Read Nguna Togoa Etafe North NUMBERS 21 Bible Online

NUMBERS 21 - Nguna Togoa Etafe North bible

NUMBERS 21

¹Go nawota ni Arad, naatam̃oli sikai ni Kanaan, waina e doko navanua ni Sauth, e dogo narogorogoana naga Israel eu pae napua ni Atharim umai; go e mari navakalo dip̃a Israel, po piragi lua pavakoto seara kakada.

²Go Israel e sai nasaiana sikai paki Yehovah, po naga, Ku pe vitua ki narei waia paki nam̃elearugu, a pe wo mari puoli ki puti natokoana adeada maga.

³Go Yehovah e daki dorogo paki nadaleo ni Israel, po pitua ki tea ni Kanaan paki nam̃elearuda; go eu mari puoli ki puti ra, go natokoana adeada maga: go nagisa ni tokora wanogoe e pei tea sosoana ki Hormah.

⁴Go eu m̃elu dua ki tava Hor, po surata pae napua paki Natasi ni Nam̃om̃o, naga euga surata daliviri navanua ni Edom: go nap̃op̃o ni narei e dodosua p̃arua nalakena napua.

⁵Go narei eu pasa dip̃a Sup̃e go dip̃a Moses, po naga, Ekasana ku piragi lua gami m̃elu dua ki Ityipt sake umai naga auga mate masop̃alo? Nalakena navinaga e dika, go noai e dika; go naatagami e mamarago ki navinaga sa waia.

⁶Go Yehovah e dip̃aki lua m̃aata vivikati sa maga m̃aleoputo ki narei, go eu kati narei; go naatam̃oli laapa ni Israel eu mate.

⁷Go narei eu rumai punusi Moses, po naga, Au po mari naleo sa, nalakena au pasa dip̃a Yehovah, go dip̃a ko; p̃a vavara ni Yehovah, naga ega tape lua m̃aata maga m̃elu dua ki gami pano. Go Moses e magi narei pavara.

⁸Go Yehovah e noa ki Moses, e naga, P̃a tum̃am̃a manigo mari m̃aata vivikati sa sikai, po sike a nakau lawodu sikai: go ega wo pakilina, waina naata sikai e pe vei tea katiana, go e pe leo sake punusi a, e pe wo mauri.

⁹Go Moses e mari m̃aata sikai ni brass, po sike a nakau lawodu sikai: go e pakilina, waina m̃aata sikai e pe kati te naata, go e pe leo sake punusi m̃aata ni brass wanogoe, e pe mauri.

¹⁰Go Israel natuna maga eu moro surata nasurataana adeada, po m̃enaki Oboth.

¹¹Go eu m̃elu dua ki Oboth po surata pano, po m̃enaki Iye‐abarim, waina e doko masop̃alo doko leana dip̃a Moab, paki taleva ni elo sake.

¹²Go eu m̃elu dua ki tokora wanogoe po surata pano, po m̃enaki nap̃aloa ni Sered.

¹³Go eu m̃elu dua ki tokora wanogoe po surata pano, po m̃enaki taleva kerua ni Arnon, waina e doko masop̃alo, waina e m̃elu kokoi ni Moab, doko namawota ni Moab go ni naworawora ni Amor.

¹⁴Nalakena tea wanogoe e pei tea atusiana tusi ni Navakalo maga ki Yehovah, Tea waina e mari a doko Natasi ni nam̃om̃o, Go doko noaisara maga ni Arnon.

¹⁵Go doko nap̃ap̃a noaisara maga waina eu sara siwo paki natokoana ni Ar, Go waina e pei kokoi ni Moab.

¹⁶Go eu m̃elu dua ki tokora wanogoe po surata paki Beer pano: tea wanogoe e pei m̃oru noai waina Yehovah e noa ki Moses asa, e naga, P̃a viragi saisai ki narei tokora wanogoe, go aga wo dua ra noai.

