Read Nguna Togoa Etafe North NUMBERS 18 Bible Online

NUMBERS 18 - Nguna Togoa Etafe North bible

NUMBERS 18

¹Go Yehovah e noa ki Aaron, e naga, Nigo go natum̃a maga go nasum̃a ni tamam̃a maga, kuga mamau dapetape namarinaleotageleana ni tokora tapu: go nigo go natum̃a maga kuga mamau dapetape namarinaleotageleana ni navei‐teaviri‐ana animu.

²Go taim̃a maga, naworawora ni Levi, naworawora ni tamam̃a, p̃a viragi ra umai paki m̃aladigi, naga euga vuluti ko, po manigo suasua: ma nimu ma natum̃a maga kuga mamau suasua narae ni tap̃aup̃au ni nanoasokisokiana.

³Go euga vavaigoro natip̃akiana anigo, go naleo‐paratikiana ni naleo maga mamau puti ni Tap̃aup̃au: ma euga ta paki m̃aladigi ki lasa maga ni tokora tapu mau, go paki m̃aladigi ki wede ni naviriana, naga euga ta mate mau, nara ma nigo.

⁴Go euga vuluti ko, po pavaigoro naleo‐parati‐kiana ni tap̃aup̃au ni nasaisaiana, nawosiana mamau puti ni nasuasuaana doko Tap̃aup̃au: go tea ni nalauna p̃ota sikai ega ta paki m̃aladigi ki mu mau.

⁵Go kuga vavaigoro naleo‐parati‐kiana ni tokora tapu, go naleo‐parati‐kiana ni wede ni naviriana: naga namaritausuana ega ta moro doko Israel natuna maga mau.

⁶Go kinau, p̃a leo, a po piragi lua taim̃a maga, naworawora ni Levi m̃elu m̃aleoputo ni Israel natuna maga: eu manimu pei navituaana sikai, navituaana sikai paki Yehovah, naga euga mari nawosiana ni nasuasuaana tap̃aup̃au ni nasaisaiana.

⁷Go nimu ma natum̃a maga kuga mamau pavaigoro nawosiana ni navei‐tea‐viri‐ana, nalo ni sara naleo ni wede ni naviriana, go nalo ni tea waina e doko ekopu ni tea taugoro‐p̃otae; go kuga suasua: a dua mu navei‐tea‐viri‐ana e pei navituaana sikai: go tea ni nalauna p̃ota sikai e pe vaki m̃aladigi, e pe wo pei tea toropusiana paki namateana.

⁸Go Yehovah e pasa paki Aaron, po naga, Go kinau, p̃a leo, kinau a dua ko naleo‐parati‐kiana ni navituaana sikosikoviana maga waina eu pei tea vituakiana paki nau, sara naleo waina Israel natuna maga eu pitua ki da, waina eu dapu, a dua ko ara nalakena navuvurai‐ki‐mu‐ana, nimu ma natum̃a maga, naga ega manimu pei natawonakiana sikai pa pa ega tu du po du mau du.

⁹Tea waia ega vei tea anigo m̃elu naleo tapu liu maga, tea mautiana ki nakapu: sara naviriana ni navinaga adeada, sara navituaana ni flaur adeada, go sara navituaana ni namarinaleosaana, go sara navituaana ni natapiriana adeada, waina euga lagati dua au ara, euga wo dapu liu paki‐go go paki natum̃a maga.

¹⁰P̃a kani a tokora tapu liu: naanoai mamau puti euga kani a; e pei tea tapu paki‐go.

¹¹Go tea waia e pei tea anigo; navituaana sikosikoviana ni navituaana adeada, go navituaana salesaleakiana maga ni Israel natuna maga: a dua ko asa, nimu ma natum̃a naanoai maga go natum̃a nagoroi maga, naga euga manimu pei matele animu pa pa ega tu du po du mau du: sara naatam̃oli waina eu dautau ni nasum̃a anigo, euga kani a.

¹²Tea wia liu ni naroro, go tea wia liu ni waine, go ni korn, tea vea ni takavea kakada maga waina eu pitua ki da paki Yehovah, kinau a dua ko ara.

¹³Takavea ni nawa maga mamau puti ni navanua adeada, waina eu pitua ki da paki Yehovah, euga vei tea anigo; sara naatam̃oli waina eu dautau ni nasum̃a anigo, euga kani a.

¹⁴Sara naleo tapugoroana doko Israel, euga vei tea anigo.

¹⁵Tea mamau puti waina eu pea pakilina ni nap̃okasi waina eu pitua ki nia paki Yehovah, naatam̃oli go nalo tuavati, euga vei tea anigo: ma takalapa ni naatam̃oli, p̃a taulua ra, go tea vea ni nalo tuavati maga waina eu loa, p̃a taulua ra.

