea maraki p̃onotia dua rualima takuna lima ni nasaisaiana, tea matadoaana maga m̃elu nasaisaiana, naatam̃oli rogoana maga:

³Go eu dum̃ada saisai ki da dip̃a Moses go dip̃a Aaron, po noa ki da, eu naga, Nimu koro do dum̃amu dape mu sake, go nasaisaiana mamau eu dapu, sara naata sikasikai kakada, go Yehovah e doko sikoti ra doko: go ekasana koro do dum̃amu sike mu pakilagi dap̃au nasaisaiana ki Yehovah?

⁴Go ragi waina Moses e dogo e, e dowo dap̃olosiwo:

⁵Go e pasa paki Korah go paki taua aneana maga, po naga, Matamai malip̃ogi Yehovah ega wo pisei ki gida sei waina eu pei tea aneana, go sei waina e dapu, go ega wo mari a ega vaki m̃aladigi ki nia: tea waina Yehovah ega wo matadoa e, ega wo mari a ega vaki m̃aladigi ki nia.

⁶Kuga mari ega tapala nea, Korah, nimu ma taua anigo: kuga tape lasa maga ni tea ni nap̃o wia;

⁷Po doropusi nakapu vavaga ega toko ara, po doropusi tea ni nap̃o wia ara narae ni Yehovah matamai: go ega wo doko naga naatam̃oli waina Yehovah ega matadoa e, ega wo dapu: ku do dum̃amu dape mu sake, nimu Levi natuna maga.

⁸Go Moses e noa ki Korah, e naga, Kuga taki dorogo, nimu Levi natuna maga:

⁹Ku midoa ki nia naga e da pei te navatuna mau, waina Sup̃e ki Israel e mari masale ki mu m̃elu nasaisaiana ni Israel, naga ega mari mu kuga vaki m̃aladigi ki nia; naga kuga mari nawosiana ni nasuasuaana ni nasum̃atokoana ki Yehovah, go naga kuga tu narae ni nasaisaiana po madeada suasua;

¹⁰Go naga e mari mu ku paki m̃aladigi ki nia, nimu ma taimu Levi natuna maga mamau puti, kite? Go ku moro masauna naga kuga vei tea viri maga, kite?

¹¹Nalakena tea wanogoe nimu ma taua anigo ku mamau puti saisai dip̃a Yehovah: go Aaron, nae e pei sei naga ku daururu dip̃a e?

¹²Go Moses e dip̃aki lua po soso Dathan go Abiram, Eliab natuna maga, naga eroga umai punusi a: go ero naga, Aroga wo da paloti punusi ko mau:

¹³E pei naleo kiki sikai naga ku piragi gami sake umai m̃elu dua ki navanua sikai waina e do sara ki milk go ki honi, naga p̃a mari punue gami masop̃alo, ma ku moro masauna naga p̃a tum̃am̃a mari ko p̃a vei tea maraki sikai dap̃au gami, kite?

¹⁴Go ku da piragi gami umai paki navanua sikai waina e do sara ki milk go ki honi mau, go ku da dua gami naveaniana ni vanua maga go roara maga ni vaine mau: ku masauna naga p̃a asiri lua namata ni naatam̃oli maga wanogoe, kite? Aroga wo da paloti punusi ko mau.

¹⁵Go Moses e maeto p̃arua, go e noa ki Yehovah, e naga, P̃a ta midoaki navituaana adeada mau: a da dape ass sikai kiada mau, go a da mari sa ki tea sikai kakada mau.

¹⁶Go Moses e noa ki Korah, e naga, Nimu ma nasaisaiana mamau anigo, kuga mamau puti du narae ni Yehovah matamai, nigo, go nara, go Aaron, kuga mamau:

¹⁷Go kuga tape lasa ni tea ni nap̃o wia animu sikasikai sarasara mu, po doropusi tea ni nap̃o wia ega toko ara, go kuga tape lasa ni tea ni nap̃o wia animu sikasikai sarasara mu umai paki narae ni Yehovah, lasa ni tea ni nap̃o wia p̃onotia dua rualima takuna lima; go nigo, go Aaron, koroga tape lasa ni tea ni nap̃o wia animu sikasikai umai.

