Read Nguna Togoa Etafe North NUMBERS 20 Bible Online

NUMBERS 20 - Nguna Togoa Etafe North bible

NUMBERS 20

¹Go Israel natuna maga, nasaisaiana mamau puti, eu rumai paki masop̃alo ni Sin atelagi vea: go narei eu doko Kadesh doko; go Miriam e mate tokora wanogoe, po pei tea ovakiana tokora wanogoe.

²Go noai waina nasaisaiana euga munugi a, e dika: go eu dum̃ada saisai ki da dip̃a Moses go dip̃a Aaron.

³Go narei eu pululu ki Moses, po pasa, doko do naga, Au pe mate ragi waina taigami maga eu mate narae ni Yehovah, e pe wia!

⁴Go ekasana ku piragi nasaisaiana ki Yehovah umai paki masop̃alo waia, naga auga mate asa, kinami ma katel aginami?

⁵Go ekasana ku mari gami au m̃elu dua ki Ityipt sake umai, naga p̃a viragi gami umai paki tokora sa waia? E da pei tokora ni napati ni korn mau, kite ni napuliva, kite ni vaine, kite ni pomekranet; go noai waina auga munugi a e dika.

⁶Go Moses go Aaron ero m̃elu dua ki narae ni nasaisaiana pano paki namata ni tap̃aup̃au ni nasaisaiana, po dowo dap̃olosiwo: go nasamasamaana ni Yehovah e pakilina ki da.

⁷Go Yehovah e pasa paki Moses, po naga,

⁸P̃a vuati tiko, po piragi saisai ki nasaisaiana, nimu ma taim̃a Aaron, go p̃a vasa paki vatu laketoko kivea ki namatada maga, naga ega vitua ki noai kakana; go p̃a madeada mari noai ega m̃elu vatu laketoko wanogoe: dapala nogoe p̃a wo dua nasaisaiana go katel adeada noai naga euga munu.

⁹Go Moses e puati tiko m̃elu dua ki narae ni Yehovah, dapala waina e dip̃aki nia asa.

¹⁰Go Moses go Aaron ero piragi saisai ki nasaisaiana kivea ki vatu laketoko, go e noa ki da, e naga, Kuga taki dorogo, nimu tea mari p̃auluulu maga; aroga manimu mari noai ega m̃elu vatu laketoko waia, kite?

¹¹Go Moses e sike nam̃elearuna, po paka rua p̃okati vatu laketoko ki tiko aneana: go noai e m̃elu vatu laketoko umai, go nasaisaiana eu munu, nara ma katel adeada maga.

¹²Go Yehovah e noa ki Moses go ki Aaron, e naga, Nalakena koro da saralomau au mau, naga koroga mari au aga tapu namata ni Israel natuna maga, nalakena tea wanogoe koroga wo da piragi nasaisaiana waia umai paki navanua waina a dua ra asa mau.

¹³Noai maga waia eu pei noai maga ni Meribah; nalakena Israel natuna maga eu pululu ki Yehovah, go e dum̃ana pisei ki nia ara naga e dapu m̃aleoputo kakada.

¹⁴Go Moses e dip̃aki lua tea tautauana maga m̃elu dua ki Kadesh pano punusi nawota ni Edom, doko do naga, Taim̃a Israel e noa dapala nea, e naga, Nigo ku atae narogokitesaana mamau puti waina eu dowo gami:

¹⁵Takana waina tamagami maga eu siwo paki Ityipt pano, go au doko Ityipt doko ragi varau sa; go naka ni Ityipt eu mari gami au dogokitesa, kinami ma tamagami maga:

¹⁶Go ragi waina au pioso paki Yehovah, e dogo nadaleogami, po dip̃aki lua agelo sikai, po piragi lua gami m̃elu dua ki Ityipt sake umai: go p̃a leo, au doko Kadesh doko, natokoana sikai waina e doko namatap̃ago edaku ni navanua anigo:

¹⁷P̃a suasua ki gami naga auga surata duaduru navanua anigo, a pavara ni ko asa: auga wo da surata vanua mau kite roara ni vaine, go auga wo da munu noai ni m̃oru noai maga mau: auga wo surata napua lapa ki nawota, auga wo da dawasi paki taleva ni matua mau kite paki taleva ni mawiri, pa pa auga wo surata liu kokoi anigo.

¹⁸Go Edom e noa ki nia, e naga, P̃a wo da surata duaduru navanua aginau mau, mase a pe tave dip̃a ko ki lova.

¹⁹Go Israel natuna maga eu noa ki nia, eu naga, Auga wo pae napua lapa sake pano: go au pe munu noai anigo, kinami ma katel aginau, a pe wo dua ko naulu kakana: p̃a suasua kinau naga aga surata duaduru, aga ta mari te navatuna mau.

²⁰Go e naga, P̃a wo da surata duaduru asa mau. Go Edom e dave dip̃a e, nara ma narei laapa, ki nam̃elearu kasua sikai.

²¹Dapala nogoe Edom e da suasua ki Israel naga ega surata duaduru navanua aneana mau: nalakena tea wanogoe Israel e m̃elu dua ki nia po pano.

²²Go eu m̃elu dua ki Kadesh po surata pano: go Israel natuna maga, nasaisaiana mamau, eu rumai paki tava Hor.

²³Go Yehovah e pasa paki Moses go paki Aaron doko tava Hor, m̃aladigi ki kokoi ni navanua ni Edom, po naga,

²⁴Aaron ega vei tea saisaikiana paki narei aneana: nalakena ega ta paki navanua waina a dua Israel natuna maga asa mau, nalakena koro mari p̃auluulu dip̃a natip̃akiana aginau noai maga ni Meribah.

²⁵P̃a viragi Aaron go natuna Eleasar sake umai paki tava Hor.

²⁶Po duatilua sugoro maga ki Aaron, po sugoro natuna Eleasar asa: go Aaron ega mate tokora wanogoe, po pei tea saisaikiana paki narei aneana.

²⁷Go Moses e mari dapala waina Yehovah e pitip̃aki asa: go eu sake pano paki tava Hor, doko namata ni nasaisaiana mamau puti.

²⁸Go Moses e duatilua sugoro maga ki Aaron, po sugoro natuna Eleasar ara; go Aaron e mate tokora wanogoe nam̃asua ni tava: go Moses go Eleasar ero pae tava siwo umai.

²⁹Go ragi waina nasaisaiana mamau eu punusi naga Aaron e mate sua, nasum̃a mamau ni Israel eu dagisi Aaron naaleatia rualima dolu.