¹⁷Go Israel eu lega nalegaana waia: P̃a putaputa, namata noai O; kuga lega paki nia:

¹⁸Namata noai waina tea maraki maga eu kili a, Waina navarapule maga ni narei eu kili a, Ki naap̃e tapu, go ki tiko ni naveinawotaana adeada maga. Go eu m̃elu dua ki masop̃alo po surata paki Mattanah pano:

¹⁹Go pae Mattanah pano paki Nahaliel: go pae Nahaliel pano paki Bamoth:

²⁰Go pae Bamoth pano paki nap̃aloa waina e doko vanua ni Moab, pano pa pa paki nam̃asua ni Piskah, waina e do leo siwo paki masop̃alo.

²¹Go Israel e dip̃aki lua tea tautauana maga pano punusi Sihon nawota ni naworawora ni Amor, po naga,

²²P̃a suasua kinau naga aga tuagoto navanua anigo: auga wo da dawasi paki vanua mau, kite paki roara ni vaine; auga wo da munu noai ni namata noai maga mau: auga wo pae napua lapa ki nawota pano, pa pa auga surata duaduru kokoi anigo.

²³Go Sihon e da suasua ki Israel naga ega surata duaduru navanua aneana mau: ma Sihon e piragi saisai ki narei aneana mamau puti, po dave paki masop̃alo pano dip̃a Israel, po umai paki Yahas: go e mari navakalo dip̃a Israel.

²⁴Go Israel e atugi a ki nawoka ni lova, po peani navanua aneana pae Arnon pano pa pa liliu Yabbok, go pa pa liliu Ammon natuna maga: nalakena Yaser e pei kokoi ni Ammon natuna maga.

²⁵Go Israel e dape pavakoto natokoana maga mamau puti wanogoe: go Israel e doko natokoana maga ki naworawora ni Amor, doko Heshbon, go doko natokoana kakana maga mamau puti.

²⁶Nalakena Heshbon e pei natokoana ki Sihon nawota ki naworawora ni Amor, waina eu mari navakalo dip̃a nawota vea ni Moab, po dape pavakoto navanua mamau aneana m̃elu dua ki nam̃elearuna, pa pa liliu Arnon.

²⁷Nalakena tea wanogoe tea maga waina eu pasa navasamaluluakiana maga eu naga, Kuga umai paki Heshbon, Natokoana ki Sihon ega moro pei tea tavagiana po pei tea lawo‐ki‐laketokoana:

²⁸Nalakena nakapu sikai e po pae Heshbon dave pano, Mena ni nakapu sikai e m̃elu natokoana ki Sihon: E po gani dinomi Ar ki Moab, Nawota maga ni tokora vakilagi maga ni Arnon.

²⁹Ai ki‐go, Moab! Ku po mavunuvunu, nimu narei ni Kemosh O: E po pitua ki natuna naanoai maga eu pei tea sava pano maga, Go natuna nagoroi maga eu pei tea tip̃aki‐lua‐pavakotoana ki Sihon, Nawota ni naworawora ni Amor.

³⁰Go nagisada e pano puoli m̃elu dua ki Heshbon pano pa pa liliu Dibon, Go au mari ra eu pei maso maladi pa pa liliu Nofah, Go pa pa paki Medeba.

³¹Dapala nogoe Israel e doko navanua ni naworawora ni Amor doko.

³²Go Moses e dip̃aki lua naga euga leo pavaraka Yaser, go eu dape pavakoto natokoana kakana maga, po kopasi lua naworawora ni Amor waina eu doko asa.

³³Go eu dum̃ada doa ra po pae napua paki Bashan pano: go Ok nawota ni Bashan e dave pano dip̃a ra, nara ma narei aneana mamau puti, paki navakalo doko Edrei.

³⁴Go Yehovah e noa ki Moses, e naga, P̃a ta matau ki nia mau: nalakena a po pitua ki nia paki nam̃elearum̃a, nara ma narei aneana mamau puti, go navanua aneana; go p̃a mari paki nia ega tapala waina ku mari a paki Sihon nawota ki naworawora ni Amor, waina eu doko Heshbon.

³⁵Go eu atugi a, go natuna naanoai maga, go narei aneana mamau puti, pa pa tea sikai kakana e da pei tea toropusiana doko mau: go eu peani navanua adeada.