¹⁸Go eu dape lasa ni tea ni nap̃o wia adeada sikasikai sarasara ra, po doropusi nakapu vavaga ara, po doropusi tea ni nap̃o wia e doko ara, po lawodu namata ni tap̃aup̃au ni nasaisaiana sikoti Moses go Aaron.

¹⁹Go Korah e piragi saisai ki nasaisaiana mamau dip̃a ra doko namata ni tap̃aup̃au ni nasaisaiana: go nasamasamaana ni Yehovah e pakilina ki nasaisaiana mamau.

²⁰Go Yehovah e pasa paki Moses go paki Aaron, po naga,

²¹Koroga tum̃amu mari mu koroga tu uvea pa dua ki nasaisaiana waia, naga aga vaka sikai mari puoli ki da.

²²Go ero dowo dap̃olosiwo, po naga, Sup̃e O, Sup̃e ni naata ni sara nap̃okasi, naatam̃oli ega sikai maau e pe mari naleo sa, go ku pe wo maeto ki nasaisaiana mamau, kite?

²³Go Yehovah e pasa paki Moses, po naga,

²⁴P̃a vasa paki nasaisaiana, po naga, Kuga vaki uvea ki nasum̃atokoana ki Korah, Dathan go Abiram.

²⁵Go Moses e duleana po pano punusi Dathan go Abiram; go tea matua maga ni Israel eu dausi a pano.

²⁶Go e pasa paki nasaisaiana, po naga, Kuga m̃elu dua ki tap̃aup̃au maga ki naatam̃oli sigisigileo maga waia, a pavara ni mu asa, po da kisidogo te navatuna adeada sikai mau, mase ku pe vei tea maripuolikiana namarinaleosaana adeada maga mamau puti.

²⁷Go eu m̃elu dua ki nasum̃atokoana ki Korah, Dathan go Abiram: go Dathan go Abiram ero dave umai po lawodu namata ni tap̃aup̃au adeada maga, nara ma nagoroi adeada maga, go natuda naanoai maga, go piakirikiri adeada maga.

²⁸Go Moses e naga, Pae tea waia kuga wo atae naga Yehovah e dip̃aki lua au umai naga aga mari nawosiana mamau puti waia; nalakena a da mari a pae namidodoaana aginau mau.

²⁹Naatam̃oli maga waia eu pe mate namateana waina naatam̃oli maga mamau puti eu do mate asa, kite eu pe vei tea varatiana dakiusi waina naatam̃oli maga mamau puti eu do pei tea varatiana asa; Yehovah e pe ta dip̃aki lua au umai mau.

³⁰Ma Yehovah e pe mari naleo vau sikai, po mari natano e pe maga po dinomi puti ra, go sara naleo adeada maga, go eu pe siwo pulemauri paki Sheol pano; ku pe wo atae naga naatam̃oli maga waia eu midoaki p̃alo ki Yehovah.

³¹Go e pakilina, ragi waina e pasa sua ki navasaana maga wanogoe, naga natano waina eu lawodu asa, e pamawota:

³²Go natano e maga, po dinomi puti ra, nara ma tea ni nasum̃a adeada maga, go naatam̃oli maga mamau puti waina eu pei agi Korah, go sara naleo adeada maga.

³³Go nara ma tea mamau puti adeada, eu siwo pulemauri paki Sheol pano: go natano e p̃osaegoro ra, go eu pano puoli m̃elu dua ki nasaisaiana.

³⁴Go Israel mamau puti waina eu doko dalivirigoro ra eu sava pano ragi waina eu dogo nakuapiosoana adeada: nalakena eu naga, Mase natano e pe moro dinomi gida.

