Read Nguna Togoa Etafe North NUMBERS 17 Bible Online

NUMBERS 17 - Nguna Togoa Etafe North bible

NUMBERS 17

¹Go Yehovah e pasa paki Moses, po naga,

²P̃a vasa paki Israel natuna maga, po dape kiada tiko maga ega sikasikai pae nasum̃a maga ni tamada maga ki tea maraki adeada maga mamau puti ega vae nasum̃a maga ni tamada maga, tiko rualima sikai tamate dua: p̃a midiri nagisada ega toko adeada sikasikai.

³Go p̃a midiri nagisa ni Aaron tiko ni Levi: nalakena tiko sikai ega vei agi nap̃au ni nasum̃a maga ni tamada maga ega sikasikai.

⁴Go p̃a sawa ki da ekopu ni tap̃aup̃au ni nasaisaiana narae ni nanoasokisokiana, tokora waina aga sua mu asa.

⁵Go ega wo pakilina, naga naatam̃oli waina aga wo matadoa e, tiko aneana ega wo siria: go aga wo mari kotovi nataururuana maga ki Israel natuna maga waina eu do daururu dip̃a ko asa.

⁶Go Moses e pasa paki Israel natuna maga, go tea maraki adeada maga eu mamau puti dua e tiko maga, e sikasikai agi tea maraki sikai, pae nasum̃a maga ni tamada maga, tiko rualima sikai tamate dua: go tiko ki Aaron e pilake tiko adeada maga.

⁷Go Moses e sawa ki tiko maga narae ni Yehovah ekopu ni tap̃aup̃au ni nanoasokisokiana.

⁸Go e pakilina matamai ki nia, naga Moses e paki ekopu ni tap̃aup̃au ni nanoasokisokiana; go p̃a leo, tiko ki Aaron ni nasum̃a ni Levi e siria sua, go e do sirisiria po pum̃a, go e pukep̃ora po dau ki nawa amond matua.

⁹Go Moses e piragi lua tiko maga mamau puti m̃elu dua ki narae ni Yehovah paki katama punusi Israel natuna maga: go eu leousiusi ra, po puati tiko adeada maga sikasikai.

¹⁰Go Yehovah e noa ki Moses, e naga, P̃a tape liliua ki tiko ki Aaron ega moro doko narae ni nanoasokisokiana, naga ega vei tea vavaigoroana doko, ega magi tea mari p̃auluulu natuna maga pei navaivaiana sikai; naga p̃a mari kotovi nataururuana adeada maga dip̃a au, naga euga ta mate mau.

¹¹Go Moses e mari dapala nogoe: dakiusi waina Yehovah e dip̃aki nia asa, e mari dapala nogoe.

¹²Go Israel natuna maga eu pasa paki Moses, po naga, P̃a leo, au do mate, au mavunuvunu, au mamau puti mavunuvunu.

¹³Sara naata waina eu do paki m̃aladigi, waina eu do paki m̃aladigi ki nasum̃atokoana ki Yehovah, eu do mate: auga wo mamau puti mate puoli, kite?