¹⁶Go tea maga waina euga vei tea tauluaana, ni tea maga waina eu pei tea ni atelagi sikai go do liu, p̃a taulua ra, ega vae namidoaki‐p̃otae‐ana anigo, ki shekel ega lima, ega takiusi shekel ni tokora tapu (waina e pei cerah rualima dua).

¹⁷Ma tea vea ni oks, kite tea vea ni shiip, kite tea vea ni naninani, p̃a ta daulua ra mau; nara eu dapu: p̃a meseura ki nadada wede ni naviriana, go p̃a tap̃ara ki nap̃eletiada ega vei naviriana sikai pae nakapu, ega vei tea ni nap̃o lolo sikai paki Yehovah.

¹⁸Go nap̃okasida ega vei tea anigo, dakiusi nagorogoro salesaleakiana, go dakiusi namao ni matua, ega vei tea anigo.

¹⁹Navituaana sikosikoviana maga mamau puti ni naleo maga waina eu dapu, waina Israel natuna maga eu pitua ki da paki Yehovah, kinau a dua ko ara, nimu ma natum̃a naanoai maga go natum̃a nagoroi maga, naga ega manimu pei natawonakiana sikai pa pa ega tu du po du mau du: e pei navasasokiana sikai ni natasimena waina ega tu du po du mau du narae ni Yehovah paki‐go go paki naworam̃a.

²⁰Go Yehovah e noa ki Aaron, e naga, P̃a wo da peani tea veanipiolikiana sikai navanua adeada mau, go p̃a wo da peani te matele sikai sikoti ra mau: kinau a pei matele anigo go tea veanipiolikiana anigo m̃aleoputo ni Israel natuna maga.

²¹Go paki Levi natuna maga, p̃a leo, a dua ra kekerualima ni sara naleo ni Israel naga ega vei tea veanipiolikiana sikai, ega oli nawosiana ni nasuasuaana adeada waina eu suasua asa, nawosiana ni nasuasuaana tap̃aup̃au ni nasaisaiana.

²²Go Israel natuna maga euga ta moro paki m̃aladigi ki tap̃aup̃au ni nasaisaiana mau, mase eu pe tapetape namarinaleosaana, po mate.

²³Ma naworawora ni Levi euga mari nawosiana ni nasuasuaana tap̃aup̃au ni nasaisaiana, go nara euga tum̃ada dapetape namarinaleotageleana adeada: ega vei natawonakiana sikai waina ega tu du po du mau du usuraki tagona animu maga, go euga wo da peani tea veanipiolikiana sikai sikoti Israel natuna maga mau.

²⁴Nalakena kekerualima ni Israel natuna maga, waina euga vitua ki da naga euga vei navituaana sikosikoviana sikai paki Yehovah, kinau a dua naworawora ni Levi ara naga ega vei tea veanipiolikiana sikai: nalakena tea wanogoe a noa ki da naga euga wo da peani tea veanipiolikiana sikai sikoti Israel natuna maga mau.

²⁵Go Yehovah e pasa paki Moses, po naga,

²⁶Go p̃a sava paki naworawora ni Levi, po noa ki da, p̃a naga, Ragi waina kuga tape ki Israel natuna maga kekerualima waina a dua mu asa kiada naga ega vei tea veanipiolikiana animu, kuga vitua ki navituaana sikosikoviana sikai asa paki Yehovah, kekerualima sikai ni kekerualima.

²⁷Go navituaana sikosikoviana wanogoe waina kuga vitua ki nia, ega manimu pei tea midoakiana dapala e pe vei korn ni malo wokalesue, go dapala e pe vei navuraana ni m̃oru ni navasokiana ni nawa ni vaine.

²⁸Ega tapala nogoe kuga moro pitua ki navituaana sikosikoviana sikai paki Yehovah ni kekerualima mamau puti animu, waina kuga tape ra ki Israel natuna maga; go navituaana sikosikoviana wanogoe paki Yehovah, kuga tua Aaron tea viri asa.

²⁹Navituaana maga mamau puti waina euga vei tea vituakiana paki mu, kuga vitua ki navituaana visarasara maga paki Yehovah, m̃elu tea wia liu kakada, tea waina e pei tea tapugoroana.

³⁰Nalakena tea wanogoe, p̃a noa ki da, p̃a naga, Ragi waina kuga sikosikovi tea wia liu kakana, ega magi naworawora ni Levi pei tea midoakiana dapala e pe vei kekerualima ni tea ni malo wokalesue, go dapala e pe vei kekerualima ni navuraana ni m̃oru ni navasokiana ni nawa ni vaine.

³¹Go kuga kani a te tokora sikai, nimu ma tea ni nasum̃a animu maga: nalakena e pei namoriana animu oli nasuasuaana animu tap̃aup̃au ni nasaisaiana.

³²Go ku pe sikosikovi tea wia liu kakana ega vea, ku pe wo da dapetape te namarinaleosaana sikai asa mau: ma kuga ta mari m̃oli ki naleo maga ki Israel natuna maga waina eu pei tea tapugoroana, mase ku pe mate.