³⁵Go nakapu vavaga e pae Yehovah umai, po gani dinomi naatam̃oli p̃onotia dua rualima takuna lima waina eu pitua ki tea ni nap̃o wia.

³⁶Go Yehovah e pasa paki Moses, po naga,

³⁷P̃a noa ki Eleasar natu ni Aaron tea viri, naga ega tape dakati lasa maga ni tea ni nap̃o wia m̃elu dua ki natap̃arakiana, go p̃a taperavera ki nakapu wanogoe; nalakena e dapu;

³⁸Lasa maga wanogoe ni tea ni nap̃o wia ki tea sigisigileo maga wanogoe waina eu mate dip̃a namarinaleosaana adeada, euga vei tea tuki‐p̃eleweleakiana naga euga vei tea welewelea manivenive maga naga euga tap̃augoro wede ni naviriana: nalakena eu pitua ki da narae ni Yehovah, nalakena tea wanogoe eu dapu: go euga wo magi Israel natuna maga pei navaivaiana sikai.

³⁹Go Eleasar tea viri e dape lasa maga ni brass ni tea ni nap̃o wia, waina tea maga waina nakapu e gani ra eu pitua ki da; go eu duki p̃elewelea ki da naga euga vei tea tap̃augoro sikai ni wede ni naviriana:

⁴⁰Naga ega magi Israel natuna maga pei namidoaki‐p̃arati‐kiana sikai naga tea ni nalauna p̃ota waina e da pei tea ni nawora ni Aaron mau, ega ta paki m̃aladigi naga ega tap̃ara ki tea ni nap̃o wia narae ni Yehovah mau; naga ega ta dakiusi Korah, go dakiusi taua aneana mau: dakiusi waina Yehovah e noa ki Eleasar ase pae nam̃elearu ni Moses.

⁴¹Ma matamai ki nia nasaisaiana mamau ni Israel natuna maga eu daururu dip̃a Moses, go dip̃a Aaron, doko do naga, Nimu koro mari punue narei ki Yehovah.

⁴²Go e pakilina, ragi waina nasaisaiana eu saisai dip̃a Moses go dip̃a Aaron, naga eu leo paki tap̃aup̃au ni nasaisaiana: go p̃a leo, napopouru e kovagoro e, go nasamasamaana ni Yehovah e pakilina.

⁴³Go Moses go Aaron ero paki kivea ki narae ni tap̃aup̃au ni nasaisaiana.

⁴⁴Go Yehovah e pasa paki Moses, po naga,

⁴⁵P̃a m̃elu dua ki nasaisaiana waia pano, naga aga mari puoli ki da m̃araverave. Go ero dowo dap̃olosiwo.

⁴⁶Go Moses e noa ki Aaron, e naga, P̃a tape lasa ni tea ni nap̃o wia anigo, po doropusi nakapu vavaga asa m̃elu wede ni naviriana, po doro tea ni nap̃o wia ega toko asa, po dape a pano m̃araverave punusi nasaisaiana, po madeada mari natap̃augoroana: nalakena namaritausuana e dave m̃elu Yehovah; nasasanaana sa e po atulake.

⁴⁷Go Aaron e mari dakiusi waina Moses e noa ki nia asa, po sava paki m̃aleoputo ni nasaisaiana; go p̃a leo, nasasanaana sa e po atulake sua usuraki narei: go e doropusi tea ni nap̃o wia doko lasa, po magi narei mari natap̃augoroana.

⁴⁸Go e lawodu namawota ni tea mate go ni tea mauri; go nasasanaana sa e makoto.

⁴⁹Go tea maga waina eu mate ki nasasanaana sa wanogoe eu pei naatam̃oli tivilia sikai manu pati p̃onotia larua, masale ki tea maga waina eu mate nalo ni Korah.

⁵⁰Go Aaron e moro liliu punusi Moses doko namata ni tap̃aup̃au ni nasaisaiana: go nasasanaana sa e makoto.