Read Nguna Togoa Etafe North NUMBERS 22 Bible Online

NUMBERS 22 - Nguna Togoa Etafe North bible

NUMBERS 22

¹Go Israel natuna maga eu moro surata, po m̃enaki malo matemate maga ni Moab, taleva kerua ni Yordan leana dip̃a Yeriko.

²Go Balak natu ni Sippor e punusi tea mamau puti waina Israel e mari a paki naworawora ni Amor.

³Go Moab e matau ki p̃arua ki narei, nalakena nara eu laapa: go Moab e dogokitesa nalakena Israel natuna maga.

⁴Go Moab e noa ki tea matua maga ni Midian, e naga, Taua warua waia ega wo menae kotovi tea mamau puti waina eu doko dalivirigoro gida, dakiusi oks waina e do menae kotovi nam̃enau ni napega. Go Balak natu ni Sippor e pei nawota ni Moab ragi wanogoe.

⁵Go e dip̃aki lua tea tautauana maga pano punusi Balaam natu ni Beor doko Pethor, waina e doko nadigi ni Noaisara, doko navanua ki narei aneana natuna maga, naga euga soso e umai, e naga, Pa leo, narei sikai eu m̃elu dua ki Ityipt umai: p̃a leo, eu pakanoe narae ni maramana, go eu m̃enaki doko leana dip̃a au:

⁶Nalakena tea wanogoe, p̃a umai, a pavara ni ko asa, p̃a maginau pasa sa ki narei waia; nalakena eu kasua liu au: mase a pe mariatae marimatua, po atugi ra, po kopasi lua ra m̃elu dua ki navanua pano: nalakena a atae naga tea waina ku pasap̃ia ki nia, e pei tea vasap̃iakiana, go tea waina ku pasa sa ki nia, e pei tea vasasakiana.

⁷Go tea matua maga ni Moab go tea matua maga ni Midian eu m̃elu pano, namoriana maga ni navasapuaana eu doko nam̃elearuda; go eu rumai punusi Balaam, po noa ki nia ki navasaana maga ki Balak.

⁸Go e noa ki da, e naga, Kuga m̃enaki nea p̃ogi waia, go aga wo manimu dape navasaana umai, ega tapala waina Yehovah ega noa kinau asa: go tea maraki maga ni Moab eu doko sikoti Balaam doko.

⁹Go Sup̃e e pakilina ki Balaam, po naga, Naatam̃oli sei maga waina ku mamau doko?

¹⁰Go Balaam e noa ki Sup̃e, e naga, Balak natu ni Sippor, nawota ni Moab e dip̃aki lua po noa kinau, e naga,

¹¹P̃a leo, narei waina e m̃elu dua ki Ityipt umai, e pakanoe narae ni maramana: p̃a umai, po maginau pasa sa ki da; mase a pe mariatae marimatua ki da, po kopasi lua ra pano.

¹²Go Sup̃e e noa ki Balaam, e naga, Kuga ta mamau pano mau; p̃a ta pasa sa ki narei wanogoe mau: nalakena eu pei tea vasap̃iakiana.

¹³Go Balaam e duleana malip̃ogi ki nia, po noa ki tea maraki maga ki Balak, e naga, Nimu kuga vaki navanua animu pano: nalakena Yehovah e da suasua kinau naga tuga mamau pano mau.

¹⁴Go tea maraki maga ni Moab eu duleana, go eu pano punusi Balak, po naga, Balaam e da suasua naga ega sikoti gami pano mau.

¹⁵Go Balak e moro dip̃aki lua tea maraki maga pano, eu laapa liu go eu pei tea dodomadaganiana warua liu ra.

¹⁶Go eu rumai punusi Balaam, po noa ki nia, eu naga, Balak natu ni Sippor e noa dapala nea, e naga, A pavara ni ko, te navatuna ega ta dugoro ko naga p̃a ta umai punusi au:

¹⁷Nalakena aga wo mari ko p̃a wo pei tea dodomadaganiana warua liu, go tea waina p̃a noa kinau asa, tea wanogoe aga wo mari a: nalakena tea wanogoe, p̃a umai, a pavara ni ko asa, po maginau pasa sa ki narei waia.

¹⁸Go Balaam e pasadara po noa ki tea suasua maga ki Balak, e naga, Balak e pe tua au nasum̃a aneana e pe vura ki silver go ki kold, ma a pe mari sa liu natip̃akiana ki Yehovah Sup̃e aginau mau naga a pe mari tea kiki kite tea warua.

¹⁹Nalakena tea wanogoe, a pavara ni mu, kuga moro doko nea p̃ogi waia, naga aga moro atae tea waina Yehovah ega moro noa kinau asa.

