Read Nguna Togoa Etafe North NUMBERS 23 Bible Online

NUMBERS 23 - Nguna Togoa Etafe North bible

NUMBERS 23

¹Go Balaam e noa ki Balak, e naga, P̃a maginau davagi wede ni naviriana ega larua tokora waia, po maginau mari m̃ata ki kau anoai ega larua go shiip anoai ega larua.

²Go Balak e mari dapala waina Balaam e noa e; go Balak ma Balaam ero mari naviriana ni kau anoai sikai go ni shiip anoai sikai wede ni naviriana sikasikai sarasara ra.

³Go Balaam e noa ki Balak, e naga, P̃a lawodu nap̃irikia ni navituaana tap̃arakiana anigo, go aga wo pano; mase Yehovah e pe wo umai sua au. Go tea waina ega visei kinau asa, aga wo noa ki‐go asa. Go e paki tokora vakilagi sikai pano.

⁴Go Sup̃e e umai punusi Balaam: go e noa ki nia, e naga, A po mari m̃ata ki wede ni naviriana larua, go a po pitua ki naviriana ni kau anoai sikai go ni shiip anoai sikai wede ni naviriana sikasikai sarasara ra.

⁵Go Yehovah e doropusi navasaana sikai nawoka ni Balaam, e naga, P̃a liliu pano punusi Balak, go p̃a noa ki nia ega tapala nea.

⁶Go e liliu pano punusi a, go p̃a leo, e lawodu nap̃irikia ni navituaana tap̃arakiana aneana, nara ma tea maraki maga namau puti ni Moab.

⁷Go e pasa naluluakia aneana, po naga, Balak nawota ni Moab e piragi lua au m̃elu dua ki Aram umai, M̃elu dua ki tava maga ni elo sake, doko do naga, P̃a umai, p̃a maginau pasa sa ki Yakob, Go p̃a umai, p̃a mari dip̃a Israel.

⁸Ega tapale sava aga vasa sa ki tea waina Sup̃e e da pasa sa ki nia mau? Go ega tapale sava aga mari dip̃a tea waina Sup̃e e da mari dip̃a e mau?

⁹A doko nam̃asua ni vatu laketoko po punusi a, A doko tava maga po leo punusi a: P̃a leo, e pei narei sikai waina e pei tea wotaeluaana, Po da pei tea midoakiana sikoti nalauna maga mau.

¹⁰Sei e mariatae peve nam̃otam̃ota ni Yakob, Kite peve parati ki nalapalapaana ni Israel? Ega vei aginau naga aga mate namateana ki tea leana, Go ega vei aginau naga ragi edaku aginau ega wo dakiusi aneana!

¹¹Go Balak e noa ki Balaam, e naga, Nasava waina ku mari au asa? A piragi lua ko umai naga p̃a vasa sa ki tea kokona kinau maga, go kuga leo, ku po pasa p̃ia ki da.

¹²Go e pasadara, po naga, E da one au one naga aga vavaigoro po noa tea waina Yehovah e doropusi a nawokagu, kite?

¹³Go Balak e noa ki nia, e naga, P̃a umai, a pavara ni ko asa, toroga vaki tokora p̃ota sikai pano, go pae tokora wanogoe ku mariatae punusi ra; p̃a wo punusi namagovai kakada, po da punusi puti ra mau: go pae tokora wanogoe p̃a maginau pasa sa ki da asa.

¹⁴Go e piragi a paki vanua ni Sofim, paki nam̃asua ni Piskah pano, po davagi wede ni naviriana larua, po pitua ki kau anoai sikai go shiip anoai sikai wede ni naviriana sikasikai sarasara ra.

¹⁵Go e noa ki Balak, e naga, P̃a lawodu nap̃irikia ni navituaana tap̃arakiana anigo, go aga vaki tokora wanana po sua Yehovah asa.

¹⁶Go Yehovah e umai punusi Balaam, po doropusi navasaana sikai nawokana, e naga, P̃a liliu pano punusi Balak, go p̃a noa ki nia ega tapala nea.

¹⁷Go e umai punusi a, go p̃a leo, e lawodu nap̃irikia ni navituaana tap̃arakiana aneana, nara ma tea maraki maga ni Moab eu mamau. Go Balak e noa ki nia, e naga, Yehovah e noa nasava?

¹⁸Go e pasa naluluakia aneana, po naga, P̃a tuleana, Balak O, po daki dorogo; P̃a rogo parati kinau, nigo natu ni Sippor O:

¹⁹Sup̃e e da pei naatam̃oli mau naga ega sorosoro; Kite naatam̃oli natuna mau naga ega midoaki doa: Ega wo pasa po da mari patakana mau, kite? Kite ega wo da pakavuro e mau, kite?

²⁰P̃a leo, a dape natip̃akiana sikai naga aga vasap̃iaki: Nae e pasap̃ia, go kinau a mari sa mari piri a mau.

²¹E da leo punusi namarisakiana doko Yakob mau, Kite punusi narogokitesaana doko Israel: Yehovah Sup̃e aneana e sikoti a doko, Go nasamasamaana ni nawota sikai e doko m̃aleoputo kakada.

²²Sup̃e e piragi lua ra m̃elu dua ki Ityipt umai; Nakasuaana aneana e dakiusi tea ki oks mila.

²³Nalakena nakikitaana e dika Yakob, Go navasapuaana e dika Israel: Ragi kakana, tea waina Sup̃e ega wo mari a, Ega wo pei tea noasaiana paki Yakob go Israel.

²⁴Kuga leo, narei wanogoe eu duleana dapala laion goroi, Go dapala laion waina e dum̃ana pitosi a du: Ega wo da one natano mau pa pa ega wo gani tea katip̃oraeana, Po munu nada ni tea katipunueana.

²⁵Go Balak e noa ki Balaam, e naga, P̃a ta pasa sa ki da mau, kite pasa p̃ia ki da mau.

²⁶Ma Balaam e pasadara po noa ki Balak, e naga, Kinau a da noa ki‐go asa, naga tea mamau puti waina Yehovah ega noa kinau asa, e one au one naga aga mari patakana, kite?

²⁷Go Balak e noa ki Balaam, e naga, P̃a umai, toroga vaki tokora p̃ota sikai pano; mase Sup̃e e pe wo midoaki m̃ata ki nia naga pae tokora wanogoe ku mariatae maginau pasa sa ki da asa.

²⁸Go Balak e piragi Balaam sake paki nam̃asua ni Peor pano, waina e do leo siwo paki masop̃alo.

²⁹Go Balaam e noa ki Balak, e naga, P̃a maginau davagi wede ni naviriana ega larua tokora waia, po maginau mari m̃ata ki kau anoai ega larua tokora waia, go shiip anoai ega larua.

³⁰Go Balak e mari dapala waina Balaam e noa e, po pitua ki kau anoai sikai go shiip anoai sikai wede ni naviriana sikasikai sarasara ra.