Read Nguna Togoa Etafe North NUMBERS 27 Bible Online

NUMBERS 27 - Nguna Togoa Etafe North bible

NUMBERS 27

¹Go natu nagoroi maga ni Selofehad, natu ni Hefer, natu ni Cilead, natu ni Makir, natu ni Manasseh, ni nawora maga ni Manasseh natu ni Yosef, eu rumai paki m̃aladigi: go natuna nagoroi maga nagisada maga; Mahlah, Noah, go Hoklah, go Milkah, go Tirsah.

²Go eu lawodu narae ni Moses, go narae ni Eleasar tea viri, go narae ni tea maraki maga go nasaisaiana mamau, namata ni tap̃aup̃au ni nasaisaiana,

³po naga, Tamagami e mate masop̃alo, go nae e da pei tea sikai ni taua naatam̃oli waina eu dum̃ada saisai ki da, nara ma taua ni Korah, dip̃a Yehovah mau: ma e dum̃ana mate namarinaleosaana aneana; go e dika natuna naanoai.

⁴Ekasana nagisa ni tamagami ega vei tea tapeluaana m̃elu dua ki naworana nalakena e dika natuna naanoai? Kuga tua gami tea veanipiolikiana sikoti tamagami taina maga.

⁵Go Moses e dape navululuana adeada umai paki narae ni Yehovah.

⁶Go Yehovah e pasa paki Moses, po naga,

⁷Selofehad natuna nagoroi maga eu pasa leana: p̃a tua ra matele sikai ni tea veanipiolikiana sikoti tamada taina maga; go p̃a mari tea veanipiolikiana ki tamada ega vei tea adeada.

⁸Go p̃a vasa paki Israel natuna maga, po naga, Naata sikai e pe mate po dika natuna naanoai, kuga mari tea veanipiolikiana aneana ega vei tea ki natuna nagoroi.

⁹Go e pe tika natuna nagoroi, kuga tua taina maga tea veanipiolikiana aneana.

¹⁰Go e pe tika taina, kuga tua tamana taina maga tea veanipiolikiana aneana.

¹¹Go tamana e pe tika taina, kuga tua namatarau aneana asa, waina e pei namatarau m̃aladigi ki nia, go nae ega wo peani a: go ega wo magi Israel natuna maga pei natawonakiana sikai ni navasap̃otaeana, dapala waina Yehovah e dip̃aki Moses asa.

¹²Go Yehovah e noa ki Moses, e naga, P̃a sake paki tava Abarim waina pano, po leo navanua waina a dua Israel natuna maga asa.

¹³Go ragi waina p̃a vunusi sua e, nigo ma p̃a wo pei tea saisaikiana paki namatarau anigo, dapala waina taim̃a Aaron e pea pei tea saisaikiana paki asa:

¹⁴Nalakena ku mari p̃auluulu dip̃a natip̃akiana aginau masop̃alo ni Sin, ragi waina nasaisaiana eu mari navululuana, ku da mari au a dapu namatada maga doko noai maga. (Noai maga wanogoe eu pei noai maga ni Meribah, ni Kadesh, masop̃alo ni Sin.)

¹⁵Go Moses e pasa paki Yehovah,

¹⁶po naga, Yehovah, Sup̃e ni naata ni naatam̃oli maga mamau puti, ega vasa dawona ki naatam̃oli sikai naga ega tap̃au nasaisaiana,

¹⁷Waina ega tave pano kivea ki da, go waina ega liliu umai kivea ki da, go waina ega maraki ra dave pano, go waina ega viragi ra liliu umai; naga nasaisaiana ki Yehovah euga ta dakiusi shiip waina tea leo parati ki da e dika.

¹⁸Go Yehovah e noa ki Moses, e naga, P̃a viragi Yoshua natu ni Nun, naatam̃oli sikai waina naatana sikai e doko asa, go p̃a toropusi nam̃elearum̃a asa;

¹⁹Go p̃a lawo ki nia narae ni Eleasar tea viri, go narae ni nasaisaiana mamau; go p̃a tua e natip̃akiana sikai namatada.

²⁰Go p̃a kovagoro e ki nadodomadaganiana anigo seara kakana, naga nasaisaiana mamau ni Israel natuna maga euga rogo parati ki nia.

²¹Go ega lawodu narae ni Eleasar tea viri, waina ega wo maneana pusuusu pae navasap̃otaeana ni Urim narae ni Yehovah: pae navasaana aneana euga tave pano, go pae navasaana aneana euga moro liliu umai, nara ma Israel natuna maga euga mamau, nasaisaiana mamau puti.

²²Go Moses e mari dakiusi waina Yehovah e dip̃aki nia asa: go e piragi Yoshua, po lawo ki nia narae ni Eleasar tea viri, go narae ni nasaisaiana mamau:

²³Go e doropusi nam̃elearuna maga asa, po dua e natip̃akiana sikai, dakiusi waina Yehovah e noa e pae nam̃elearu ni Moses.