²⁰Go Sup̃e e pakilina ki Balaam p̃ogi, po noa ki nia, e naga, Naatam̃oli maga wanogoe eu pe umai naga euga soso ko, p̃a tuleana, kuga mamau pano; ma navasaana waina aga noa ki‐go asa, tea wanogoe ega sikina p̃a mari a.

²¹Go Balaam e duleana malip̃ogi ki nia, po sawa ki tea sawagoro nam̃adu ni ass aneana, po pano nara ma tea maraki maga ni Moab eu mamau.

²²Go namaetoana ki Sup̃e e pavaga nalakena e pano: go agelo ki Sup̃e e dum̃ana lawo ki nia napua naga ega vei walap̃ota sikai dip̃a e. Go e do sakesaake ass aneana, go tea suasua dua aneana ero sikoti a.

²³Go ass wanogoe e punusi agelo ki Yehovah e du napua, lova aneana e doko nam̃elearuna: go ass e daleledao, po paki vanua pano: go Balaam e p̃okati ass naga ega roa e paki napua.

²⁴Go agelo ki Yehovah e lawodu napua kiki sikai namawota ni roara sikai ni vaine go ni kerua sikai, nakoro sikai e doko taleva ni mawirina go ni matuana.

²⁵Go ass wanogoe e punusi agelo ki Yehovah, go e dip̃a soki nakoro, po mari p̃orosi natua ni Balaam dip̃a nakoro: go e moro p̃okati a.

²⁶Go agelo ki Yehovah e disu pano, po lawodu nap̃alaasa tokora waina eu mari sa dalele paki taleva ni matua kite paki taleva ni mawiri mau.

²⁷Go ass e punusi agelo ki Yehovah, go e one natano Balaam e sakesaake asa: go namaetoana ki Balaam e pavaga, go e p̃okati ass ki tiko aneana.

²⁸Go Yehovah e p̃olagati nawoka ni ass, go ass e noa ki Balaam, e naga, Nasava waina a mari a paki‐go, naga ku paka tolu p̃okati au?

²⁹Go Balaam e noa ki ass, e naga, Nalakena ku mari saudoa kinau: lova sikai e pe toko nam̃elearugu, a pe atugi sua ko.

³⁰Go ass e noa ki Balaam, e naga, Kinau a da pei ass anigo, waina ku sakesaake au namauriana mamau anigo, pa pa paki naaleatia waia, kite? Kinau a mari dapala nogoe paki‐go te ragi, kite?

³¹Go e naga, Ee. Go Yehovah e p̃olagati namata ni Balaam, go e punusi agelo ki Yehovah e lawodu napua, lova aneana e doko nam̃elearuna: go e kolo, po dowo dap̃olosiwo.

³²Go agelo ki Yehovah e noa ki nia, e naga, Ekasana ku paka tolu p̃okati ass anigo? P̃a leo, a po dave umai pei walap̃ota sikai, nalakena namariana anigo e dagele naraegu:

³³Go ass e punusi au, po paka tolu dalele: e pe ta dalele kinau, a pe mari punue ko, po mauti a.

³⁴Go Balaam e noa ki agelo ki Yehovah, e naga, A po mari naleo sa; nalakena a da atae naga ku lawodugoro au napua: nalakena tea wanogoe e pe vei tea waina e sa namatam̃a, a pe wo liliu pano.

³⁵Go agelo ki Yehovah e noa ki Balaam, e naga, Kuga vano ma naatam̃oli maga wanogoe: ma navasaana waina aga wo noa kigo asa, tea wanogoe ega sikina p̃a wo noa e. Go Balaam e pano, nara ma tea maraki maga ki Balak eu mamau.

³⁶Go ragi waina Balak e dogo naga Balaam e po umai, e dave pano naga ega sua e Natokoana ni Moab, waina e doko kokoi ni Arnon, waina e doko namatap̃ago edaku ni kokoi.

³⁷Go Balak e noa ki Balaam, e naga, Kinau a da dip̃aki lua pa punusi ko po soso ko umai, kite? Ekasana ku da umai punusi au mau? Kinau a da mariatae mari ko p̃a vei tea dodomadaganiana, kite?

³⁸Go Balaam e noa ki Balak, e naga, P̃a leo, a po umai punusi ko: ma kinau a peani naveinawotaana naga aga noa te navatuna, kite? Navasaana waina Sup̃e ega toropusi a nawokagu, tea wanogoe e one au one naga aga noa e.

³⁹Go Balaam ma Balak ero dua pano, go ero umai paki Kiriath‐husoth.

⁴⁰Go Balak e mari naviriana ni oks maga go ni shiip, go e dua Balaam go tea maraki maga waina eu mamau doko, namagovai ni nap̃okasida.

⁴¹Go e pakilina matamai ki nia, naga Balak e piragi Balaam sake paki tokora vakilagi maga ki Baal, go pae tokora wanogoe e punusi narei mamau puti.