Read Nguna Togoa Etafe North NUMBERS 24 Bible Online

NUMBERS 24 - Nguna Togoa Etafe North bible

NUMBERS 24

¹Go ragi waina Balaam e punusi naga Yehovah e midoaki m̃ata ki nia naga ega vasap̃ia ki Israel, e da pano naga ega laaga nakikitaana maga dapala sala vea mau, ma e lawo ki naraena paki masop̃alo.

²Go Balaam e sike namatana, go e punusi Israel eu doko tap̃aup̃au adeada maga doko, pae naworaworada maga; go Naata ni Sup̃e e umai po lawo asa.

³Go e pasa naluluakia aneana, po naga, Navasaana ki Balaam natu ni Beor, Navasaana ki naatam̃oli waina e pei tea kikita:

⁴Navasaana ki tea waina e dogo nanoaana maga ki Sup̃e, Waina e punusi navunusiana ni Tea Kasua Mau, E maturu, ma naatana e leleo doko:

⁵Tap̃aup̃au anigo maga eu p̃ia lua, Yakob O, Go nasum̃atokoana anigo maga, Israel O!

⁶Eu dakiusi malo matemate maga waina eu pei tea saikiana, Dakiusi roara maga nadigi ni noaisara, Dakiusi aloe maga waina Yehovah e lawo ra, Dakiusi nakau sidar pisari nap̃ap̃a noaisara.

⁷Lasa vautu aneana maga euga wo sarasaraape, Go naruna ega wo dap̃au narei laapa, Go nawota aneana ega wo pakilagi liu Akak, Go namarakiana aneana ega wo pei tea sikeana pakilagi.

⁸Sup̃e e piragi lua e m̃elu dua ki Ityipt umai; Nakasuaana aneana e dakiusi tea ki oks mila: Ega wo gani dinomi nalauna maga, Tea kokona ki nia maga, Go ega wo marip̃oraworae navatuda maga, Po puri sasama ki da ki nalua aneana maga.

⁹E kusugoro, e one natano dakiusi laion, Go dakiusi laion goroi; sei ega wo pulevule a? Tea maga mamau puti waina eu pasap̃ia ki‐go, Euga wo pei tea vasap̃iakiana, Go tea maga mamau puti waina eu pasa sa ki‐go, Euga wo pei tea vasasakiana.

¹⁰Go namaetoana ki Balak e pavaga dip̃a Balaam, go e p̃osae naruna: go Balak e noa ki Balaam, e naga, A soso ko umai naga p̃a vasa sa ki tea kokona kinau maga, go p̃a leo, ku po paka tolu pasa p̃ia ki da.

¹¹Nalakena tea wanogoe, p̃a sava paki tokora anigo pano: a midoa ki nia naga aga mari ko p̃a vei tea dodomadaganiana p̃arua liu; ma p̃a leo, Yehovah e mauti ko ki nadodomadaganiana.

¹²Go Balaam e noa ki Balak, e naga, Go kinau a da noa ki tea tautauana anigo maga waina ku dip̃aki lua ra umai punusi au, a da noa naga,

¹³Balak e pe tua au nasum̃a aneana e pe vura ki silver go ki kold, ma a pe mari sa liu navasaana ki Yehovah, po mari tea ni namasauana aginau mau, e pe vei tea wia kite e pe vei tea sa; tea waina Yehovah ega noa e, tea wanogoe aga wo noa e, kite?

¹⁴Go p̃a leo, aga wo pano punusi narei aginau: ma aga wo noakisai ko ki tea waina narei wanogoe euga wo mari a paki narei anigo naaleatia edaku maga.

¹⁵Go e pasa naluluakia aneana, po naga, Navasaana ki Balaam natu ni Beor, Navasaana ki naatam̃oli waina e pei tea kikita:

¹⁶Navasaana ki tea waina e dogo nanoaana maga ki Sup̃e, Go waina e atae naataeana ni Tea Vakilagi Mau, Waina e punusi navunusiana ni Tea Kasua Mau, E maturu, ma naatana e leleo doko:

¹⁷Aga wo punusi a, ma ega ta pei ragi waia mau: Aga wo leo punusi a, ma ega ta pei tokora waia mau: M̃asoe sikai ega wo m̃elu Yakob umai, Naap̃e ki nawota ega wo duleana m̃elu Israel, Go ega wo atugi nap̃au ni Moab, Po dap̃olosiwo ki Sheth natuna maga.

¹⁸Go Edom ega wo pei tea veaniana sikai, Go Seir waina eu pei tea kokona ki nia maga, Nara ma euga wo pei tea veaniana sikai; Go Israel ega wo marimatua.

¹⁹Go tea sikai ega wo m̃elu Yakob, Waina ega wo peani naveinawotaana, Go nae ega wo mari puoli ki namagovai waina e doko, M̃elu dua ki natokoana.

²⁰Go Balaam e leo paki Amalek, po moro pasa naluluakia aneana, po naga, Amalek e pei nalauna kasua liu; Ma ega wo pei tea mari‐puolikiana.

²¹Go e leo paki Kain, po moro pasa naluluakiana aneana, po naga, Tokora tokoana anigo e doko kasua doko, Go vete anigo e pei tea lawokiana vatu laketoko.

²²Ma Kain ega wo pei tea mariana ega vei maso maladi, Ashur ega wo piragi lua pavakoto ki‐go.

²³Go e moro pasa naluluakia aneana, po naga, Awi, sei ega wo mauri ragi waina Sup̃e ega wo mari tea wanogoe?

²⁴Ma rarua maga euga wo pae navanua ni Kittim umai, Go euga wo mari sa ki Ashur go Eber, Go nae ma ega wo pei tea mari‐puoli‐kiana.

²⁵Go Balaam e duleana, po liliu paki tokora aneana pano: go Balak nae ma e surata napua aneana pano.